شىمكەنت قالاسىندا وتكەن ءفيلمنىڭ ارناۋلى كورسەتىلىمىنە قالا اكىمى مۇرات ايتەنوۆ قاتىستى. ول ءوزىنىڭ سوزىندە تاۋەلسىزدىك جىلدارى مەملەكەتتىك ءتىلدىڭ قولدانۋ اياسىن كەڭەيتۋ ماقساتىندا قازاق تىلىندەگى ساپالى اقپاراتتىق, اعارتۋشىلىق ونىمدەردىڭ كوبەيىپ جاتقانىن تىلگە تيەك ەتتى.
- ەلباسىنىڭ باستاماسىمەن قۇرىلعان «بولاشاق» باعدارلاماسىنىڭ تۇلەكتەرى ەلىمىزدىڭ زياتكەرلىك الەۋەتىن كوتەرۋدى ماقسات ەتكەن ءتۇرلى جوبالاردى ىسكە اسىرۋدا. «بولاشاق» كورپوراتيۆتىك قورىنىڭ «وزىڭنەن باستا» جوباسى ارقىلى گولليۆۋدتىق فيلمدەرگە قازاق تىلىندە كوركەم دۋبلياج جاسالىنىپ, قازاق كورەرمەندەرىنە كينو-يندۋسترياداعى سوڭعى تۋىندىلاردى انا تىلىندە تاماشالۋعا مۇمكىندىك بەردى. جوبانىڭ ۇلكەن جەتىستىگى رەتىندە قازاق ءتىلىنىڭ Disney ستۋدياسىنىڭ 39-شى ءتىلى جانە Sony Pictures ستۋدياسىنىڭ 7-ءشى ءتىلى بولعانىن ايتۋ قاجەت. كينو سالاسى قازاق تىلىندە دىبىستالعان جاڭا فيلمدەرمەن تولىعىپ قانا قويماي, ەلىمىزدە دۋبلياجداۋ ءىسى دە دامۋدا. بولاشاقتا ءوزىمىزدىڭ وتاندىق تۋىندىنى الەم ەلدەرى ءوز تىلدەرىندە دۋبلياجدايتىن دەڭگەيگە جەتۋىمىز كەرەك, دەدى شاھار باسشىسى.
فيلمدە باستى رولدەردى ايگۇل يمانباەۆا, جانەل ماقاجان سەكىلدى اكتريسالار دىبىستاعان. سونداي-اق, قازاقستاندىق «Nomad Stunts» حالىقارالىق كاسكادەرلەر توبى وينادى. «Nomad Stunts» كاسكادەرلەر توبى اكتيور دجەيسون سكوتت لي كەيىپكەرىنىڭ تاڭداۋلى اسكەري جاساعىن, ال توپ جەتەكشىسى ءارى تريۋك قويۋشى جايداربەك كۇنعوجينوۆ تاڭداۋلى رولدەردىڭ ءبىرىن سومدادى. قاراشا ايىندا جايداربەك كۇنعوجينوۆ «توميريس» تاريحي دراماسىندا تريۋكتەردى قويۋ جۇمىسى ءۇشىن كاسكادەرلىك «وسكار», الەمدىك كاسكادەرلەر اكادەمياسىنىڭ «تاۋرۋس» سىيلىعىن يەلەنگەن.
فيلم «BI Group» كومپانياسىنىڭ دەمەۋشىلىگىمەن جارىققا شىعىپ وتىر. ونى قازاق تىلىندە ivi ونلاين-كينوتەاترىندا دا كورۋگە بولادى.
2011 جىلدان بەرى «وزىڭنەن باستا» — گولليۆۋد فيلمدەرىن قازاق تىلىنە كوركەم دۋبلياجداۋ جوباسى اياسىندا «بولاشاق» كورپوراتيۆتىك قورى «مەلومان» كومپانياسىمەن بىرلەستىكتە جۇزەگە اسىرىپ كەلەدى.
وسىعان دەيىن قازاق تىلىنە «Walt Disney Pictures» ستۋدياسىنىڭ 15 ءفيلمى, «Walt Disney Pictures» جانە «Pixar» ستۋديالارى بىرلەسىپ شىعارعان 6 انيماتسيالىق فيلم, «Sony Pictures» ستۋدياسىنىڭ 6 ءفيلمى, Lucasfilm Ltd. ستۋدياسىنىڭ 2 ءفيلمى, Marvel Studios Inc. ستۋدياسىنىڭ 4 ءفيلمى جانە Bazelevs ستۋدياسىنىڭ 2 ءفيلمى دىبىستاعان.
