ىرگەتاسى بەرىك قالانىپ, بۇگىنىنە دە, بولاشاعىنا دا ۋاقتىلى قام جاساعان جاس مەملەكەتىمىز ىشكى-سىرتقى ساياساتتاعى ساباقتاستىقتى ساقتاي بىلگەن مەملەكەت باسشىسى قاسىم-جومارت توقاەۆتىڭ سىن كەزەڭدەگى سىندارلى ءىس-قيمىلىنىڭ ارقاسىندا اسا قاتەرلى ىندەتتى اۋىزدىقتاپ, ەكونوميكاداعى داعدارىستى ەڭسەرىپ, قيىن سىناقتان ابىرويمەن شىعىپ كەلەدى. قازىر كوڭىلىمىزدەگى كىربىڭ-كۇدىكتىڭ ورنىن ءۇمىت باسىپ, تاۋەلسىز ەلىمىز باردا, ەلى سۇيگەن, ەلىن سۇيگەن ازاماتتارىمىز بەن بىرلىگى مىقتى ەلىمىز باردا باسقا تۇسكەن قيىندىقتىڭ ءبارىن بىرلەسە جەڭىپ شىعاتىنىمىزعا ەش ءشۇبالانبايتىن بولدىق.
بۇل رەتتە مەملەكەت باسشىسى قاسىم-جومارت توقاەۆ تاۋەلسىزدىك كۇنى قارساڭىندا وتكەن مەملەكەتتىك ناگرادالاردى تاپسىرۋ راسىمىندە سويلەگەن سوزىندە ء«بىز بۇل سىناققا توتەپ بەرىپ, ەلىمىزدى جاھاندىق داعدارىستان الىپ شىعۋ ءۇشىن بار كۇش-جىگەرىمىزدى جۇمىلدىردىق. ەكونوميكاعا قاتىستى تەرىس بولجامداردى جوققا شىعارىپ, ىندەتتىڭ زاردابىن ازايتتىق. دەر كەزىندە قابىلدانعان شارالاردىڭ ارقاسىندا احۋالدى ءبىرشاما تۇراقتاندىردىق», دەپ اتاپ ءوتتى.
سونداي-اق پرەزيدەنت جاھاندىق دۇربەلەڭگە قاراماستان مەملەكەتىمىزدىڭ ىرگەسى مىعىم, تۇعىرى بەكەم ەكەنىن دالەلدەگەنىمىزدى, حالقىمىز جاناشىرلىق پەن قامقورلىقتىڭ, ۇيىمشىلدىق پەن بەرەكە-بىرلىكتىڭ وزىق ۇلگىسىن كورسەتكەنىن جانە ۆولونتەرلەر قوزعالىسى جالپىۇلتتىق سيپاتقا يە بولعانىن باسا ايتتى. دارىگەرلەر مەن مۇعالىمدەردىڭ, ءتارتىپ ساقشىلارى مەن اسكەري قىزمەتشىلەردىڭ كۇندەلىكتى ومىرىمىزدەگى رولىنە ەرەكشە ءمان بەردى. ىندەتپەن كۇرەستىڭ العى شەبىندە, باستارىن بايگەگە تىگىپ جۇرگەن جانە قۇربان بولعان ازاماتتاردىڭ ءبىر توبى مەملەكەتتىك ناگرادالارمەن ماراپاتتالىپ, ولارعا ايرىقشا قۇرمەت كورسەتىلگەندىگى وتە ورىندى. وسى ورايدا مەملەكەت باسشىسىنىڭ تاپسىرماسىنا سايكەس كەلەسى جىلدان باستاپ دارىگەرلەردىڭ جالاقىسى ەكونوميكاداعى ورتاشا جالاقىمەن سالىستىرعاندا ەكى ەسە كوبەيتىلەتىندىگىن دە ايتا كەتكەن ءجون. بۇل حالقىمىزدىڭ باستى بايلىعى – دەنساۋلىعىنىڭ كۇزەتىندە جانقيارلىقپەن ەڭبەكتەنىپ جۇرگەن اق حالاتتى ابزال جاندارعا لايىقتى قولداۋ دەپ بىلەمىز. سونداي-اق ۇستازدارعا, پوليتسەيلەر مەن اسكەري قىزمەتشىلەرگە كورسەتىلەتىن مەملەكەتتىك قامقورلىق اياسى دا ۇدايى كەڭەيىپ كەلەدى.
ەل پرەزيدەنتى كەلەسى جىلدى «تاۋەلسىزدىكتىڭ 30 جىلدىعى» دەپ جاريالادى. مەملەكەت باسشىسى وتكەن ءاربىر ون جىلدىقتىڭ اتقارعان ميسسياسى تۇرعىسىنان عاسىردىڭ جۇگىن ارقالاپ تۇرعانىن مالىمدەدى.
كوروناۆيرۋس پاندەمياسىنان ءتيىستى ساباق الىپ, تويشىلدىق پەن داڭعويلىق سىندى تەرىس ادەت-عۇرپىن تىيىپ, قاتاڭ تارتىپكە باعىنا بىلەتىندىگىن ايعاقتاعان حالقىمىز, پرەزيدەنتىمىز ايتقانداي, ۇلى اباي وسيەتىن ورىنداپ, ءبىلىمدى دە بىلىكتى, ۇقىپتى دا جاۋاپتى, ىسكەر دە ەڭبەكقور جۇرتقا اينالۋى ءتيىس. اتا-بابامىز اڭساعان, باعا جەتپەس باقىتىمىز – تاۋەلسىزدىك الدىنداعى باستى پارىزىمىز دا وسى.
كارىباي مۇسىرمان,
پارلامەنت ءماجىلىسىنىڭ دەپۋتاتى
