ايماقتار • 21 جەلتوقسان، 2020

سەمەيدەگى بىلعارى زاۋىتى جەلاتين مەن بەلكوزين شىعارۋدى جوسپارلاپ وتىر

33 رەت كورسەتىلدى

سەمەيدەگى 10 جىل بويى تۇرىپ قالعان بىلعارى زاۋىتى شىعارىلاتىن ءونىم جەلىسىن كەڭەيتۋدى كوزدەپ وتىر. جارتى جىلدان از ۋاقىت ىشىندە كاسىپورىن تۇرىپ قالعان ءوندىرىستى قالپىنا كەلتىرىپ قانا قويماي، ەكسپورتقا شىعا الدى. ەندى وندىرىستىك قۋاتتىلىقتى ارتتىرۋ، ءتىپتى زاۋىت ءۇشىن جاڭا ءونىم – جەلاتين مەن بەلكوزين شىعارۋدى باستاۋ جوسپاردا بار، دەپ حابارلايدى Egemen.kz.

2020 جىلدىڭ ماۋسىمىندا «قازاقستاننىڭ ينۆەستيتسيالىق قورى» اق  جانە Kusto Group حالىقارالىق كومپانيالار توبىنا كىرەتىن «Semey Tannery» جشس كومپانياسى اراسىندا سەمەي قالاسىندا بىلعارى كومبيناتىن كەيىننەن ساتىپ الۋ قۇقىعىمەن م ۇلىكتى جالعا الۋ شارتىنا قول قويىلدى.

ينۆەستور بىرقاتار جوندەۋ جۇمىستارىن جۇرگىزىپ، 2020 جىلدىڭ تامىز ايىندا جۇمىسقا كىرىستى. كاسىپورىندا حابارلاعانداي، كومبيناتتا ايىنا 250 تونناعا دەيىن شيكىزات وڭدەلەدى. كومبيناتتىڭ ماكسيمالدى قۋاتى جىلىنا 1،7 ميلليون شارشى مەترگە دەيىن wet blue جارتىلاي فابريكاتىن قۇراۋى مۇمكىن. جارتىلاي فابريكاتتاردى ءوندىرۋ تەحنولوگياسىندا قولدانىلاتىن شيكىزات پەن قاجەتتى حيميالىق زاتتاردى جەرگىلىكتى ءونىم بەرۋشىلەر جەتكىزەدى، سونىمەن قاتار رەسەيدەن ءىشىنارا ساتىپ الىنادى.

«بۇگىندە ءبىز زاۋىتتا وڭدەۋگە دايىن 800 تونناعا جۋىق ءىرى قارا تەرىسىن ساتىپ الدىق. ءبىز ءالى ماكسيمالدى قۋاتقا جەتە المادىق، سەبەبى پاندەميا اسەر ەتتى، ەلدەر مەن ايماقتار اراسىنداعى شەكارالار جابىلعان كەزدە ءبىز دايىن ءونىمدى ەكسپورتتاي المادىق، قاجەتتى حيميكاتتاردى يمپورتتاي المادىق، ايماقتاردان شيكىزات الا المادىق... بۇل وتە قيىن بولدى، بىراق سوعان قاراماستان، ءبىز توتەپ بەرىپ، ءوندىرىس قارقىنىن بىرتىندەپ ارتتىرۋدامىز. قازىرگى ۋاقىتتا زاۋىت جۇكتەمەسى شامامەن 30-40 پايىزدى قۇرايدى. قازان ايىندا ءونىمنىڭ العاشقى پارتياسى ەكسپورتقا جونەلتىلدى. ءبىز قازاقستان بويىنشا شيكىزات ساتىپ الۋ جەلىسىن قۇرىپ، وتاندىق تاۋار وندىرۋشىلەرمەن سەرىكتەستىكتى جولعا قويدىق»، - دەپ ءبولىستى «Semey Tannery» جشس اتقارۋشى ديرەكتورى رۋسلان بيسەنوۆ. 

كومبينات ونىڭ نەگىزگى قىزمەت ءتۇرى بويىنشا ىسكە قوسىلدى: ىقم تەرىسىن وڭدەۋ، wet blue حرومدى يلەۋدىڭ ەكسپورتقا باعدارلانعان جارتىلاي فابريكاتى بىلعارى ءونىمىن ءوندىرۋ جانە ساتۋ. كاسىپورىندا 100-گە جۋىق ادام جۇمىس ىستەيدى.

سوڭعى جاڭالىقتار

ۇقساس جاڭالىقتار