قازىر جولداۋدا جۇكتەلگەن ماڭىزدى مىندەتتىڭ ءبىرى رەتىندە جەر-جەردە بالالاردى قوسىمشا بىلىممەن قامتۋ ءۇشىن جاعداي جاسالىپ جاتىر. شىعارماشىلىق ورداسى ىسپەتتەس جاڭا وقۋشىلار سارايىنىڭ بوي كوتەرگەنى, مادەنيەت, سپورت جانە باسقا دا سالالارداعى ۇيىرمەلەر مەن سەكتسيالار اشىلعانى سياقتى جاڭالىقتارعا قانىعىپ, قۋانىپ قالامىز. ەندى وسىنداي يگىلىكتەرگە اۋىل بالالارى دا بارىنشا قول جەتكىزسە ەكەن دەگەن تىلەگىمىزدىڭ بار ەكەنىن جاسىرمايمىز. ويتكەنى ءوزىمىزدىڭ اۋىلدا مادەنيەت ءۇيى, كلۋبتارى, سپورت الاڭدارى جوقتىڭ قاسى. ءبىزدىڭ اۋىلدا بالالار مەن مۇعالىمدەردىڭ عانا ەمەس, جالپى تۇرعىنداردىڭ باسىن قوساتىن بىردەن-ءبىر نىسان – مەكتەپ. سوندىقتان ءبىز كوتەرەتىن ماسەلەلەردىڭ دەنى مەكتەپتىڭ توڭىرەگىندە بولادى.
«زامانىنا ساي ادامى» دەگەندەي, قازىرگى بالالاردىڭ قىزىعۋشىلىعىن ويناعان ويىنىنان, كورەتىن دۇنيەلەرىنەن اڭعارۋعا بولادى. بۇلدىرشىندەردىڭ «تەمىر ادام», «ترانسفورمەر» سياقتى تەمىر-تەرسەككە سانا بىتىرگەن فيلمدەردى كورىپ, سونداعى كەيىپكەرلەرگە ەلىكتەيتىنىن بايقاپ ءجۇرمىز. ال ونەر-ءبىلىم بار جۇرتتار ەلىكتەپ قانا قويماي, قيالداعىسىن شىنعا اينالدىرىپ, نەبىر ينتەللەكتۋالدى روبوتتاردى قۇراستىرۋدى يگەرىپ جاتىر. قازىر ءبىزدىڭ ەلىمىزدە وسى كوشكە ىلەسۋ ءۇشىن ونىڭ نەگىزىن قالاۋ ءۇشىن مەكتەپتەردە روبوتتەحنيكا ۇيىرمەلەرى ۇيىمداستىرىلىپ جاتىر. ۇلكەن قالالاردا وسى ۇيىرمەگە ارناۋلى سىنىپتار اشىلىپ جاتقانىنان حاباردارمىز. وسى رەتتە اۋىل مەكتەپتەرى دە STEM زەرتحانالارىمەن قامتىلسا, ءبىزدىڭ وقۋشىلارىمىز دا روبوت قۇراستىرىپ, درون ۇشىرۋعا, 3D پرينتەردى مەڭگەرۋگە تالپىنار ەدى. سوندا تالانتتىڭ ءبارى شىعاتىن اۋىلدان بولاشاق تەحنوكراتتار دا ءوسىپ شىعادى.
ءسوزىمىزدىڭ باسىندا ايتقانداي, قوسىمشا ءبىلىم – قولايلى ورتا. بەلگىلى ءبىر سالاعا بەيىمى بار, قىزىعۋشىلىعى ورتاق, كوزقاراسى ۇقساس بالالار ءبىر توپقا جينالىپ, تانىمىن ارتتىرىپ, يدەيا الماسىپ, شىعارماشىلىق داعدىسىن دامىتادى. بۇل ءۇشىن بالالار ۇيىرمەلەردى, فاكۋلتاتيۆ ساباقتاردى ءوز قالاۋى بويىنشا تاڭدايدى. ءبىر وكىنىشتىسى, اۋىل مەكتەپتەرىندە كوبىنە بالانىڭ قالاۋىنا ءمان بەرىلە بەرمەيدى. فاكۋلتاتيۆ ساباقتار بالانىڭ تاڭداۋى بويىنشا ەمەس, ساعاتى از مۇعالىمدەرگە قاراي بولىنەتىنىن جوققا شىعارا المايمىز. ياعني مەكتەپتە ساعاتى جەتپەگەن مۇعالىمدەردىڭ ساعاتىن فاكۋلتاتيۆتەر ەسەبىنەن تولتىرىلاتىن جاعدايلار بار. ناتيجەسىندە, ىزگىلىكتى پاندەردىڭ فاكۋلتاتيۆ ساباعى باسىم بولىپ جاتادى. سونىڭ سالدارىنان بالالار وزدەرى قالاعان قوسىمشا ساباعىنا قاتىسا المايدى, ال ءوتۋى كەرەك قالاماعان فاكۋلتاتيۆتەرگە دۇرىس قاتىسپايدى. قوسىمشا ءبىلىم بەرۋدىڭ ءوز دەڭگەيىندە وتكىزىلمەۋىنىڭ ءبىر ماسەلەسى وسى دەر ەدىم.
وسى ۋاقىتقا دەيىن باسا نازار اۋدارىلىپ, ەسكەرىلە قويماعان قوسىمشا ءبىلىم بەرۋ جۇمىسىن جاقسىلاپ قولعا الاتىن ۋاقىت كەلدى. قوسىمشا ءبىلىمنىڭ ادام كاپيتالىن دامىتۋعا دا ۇلەس قوساتىنى ءسوزسىز. ال ادام كاپيتالى – كەمەل كەلەشەگىمىزدىڭ كەپىلى. سوندىقتان ءبىلىم بەرۋ سالاسىن جەتىلدىرۋ ءۇشىن بارلىق كەم-كەتىگىمىزدى جويۋعا نەمكەتتىلىك تانىتپاۋىز كەرەك.
كۇلزينا ساتباەۆا,
«امانكەلدى» جالپى ورتا مەكتەبى وقۋ ءىسىنىڭ مەڭگەرۋشىسى
تۇركىستان وبلىسى,
كەنتاۋ قالاسى,
نۇرتاس اۋىلى
