قالامى جۇيرىك جۋرناليست قازيحان قابدەلدىڭ قالامگەرلىك, قايراتكەرلىك قىرى ەل گازەتىندە جارقىراي كورىندى. «ەگەمەننىڭ» ءتىلشىسى بولعان 1986-2000 جىلدارى ءوڭىردىڭ الەۋمەتتىك-ەكونوميكالىق پروبلەماسىن جەتە زەرتتەپ, وقىرماندى ەلەڭ ەتكىزەتىن تۇششىمدى ماقالالار جازدى. ءار سالاداعى جىلت ەتكەن جاڭالىقتى جەدەل جەتكىزىپ وتىردى. اسىرەسە فەلەتون جانرىنا كوبىرەك قالام تەربەپ, بيۋدجەت قارجىسىن, قوعام مۇلكىن تالان-تاراجعا سالۋشىلاردى سىن ساداعىنا ءىلدى.
«قازيحان قابدەل – ەشكىمگە بۇيرەگى بۇرا تارتپايتىن, ادىلدىكتى جاقتايتىن قالامگەر. ەشكىمنىڭ الا ءجىبىن اتتامادى. ونىمەن وبلىستىق «اتىراۋ» گازەتىندە دە, وبلىستىق پارتيا كوميتەتىندە دە ارىپتەس بولدىق. كەيىن وبلىستىق فيلارمونيانى باسقارۋعا جىبەرىلدى. بۇل لاۋازىمدى ءمىنسىز اتقارىپ, گازەت رەداكتسياسىنا قايتا ورالدى. «ەگەمەننىڭ» مەنشىكتى ءتىلشىسى بولىپ, ءوڭىردىڭ قوردالانعان ماسەلەلەرىنە ۇكىمەت باسشىلارىنىڭ نازارىن اۋدارعان ماقالالار جازدى. ول كوزىنىڭ تىرىسىندە قالامىن قولىنان تاستامادى. كومەك سۇراپ كەلگەن وقىرماننىڭ مۇڭىن مۇڭدادى, جوعىن جوقتادى. بەينەلەپ ايتقاندا, جۋرناليستىك كاسىبىنە ادالدىعىنان اينىعان جوق» دەپ ەسكە الدى ارىپتەسى, قازاقستاننىڭ قۇرمەتتى ءجۋرناليسى ايتقالي نۇرعاليەۆ.
باس باسىلىمنان زەينەتكەرلىككە شىققان قازيحان قابدەل 2011 جىلى ومىردەن وزعان ەدى.
