الماتى وبلىسىنىڭ جولاۋشىلار كولىگى جانە اۆتوموبيل جولدارى باسقارماسى حابارلاۋى بويىنشا, 20 جەلتوقسان كۇنگى ساعات 19:15-تەن باستاپ اۋا رايىنىڭ ناشارلاۋىنا بايلانىستى (بوران, جولدىڭ ناشار كورىنۋى) «الماتى-وسكەمەن ا/ج – قاپال-اراسان شيپاجايى» وبلىستىق ماڭىزى بار اۆتوجولدىڭ 0-45 شاقىرىمىندا بارلىق كولىكتەرگە جول جابىلدى.
«الماتى وبلىسىنىڭ تجد ازاماتتاردان وسى باعىتتاعى ساپاردان باس تارتۋدى جانە 112 قىزمەتى بەرەتىن سمس حابارلامالاردى نازاردان تىس قالدىرماۋدى سۇرايدى» دەلىنگەن الماتى وبلىستىق تج ءباسپاسوز قىزمەتىنىڭ تاراتقان حابارلاماسىندا.
ۆەدومستۆونىڭ وكىلدەرى الىس جولعا شىققان كەزدە اۋا رايى بولجامىمەن تانىسىپ, توتەنشە جاعدايعا قاجەتتى بارلىق زاتتاردى وزىڭىزبەن بىرگە الىپ ءجۇرۋ كەرەگىن ەسكەرتەدى.
