قاراقشىلار «اقجار» شاعىن اۋدانىندا ورنالاسقان وپا-دالاپ قويماسىنا شابۋىلدى تۇنگى ون بىردە جاساعان.
«قاراقشىلار وزدەرىن كۇزەت كومپانياسىنان كەلگەن تەكسەرۋشىلەر رەتىندە تانىستىرىپ, الداۋ جولىمەن ىشكە كىرگەن. كۇزەتشى قۋلىقتى سەزبەي ەسىكتى اشقاندا قاسكۇنەمدەر ونى شالقاسىنان تۇسىرگەن. كۇدىكتىلەر بىردەن ىشىندە سەگىز ميلليون تەڭگەسى بار سەيفكە بەتتەگەن. ولار عيماراتتىڭ ەسىگىن اشىپ, اقشادان باسقا دەكوراتيۆتى كوسمەتيكا سالىنعان بىرنەشە قوراپتى الىپ كەتكەن. كۇزەتشى كۇدىكتىلەر وقيعا ورنىنان كەتىپ قالعاننان كەيىن دابىل سوققان», دەدى ناۋرىزباي اۋداندىق پوليتسيا باسقارماسىنىڭ باستىعى ديدار احانوۆ.
اتالعان فاكت سوتقا دەيىنگى تەرگەپ-تەكسەرۋلەردىڭ بىرىڭعاي تىزىلىمىندە قر قك-ءنىڭ 192-بابىنىڭ 4-بولىگى (قاراقشىلىق) بويىنشا تىركەلدى.
ارنايى تەرگەۋ-جەدەل توبى قۇرىلدى. كەشەندى شارالار ناتيجەسىندە كۇدىكتىلەر انىقتالىپ, قاماۋعا الىندى. ولاردىڭ ۇشەۋى الماتى وبلىسىنىڭ, ال بىرەۋى شىعىس قازاقستان وبلىسىنىڭ تۇرعىنى بولىپ تابىلادى. توپتىڭ ەڭ ۇلكەن مۇشەسى 32 جاستا, ەڭ كىشىسى 20 جاستا. بۇرىن ولاردىڭ ەشقايسىسى قىلمىستىق جاۋاپكەرشىلىككە تارتىلماعان.
پوليتسەيلەردىڭ حابارلاۋىنشا, كۇدىكتىلەردى ۇستاۋ شاراسىن پد-ءنىڭ ارنايى بولىمشەسىنىڭ قىزمەتكەرلەرى جۇرگىزگەن. قاسكۇنەمدەردىڭ كولىگى قالاعا كىرە بەرىستە بۇعاتتالعان.
«كۇدىكتىلەر ۇرلانعان سەيفتى قىلمىستان كەيىن بىردەن سەنىمدى جەرگە جاسىرعان, ولار ونى الىپ كەتۋگە ەكى كۇننەن كەيىن كەلۋگە كەلىسكەن. وعان دەيىن ءبىز كەزدەسۋ ۋاقىتى مەن ورنى تۋرالى بىلدىك. ايتپاقشى, ۇستالعانداردىڭ ءبىرى وسى كومپانيادا ەكسپەديتور بولىپ جۇمىس ىستەيدى, ول ءدال وسى نىسانعا دوستارىن كومپانيانىڭ كىرىسى تۋرالى بىلگەننەن كەيىن الىپ كەلگەن. سوندىقتان ولارعا كۇزەتشىنى الداۋ قيىنعا سوقپاعان», دەيدى ول.
ۇستالعاندار قازىر قاماۋدا. زاتتاي ايعاقتار تاركىلەندى. تەرگەۋ جالعاسىپ جاتىر.
