13-قاراشادا قازاقستاننىڭ تۇڭعىش پرەزيدەنتى – ەلباسى توراعالىق ەتكەن كەڭەستە قوردىڭ باسقارما توراعاسى احمەتجان ەسىموۆ ۇلتتىق كومپانيانى ينۆەستيتسيالىق حولدينگكە اينالدىرۋ تۇجىرىمداماسىن ۇسىندى. ونىڭ اياسىندا 2028 جىلعا دەيىنگى جاڭارتىلعان دامۋ ستراتەگياسىندا قوردىڭ نەگىزگى ماقساتتارى ايقىندالدى. اتاپ ايتقاندا, ورتا مەرزىمدى كەلەشەكتە «سامۇرىق-قازىنا» جەتەكشى دەربەس ءال-اۋقات قورلارى سەكىلدى ينۆەستحولدينگ رەتىندە جاڭا جۇمىس فورماتىنا اۋىسۋدى كوزدەپ وتىر.
ءلاززات بورانقۇلوۆانىڭ ايتۋىنشا, قوردىڭ الداعى بەس جىلعا ارنالعان دامۋ جوسپارىنىڭ نەگىزگى مىندەتتەرى قارجىلىق تۇراقتىلىقتى قامتاماسىز ەتۋ, كورپوراتيۆتىك ورتالىق پەن قوردىڭ پورتفەلدىك كومپانيالارى وتىمدىلىگىنىڭ جەتكىلىكتى دەڭگەيىن قولداۋ. سپيكەر 2021 جىلى ءال-اۋقات قورى ينۆەستيتسيالىق حولدينگكە اۋىسۋ باعىتىندا بەلسەندى كىرىسەتىنىن جەتكىزدى. جاڭا پورتفەلدىڭ ۇلعايۋىن قامتاماسىز ەتۋ ماقساتىندا بولاشاق ۇرپاق قورىن قالىپتاستىرۋعا بايلانىستى جۇمىس جالعاسىپ, سونداي-اق بىرلەسكەن ينۆەستيتسيالاۋ قاعيداتتارى نەگىزىندە تىكەلەي ينۆەستيتسيالاردى جۇزەگە اسىرۋعا كىرىسپەك.
ونىڭ ايتۋىنشا, بۇل قور پورتفەلىندەگى كوممەرتسيالىق اكتيۆتەردى قالىپتاستىرۋعا مۇمكىندىك بەرەدى. وسىلايشا, 2024 جىلعا قاراي ينۆەستيتسيالىق پورتفەل بەلسەندى باسقارۋعا تولىق كوشىرىلىپ, ونى وڭتايلاندىرۋعا جانە قايتا قۇرىلىمداۋدى جالعاستىرۋعا جول اشىلادى.
كومپانيا وكىلىنىڭ سوزىنە سۇيەنسەك, كەلەر جىلدان باستاپ قور ينۆەستيتسيالاۋدى بەلسەندى تۇردە جۇرگىزەدى. قازىر 12 باسىم سالا انىقتالىپ, ونىڭ ىشىندە اقپاراتتىق تەحنولوگيالار, ينفراقۇرىلىمدىق قۇرىلىس, جاسىل ەنەرگەتيكا, حيميا ونەركاسىبى, دەنساۋلىق ساقتاۋ, ماشينا جاساۋ, لوگيستيكا, اۋىل شارۋاشىلىعى جانە تاۋ-كەن ونەركاسىبى سەكىلدى باعىتتار قامتىلعانىن ايتا كەتكەن ورىندى. بۇل ءتىزىم الەمدىك جانە ايماقتىق ۇردىستەر مەن نارىقتىڭ وزگەرۋىنە بايلانىستى جىل سايىن جاڭارتىلىپ وتىرادى.
ل.بورانقۇلوۆانىڭ ايتۋىنشا, الەمدىك داعدارىس قور توبىنىڭ قارجىلىق كورسەتكىشتەرىنە اسەر ەتتى. بىراق تا «سامۇرىق-قازىنا» وسى جىلدى باستاپقى جوسپارلاردان الدەقايدا جوعارى ءارى ناقتى كورسەتكىشتەرمەن اياقتايدى دەپ بولجانۋدا.
«قالىپتاسقان سىرتقى فاكتورلارعا قاراماستان, 2021 جىلى كومپانيالار توبىنىڭ نەگىزگى ستراتەگيالىق كورسەتكىشتەرى بيىلعى باعامەن سالىستىرعاندا جاقسارۋدا. قوردىڭ تازا اكتيۆتەرىنىڭ قۇنى 2021 جىلى 653 ملرد تەڭگەگە ءوسىپ, 14 ترلن تەڭگەگە جەتەدى. سوڭعى 6 جىلدا ورتاشا جىلدىق ءوسۋ قارقىنى 8,2%-عا, سوڭعى 10 جىلدا 9,1%-عا تەڭ. بولجانعان ءوسىم ماقساتتى تۇردە ايقىندالعان 8% دەڭگەيىنەن اسىپ تۇسەدى», دەدى ل.بورانقۇلوۆا.
2025 جىلعا قاراي قوردىڭ تازا اكتيۆتەرىنىڭ قۇنى 6,9 ترلن تەڭگەگە ارتىپ, 21 ترلن تەڭگەنى قۇرايدى دەپ بولجانىپ وتىر. كەلەسى جىلى كومپانيانىڭ تازا كىرىسى 523 ملرد تەڭگەگە جەتىپ, بۇل بيىلعى كورسەتكىشتەن 22%-عا جوعارى بولاتىنىن ايتا كەتكەن ءجون. الداعى 4 جىلدا تازا كىرىستىڭ جالپى كولەمى 6,2 ترلن تەڭگەگە جەتپەك. كاپيتال تيىمدىلىگىنىڭ كورسەتكىشى 4,7% دەڭگەيىندە جوسپارلانىپ, 2025 جىلعا قاراي 9,1%-عا دەيىن جاقسارادى دەپ بولجانىپ وتىر.
وسىلايشا, ديرەكتورلار كەڭەسى بەكىتكەن دامۋ جوسپارى قوردىڭ 2028 جىلعا دەيىنگى دامۋ ستراتەگياسىنا تولىق سايكەس كەلىپ, ونى ىسكە اسىرۋدى قولدايدى. بۇعان قوسا «سامۇرىق-قازىنا» بيىل باستالعان شىعىستار مەن كۇردەلى سالىمدار دەڭگەيىن باقىلاۋ جونىندەگى جۇيەلى جۇمىستى 2021 جىلى دا جالعاستىرادى.
