جاڭا جوسپار تانىستىرىلدى
اقش-تىڭ جاڭا سايلانعان پرەزيدەنتى دجو بايدەن كليماتتىڭ وزگەرۋىنە قارسى جوسپارىن تانىستىردى. جوسپاردى ازىرگە سەنات ماقۇلداعان جوق. قۇرىلاتىن اگەنتتىكتى افرو-امەريكالىق باسقارادى دەگەن سىبىس بار.
بۇعان دەيىن حابارلاعانىمىزداي, اقش-تىڭ جاڭا پرەزيدەنتىن ۇلىقتاۋ ءراسىمى 20 قاڭتارعا جوسپارلانعان. الايدا بايدەن قول قۋسىرىپ وتىرماي, جاڭا جوسپار ۇسىنىپ ۇلگەردى. ء«بىز ۇلكەن داعدارىستامىز. پاندەميامەن قالاي بىرلەسىپ كۇرەسسەك, كليماتتىڭ وزگەرۋىمەن دە سولاي بىرلەسىپ كۇرەسۋىمىز كەرەك», دەدى ول.
تانىستىرۋ بارىسىندا پاريج كەلىسىمىنە اقش-تىڭ قايتادان قوسىلاتىنىن مالىمدەدى. «امەريكا بۇل جولى جاھاندىق كليماتتىڭ وزگەرۋىمەن الدىڭعى شەپتە كۇرەسەدى» دەگەن مالىمدەمە جاسادى بايدەن.
دونالد ترامپ باسشىلىق ەتىپ تۇرعاندا اقش پاريج كەلىسىمىنەن شىققان العاشقى ەل بولىپ ەدى. ال بايدەن بۇل كليماتتى ساقتاۋ مىندەتى جۇكتەلگەن توپتى بىلىكتى, تالاپتى دەپ تانىستىرىپ وتىر. بۇل توپقا سولتۇستىك كارولينانىڭ قورشاعان ورتا ماسەلەلەرىنە جاۋاپتى ميشەل رەگان جەتەكشىلىك ەتەدى.
سونىمەن بىرگە پرەزيدەنت بايدەن كليماتپەن كۇرەس تولىققاندى جۇمىس بولۋى كەرەكتىگىن باسا ايتتى. الداعى كۇندەرى ۇلتتىق قاۋىپسىزدىك كەڭەسى وتىرىسىندا دا بۇل ماسەلەنىڭ تالقىلاناتىنى بەلگىلى بولدى.
پرەزيدەنتكە ايىپپۇل سالىندى
ءچيليدىڭ پرەزيدەنتى سەباستيان پينەرگە ءچيليدىڭ قۇزىرلى ورگاندارى كارانتين كەزىندە ماسكا تاقپاعانى ءۇشىن 3,5 مىڭ اقش دوللارى كولەمىندە ايىپپۇل سالدى.
مۇنداي شەشىم قابىلداۋعا جەلىدەگى سۋرەت سەبەپ بولدى. وقيعا كۋاگەرلەرىنىڭ سوزىنە قاراساق, پرەزيدەنت جاعاجايدا وزىمەن سۋرەتكە تۇسۋگە سۇرانعان كەلىنشەكتىڭ كوڭىلىن قالدىرماي, كەلىسىمىن بەرگەن كورىنەدى. الايدا فوتوسۋرەتتە مەملەكەت باسشىسى ماسكا تاقپاعان.
چيلي جاڭالىق اگەنتتىكتەرىنىڭ حابارلاۋىنشا, پرەزيدەنتكە ايىپپۇل سالۋ تۋرالى شەشىمدى ۆالپارايسو ايماعىنىڭ دەنساۋلىق ساقتاۋ مەكەمەسى قابىلداعان.
بۇل پرەزيدەنت پينەردىڭ قوعامدىق ءتارتىپتى العاش بۇزۋى ەمەس. وعان بۇعان دەيىن دە ءبىر مارتە ەسكەرتۋ جاسالعان ەكەن. ال ەكىنشى ارەكەتى جازاسىز قالمادى. 2 551 450 پەسو ايىپپۇل اقش دوللارىنا شاققاندا 3,5 مىڭ دوللارعا تەڭ.
بريتانيا سينگاپۋرمەن تەگىن ساۋدا كەلىسىمىنە قول قويدى
بريتانيا سينگاپۋرمەن ەركىن ساۋدا كەلىسىمىنە كەلدى. بۇل شەشىم برەكسيت ناتيجەسىندەگى ەكونوميكانى رەتكە كەلتىرۋ ماقساتىندا قابىلداندى دەيدى. قۇجات سينگاپۋردا ەكى ەلدىڭ ساۋدا مينيسترلەرىنىڭ قاتىسۋىمەن قابىلداندى. جاڭا ەرەجە شەڭبەرىندە جىلىنا 18 ملرد ەۋرو كولەمىندە ساۋدا جاسالماق.
بريتانيا ەۋرووداقتان شىققالى ساۋداعا بايلانىستى پروبلەما پايدا بولعانىن, دەرەۋ شەشىم قابىلداۋ كەرەكتىگىن اۋەلدەن ايتىپ جۇرگەن-ءدى. ەندىگى كەزەكتە سينگاپۋر مەن بريتانيا اراسىندا تەحنيكا, كولىك, فارماتسەۆتيكا ونىمدەرى مەن مەديتسينالىق قۇرىلعى اكەلۋگە شەكتەۋ بولمايدى. اتالعان زاتتاردى شەكارادان ەركىن وتكىزۋگە 2024 جىلعا دەيىن رۇقسات بار. بريتانيا ءدال وسىنداي كەلىسىمدى جاپونيامەن دە تۇزگەن. قازان ايىندا قول قويىلعان قۇجات لوندوننىڭ برەكسيتتەن كەيىنگى العاشقى ەكىجاقتى كەلىسىمى رەتىندە حاتتالىپ قالدى.
بريتانيانىڭ ساۋدا ءمينيسترى ليز ترۋسس سينگاپۋرمەن كەلىسىمگە كەلۋ بولاشاقتا جاقسى ناتيجە بەرەدى دەگەن سەنىمىن ءبىلدىردى.
«قازىر بريتانيا قايتادان قارجىلىق ازات ەلگە اينالدى. ءبىز بۇگىندە ەركىن ساۋدا قاتىناسىنا اشىقپىز. سينگاپۋر – بريتانيانىڭ نەگىزگى ساۋدا جانە ينۆەستيتسيالىق سەرىكتەسى. ال سينگاپۋر ءۇشىن بريتانيا ەۋروپاداعى ينۆەستيتسيا باعىتتايتىن بىردەن ءبىر مەملەكەت. كەلىسىم بريتانيالىق كومپانيالارعا سينگاپۋرمەن بايلانىستى نىعايتۋعا مۇمكىندىك بەرەدى», دەدى مينيستر.
دايىنداعان
سۆەتلانا عالىمجانقىزى,
«Egemen Qazaqstan»
