شاكارىم اتىنداعى سەمەي مەملەكەتتىك ۋنيۆەرسيتەتىن بەينەلەۋ ونەرى جانە گرافيكا ماماندىعىمەن تامامداعان جاس ازامات ءدال قازىر شاكىرت تاربيەلەۋمەن قاتار, شىعارماشىلىق جۇمىسپەن اينالىسىپ ءجۇر. سۋرەتشىنىڭ وي-قيالىنان تۋعان كارتينالارى ءارتۇرلى تاقىرىپتى قامتيدى. اتاپ ايتقاندا, ناتيۋرمورت, پورترەت, پەيزاج, سونىمەن بىرگە ءتىرى جان يەلەرىن بەينەلەيتىن انيماليستىك باعىت پەن بەلگىلى ءبىر تاريحي وقيعالارعا ارنالعان كوركەم تۋىندىلار جازۋدا.
قىلقالام شەبەرىنىڭ نەگىزى ەرەكشەلىگى – ونىڭ ەڭبەكتەرىنىڭ بوياۋى قانىق, كومپوزيتسياعا باي, سونىمەن قوسا ادامنىڭ جان دۇنيەسىندەگى رۋحاني تولقىنىسپەن ۇندەستىك تاباتىن نازىك سەزىمگە قۇرىلعان, ورتانى ءتۇيسىنۋ, سەزىنۋ ارقىلى جاراتىلىسقا باسقاشا كوزبەن قارايتىن ونەر يەسى. ونىڭ ەڭبەكتەرىمەن تانىسقان تانىمال سۋرەتشى قوڭىر مۇقاماديەۆ «بۇل جىگىت بەينەلەۋ ونەرىندەگى كرەاتيۆتى يدەياسى بار تالانتتى سۋرەتشىلەردىڭ ءبىرى» دەگەن ەكەن.
ەۋرازيا ديزاينەرلەر وداعىنىڭ مۇشەسى ە.جاكىشەۆتىڭ كوپتەگەن كارتيناسى وسكەمەن قالاسىنداعى ونەر مۇراجايى مەن سەمەيدەگى نەۆزوروۆتار مۇراجايلارىندا ساقتاۋلى تۇرسا, اتقارعان ەڭبەگى ءۇشىن وبلىستىڭ «ۇزدىك پەداگوگى» اتانۋمەن قاتار, «رۋحاني جاڭعىرۋ» باعدارلاماسى اياسىندا وتكەن بايقاۋدىڭ جۇلدەگەرى اتانعانى بار.
سۋرەتشى-ۇستازدىڭ شاكىرتتەرى 2018 جىلى وتكەن حالىقارالىق «Golden Stars» تالانتتىلار فەستيۆالىنە قاتىسىپ, ۇزدىكتەر قاتارىنان كورىنسە, ەركەبۇلان ءماۋىتحان ۇلى دۇنيەجۇزىلىك بەينەلەۋ ونەرىنە قوسقان ۇلەسى ءۇشىن ارنايى ماراپاتقا قول جەتكىزىپتى. سول سياقتى, ەكى جىل بۇرىن «التاي – قازاقستان جاۋھارى» اتتى رەسپۋبليكالىق پلەنەردىڭ ۇزدىك سەرتيفيكات يەسى اتانعان.
– جوعارىداعى شارالار ولكەنىڭ سۋرەت ونەرىن وركەندەتىپ, شالعاي اۋداندا تالانتتار شوعىرىن قالىپتاستىرۋعا ۇلكەن اسەر ەتتى. سونىمەن بىرگە ۇلتتىق رۋحاني نەگىزگە تولى ەتنوگرافيالىق ەتيۋدتەردى بەينەلەۋدىڭ قىر-سىرىن ۇيرەندىك, – دەيدى ۇستاز-سۋرەتشى.
قازىرگى تاڭدا تالانتتى سۋرەتشى, تالاپتى ۇستاز جاسوسپىرىمدەرگە سۋرەت ونەرىنىڭ قىر-سىرىن ۇيرەتۋمەن بىرگە, جاس تالانتتاردى ۇشتاۋ ءۇشىن تىنىمسىز ەڭبەك ەتۋدە. ونىڭ شاكىرتتەرى جاساعان «مەنىڭ ەلىم – تاۋەلسىز قازاقستان», «ەلباسى مارتەبەسى – ەل مارتەبەسى», «اتا-بابا مۇرالارىن ساقتايمىز جانە كوبەيتەمىز», «ەكولوگيا پلانەتاسى» تاقىرىبىنداعى ەڭبەكتەرى جاسوسپىرىمدەر اراسىندا وتكەن رەسپۋبليكالىق, وبلىستىق كورمەلەردىڭ جۇلدەسىن الىپ ءجۇر.
