استاناداعى «تىلەپ قوبىز» سارايىندا ءبيبىماريام وماروۆانىڭ «مەن قازاقتىڭ قىزىمىن» اتتى ءان كەشى ءوتتى.
استاناداعى «تىلەپ قوبىز» سارايىندا ءبيبىماريام وماروۆانىڭ «مەن قازاقتىڭ قىزىمىن» اتتى ءان كەشى ءوتتى.
كىشكەنتاي عانا ءبيبىماريام قازىر 8 جاستا. كىشكەنتاي بولسا دا بۇگىندە تالاي-تالاي جەتىستىكتەرگە جەتىپ, تاۋ شىڭىنداي بيىك بەلەستەرگە ۇمتىلعان جايى بار. جاس ءبۇلدىرشىن بار جوعى التى جاسىندا لوس-اندجەلەس قالاسىندا وتكەن «گولليۆۋد-2012» بايقاۋىنا قاتىستى. «باقىتتى بالالىق شاق» اتتى فەستيۆالىندە قازاق, يسپان, اعىلشىن تىلدەرىندە ءان ايتىپ, اكتەرلىك شەبەرلىگىمەن قالىڭ كورەرمەندى باۋراپ العان ءبيبىماريام 55 ەلدىڭ ورەندەرى ىشىنەن وق بويى وزات شىعىپ, باس جۇلدەنى جەڭىپ الدى. سونىمەن قاتار, بايقاۋ بارىسىندا نيۋ يورك فيلم اكادەمياسىنىڭ ديرەكتورى دەن ماكلەر ورىمدەي جاس قىزدىڭ ونەرىنە ءسۇيسىنىپ, «Talent Baby» اتتى بالالار فيلمىنە تۇسۋگە شاقىردى.
جاس ونەرپاز ءوزىنىڭ تۇڭعىش جەكە ءان كەشىنىڭ شىمىلدىعىن «گولليۆۋد – استانا» انىمەن اشتى. وسىدان بولەك, ءبيبىماريام «مەن قازاقتىڭ قىزىمىن!», اراب تىلىندە «اكە» ءانىن, امەريكالىق ءانشى ۋيتني حيۋستون ورىنداۋىنداعى اتاقتى «I will always love» ءانىن, امەريكالىق جاس ءانشى ءارى اكتريسا سەلەنا گومەزدىڭ ورىنداۋىنداعى «I love you like love song» اندەرىن ورىندادى. كىشكەنتاي جۇلدىزبەن قاتار كەش بارىسىندا №58 «وركەن» بالاباقشاسىنىڭ جاس ونەرپازدارى, «شۇعىلا», «سامۇرىق», «گۇلدەر-اي» بي ۇجىمدارى دا ءوز ونەرلەرىن ورتاعا سالدى.
كونتسەرت بارىسىندا كىشىگىرىم بايقاۋ ۇيىمداستىرىلىپ, 2 ءبۇلدىرشىن مارات وماروۆتىڭ «تالانت» حالىقارالىق ونەر مەكتەبىندەگى ۆوكال ۇيىرمەسىندە تەگىن ءبىلىم الۋ مۇمكىندىگىنە يە بولدى. بۇگىندە بۇل مەكتەپتە بيبىمارياممەن بىرگە ەركەش حاسەن, توميريس بەكمۋرزينا سىندى 150-دەن استام دارىندى بالالار ءوز ونەرلەرىن شىڭداۋدا.
ءبيبىماريام بيىل دۋباي قالاسىندا وتكەن «Dubai Music Festival» حالىقارالىق فەستيۆالىندە 37 مەملەكەتتىڭ جاس ونەرپازدارىنىڭ اراسىندا «حورەوگرافيا» اتالىمىندا ۇزدىك دەپ تانىلدى.
«بولاشاقتا قانداي ارمانىڭ بار؟» دەگەن سۇراققا سۇيكىمدى ءبيبىماريام: «مەن ءان ايتامىن, بي بيلەيمىن, بىراق اكتريسا بولعىم كەلەدى. ارمانىم – «وسكار» سىيلىعىن الۋ», – دەيدى. ەندەشە, كەشتە ايتىلعان بارلىق تىلەكتەر مەن باتالار پەرىشتەلەردىڭ قۇلاعىنا شالىنىپ, ءبيبىماريامنىڭ ارمانى ورىندالسىن!
نۇرزادا كۇمىسبەك,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى.
