جەلتوقسان ايىنان باستاپ مۇنايلى ءوڭىر تۇرعىندارى كۇندەلىكتى تۇتىناتىن سۋ باعاسىن 27 پايىزدىق وسىممەن تولەۋى مۇمكىن.
جەلتوقسان ايىنان باستاپ مۇنايلى ءوڭىر تۇرعىندارى كۇندەلىكتى تۇتىناتىن سۋ باعاسىن 27 پايىزدىق وسىممەن تولەۋى مۇمكىن. ويتكەنى, 1 قازاندا «اتىراۋ سۋ ارناسى» كاسىپورنى سۋ باعاسىن وسىنشا پايىزعا كوتەرۋ جونىندە ۇسىنىس بەرىپتى. سونىمەن بىرگە, كاناليزاتسيا ءتاريفى دە 30 پايىزعا قىمباتتاماق. تابيعي مونوپوليالاردى رەتتەۋ اگەنتتىگىنىڭ اتىراۋ وبلىسى بويىنشا دەپارتامەنتى باسشىسىنىڭ مىندەتىن اتقارۋشى رايحان ميزامعاليەۆا ءدال وسىلاي دەپ ءمالىم ەتتى.
ال «اتىراۋ سۋ ارناسى» كمك باسشىلارى سۋ مەن كاناليزاتسيا تاريفتەرىنىڭ قىمباتتاۋىن سۋ تازارتۋعا ارنالعان حيميالىق رەاگەنتتەردىڭ قىمباتتاۋىمەن ءتۇسىندىرەدى. بيىل ونىڭ باعاسى بىلتىرعىدان 30 پايىزعا ءوسىپ كەتكەن. سول سەبەپتەن, سۋمەن قامتۋشى كاسىپورىن سۋ مەن كاناليزاتسيا ءتاريفىن ءبىر مەزگىلدە وسىرۋگە ۇمتىلىس تانىتۋدا.
جولداسبەك شوپەعۇل,
«ەگەمەن قازاقستان».
اتىراۋ وبلىسى.
