جىلىوي اۋدانى حالقىنىڭ الەۋمەتتىك ءال-اۋقاتى ماسەلەسىنە ەرەكشە نازار اۋدارىلدى. ول قۇلسارى قالاسىنىڭ حالىقتى جۇمىسپەن قامتۋ ورتالىعى مەن حالىقتى الەۋمەتتىك قورعاۋ جانە جۇمىسپەن قامتۋ ءبولىمىنىڭ فرونت-كەڭسەسىنىڭ جۇمىسىمەن تانىستى. بۇگىنگى كۇنى ولار 9552 قىزمەت كورسەتىپ, بۇل 2077 ادامدى جۇمىسقا ورنالاستىرۋعا مۇمكىندىك بەردى.
نىسانداردى ارالاي وتىرىپ, ا. شپەكباەۆ: «تۇتىنۋشىعا باعدارلانۋ جانە ازاماتتارعا قولايلى جاعدايدا قىزمەت كورسەتۋ – قازىرگى زامانعى مەملەكەتتىك اپپاراتتىڭ باسىم مىندەتى. مەملەكەتتىك قىزمەتشىلەر ءار ادامنىڭ سوزىنە قۇلاق اسۋى ءتيىس, ال ازاماتتارعا بيۋروكراتيالىق توسقاۋىل بولماۋى قاجەت», دەپ اتاپ ءوتتى.
مەملەكەتتىك ورگانداردىڭ مۇنداي ترانسفورماتسياسى قوعاممەن بەلسەندى ءوزارا ءىس-قيمىل جاساۋدىڭ جانە مەملەكەتتىك اپپاراتتىڭ ازاماتتار ساۋالدارىنا سەزىمتالدىعىن ارتتىرۋدىڭ باستى شارتى.
بۇگىنگى تاڭدا اتىراۋ وبلىسىندا 45-تەن استام مەملەكەتتىك ورگان مەن مەكەمە فرونت-كەڭسەلەر مەن «open space» فورماتىندا جۇمىس ىستەيدى.
ەلەكتروندىق مەملەكەتتىك قىزمەتتەردى ىڭعايلى الۋدى قامتاماسىز ەتۋ ءۇشىن اۋىلدىق وكرۋگتەر اكىمدىكتەرىنىڭ جانە مەكتەپتەردىڭ عيماراتتارىندا وزىنە-ءوزى قىزمەت كورسەتۋ بۇرىشتارى بار.
جۇمىس ساپارىنىڭ كەلەسى نىسانى – ماحامبەت اۋدانىنىڭ «ازاماتتارعا ارنالعان ۇكىمەت مەملەكەتتىك كورپوراتسياسى» كە اق فيليالىنىڭ جاڭا اكىمشىلىك عيماراتى بولدى. وندا بيىل 23 مىڭنان استام مەملەكەتتىك قىزمەت كورسەتىلدى. ونىڭ ىشىندە وزىنە-ءوزى قىزمەت كورسەتۋ سەكتورى ارقىلى ەلەكتروندىق ونلاين-نۇسقادا 12 مىڭنان استام مەملەكەتتىك قىزمەت كورسەتىلدى.
ولاردىڭ جۇمىسىمەن تانىسقان سىبايلاس جەمقورلىققا قارسى كۇرەس ۆەدومستۆوسىنىڭ باسشىسى ەل باسشىلىعىنىڭ مەملەكەتتىك قىزمەتتەردى ەلەكتروندىق فورماتقا كوشىرۋ جونىندەگى تاپسىرماسىنىڭ ورىندالعانىن اتاپ ءوتتى.
«قازاقستان ەلەكتروندىق ۇكىمەتتى دامىتۋ بويىنشا الدىڭعى قاتارلى 30 ەلدىڭ قاتارىنا كىرەدى. كورسەتىلەتىن قىزمەتتەردىڭ 90%-دان استامى حالىققا ونلاين كورسەتىلەدى. بۇل تۇرمىستىق جەمقورلىقتى بارىنشا ازايتتى», دەدى ا.شپەكباەۆ.
حالىقپەن كەزدەسۋ بارىسىندا اگەنتتىك توراعاسى سىبايلاس جەمقورلىققا قارسى زاڭنامانىڭ وزگەرىستەرى تۋرالى ەگجەي-تەگجەيلى باياندادى. كاسىپكەرلىك قىزمەتكە ارالاسۋ, وعان زاڭسىز قاتىسۋ, پاراقورلىق جانە پاراقورلىققا دەلدالدىق ءۇشىن جاۋاپكەرشىلىكتى كۇشەيتۋگە, سونداي-اق اۋىر جانە اسا اۋىر سىبايلاس جەمقورلىق قىلمىستارى ءۇشىن سوتتالعان ادامدارعا شارتتى تۇردە مەرزىمىنەن بۇرىن بوساتۋدى جويۋعا باسىمدىق بەرىلدى.
ەندى پارا بەرگەنى ءۇشىن سانكتسيا 3 جىلدان 5 جىلعا دەيىن, ايتارلىقتاي مولشەردە (139 مىڭ تەڭگەدەن استام) پارا بەرگەنى ءۇشىن – 5 جىلدان 7 جىلعا دەيىن جانە دەلدالدىق ءۇشىن – 2 جىلدان 3 جىلعا دەيىن ۇلعايتىلدى. ايتارلىقتاي مولشەردە پارا بەرۋ اۋىر قىلمىستار ساناتىنا ءوتىپ, پارا بەرۋشىلەردى شارتتى تۇردە مەرزىمىنەن بۇرىن بوساتۋ مۇمكىندىگىنەن ايىرعاندىعىن ايتا كەتۋ كەرەك. پاراقورلىقپەن بىرنەشە رەت اينالىسىپ, قىلمىستىق توپ قۇرامىندا نەمەسە ءوزىنىڭ قىزمەت بابىن پايدالانا وتىرىپ جاسالعان پاراقورلىققا دەلدال بولعانى ءۇشىن سوتتالعان ادامدار دا وسى ساناتقا ەنگىزىلەدى.
سونداي-اق, ول ازاماتتىق قوعامنىڭ كۇندەلىكتى جەمقورلىقتى جويۋعا جۇمىلۋى مەن جەكە قىزىعۋشىلىعىنىڭ ماڭىزدىلىعىن اتاپ ءوتتى. بۇل ءۇشىن اگەنتتىك «ادالدىق الاڭى» جوبالىق كەڭسەلەرى, ارنايى مونيتورينگتىك توپتارى, اقپاراتتىق-اعارتۋ شتابتار مەن «ادال كومەك», «اشىق بيۋدجەت» سىندى سىبايلاس جەمقورلىققا قارسى جوبالار اياسىندا بارلىق قاجەتتى جاعدايلار مەن قۇرالداردى جاسادى.
ەڭ باستىسى - بۇكىل قوعامنىڭ وڭ وزگەرىستەرگە ىقىلاسى مەن ەركى, سونداي-اق ەلدىڭ ءال-اۋقاتىن دامىتۋعا جەكە ۇلەس قوسۋعا دايىن بولۋى.
