فاو-عەق «ورتالىق ازيا مەن تۇركياداعى قۇرعاقشىلىققا جانە سورتاڭدانعان اۋىلشارۋاشىلىق وندىرىستەرىندەگى تابيعي رەسۋرستاردى كەشەندى باسقارۋ» جوباسى اياسىنداعى ءىس-شارادا وڭىردەگى سورتاڭدانعان القاپتار مەن ولاردى قالپىنا كەلتىرۋ باعىتىنداعى تاجىريبەلەر جايلى ايتىلدى.
ەلىمىزدەگى اۋىلشارۋاشىلىق جەرلەرىنىڭ اۋماعى 226,6 ملن گەكتار بولسا, ونىڭ 2,3 ملن گەكتارى سۋارمالى القاپتار. ال وبلىستاعى سۋارمالى القاپ كولەمى 231400 گەكتار بولىپ وتىر. بۇل اۋماقتىڭ 178 100 گەكتارى ينجەنەرلىك-جوسپارلانعان جەر.
دەگەنمەن دە سوڭعى جىلدارى كەيبىر شارۋا قوجالىقتارىندا كۇرىش ونىمدىلىگى جوسپارلانعان دەڭگەيدەن تومەندەگەنى بايقالادى. ماماندار مۇنىڭ نەگىزگى سەبەبى اۋىسپالى ەگىس جۇيەسىنىڭ بۇزىلۋىنان بولىپ وتىرعانىن ايتادى. سونىمەن قاتار سۋارمالى جەرلەردىڭ ەكولوگيالىق جانە مەليوراتيۆتى جاعدايىنىڭ ناشارلاۋى, اگروتەحنيكانىڭ ساقتالماۋى دا ويداعىداي ءونىم الۋعا كەرى اسەرىن تيگىزىپ وتىر.
وسىعان بايلانىستى فاو-نىڭ جوباسى اياسىندا جاقاەۆ اتىنداعى قازاق كۇرىش شارۋاشىلىعى عىلىمي-زەرتتەۋ ينستيتۋتى ماماندارى اۋىسپالى ەگىستىك القاپتاردا قانت قۇمايى مەن جەرگىلىكتى سەلەكتسيونەرلەر شىعارعان تۇيەجوڭىشقانىڭ "الاۋلا" سورتىن ءوسىرۋ ارقىلى توپىراقتاعى تۇز رەجيمىن رەتتەۋدىڭ يننوۆاتسيالىق تاسىلدەرىن ەنگىزىپ وتىر. كونفەرەنتسيادا عالىمدار سۋارمالى جەرلەردىڭ قۇنارلىلىعىن ارتتىرىپ, جەر رەسۋرستارىن تۇراقتى باسقارۋدىڭ تاسىلدەرى مەن قۇرالدارىن جەتىلدىرۋگە باعىتتالعان وسى باستاما جايلى كەڭىنەن ايتىپ ءوتتى.
