مۇنداي زاڭسىزدىقتىڭ جولىن كەسۋ ءۇشىن وكىلەتتى ورگاندار جۇرگىزەتىن رەيدتىك شارالارعا قوعامدا بەلسەندى ازاماتتار دا ارالاسا باستاعاندىعى قۋانتادى.
تراسساعا نۇقسان كەلمەس ءۇشىن اۋىر ماشيناعا تيەلگەن جۇكتىڭ سالماعى 8-16 توننادان اسپاۋعا ءتيىس. الايدا كولىكتىك باقىلاۋ ينسپەكتورى جولدا توقتاتقان كولىكتەردىڭ دەنى 10 تونناعا دەيىن ارتىق جۇك الىپ كەلە جاتقان بولىپ شىعادى. زاڭ بۇزعان ازاماتتارعا اكىمشىلىك حاتتاما تولتىرىلىپ, كولىگى ايىپتۇراعىنا قويىلادى.
«رەيدتىك تەكسەرۋلەرگە شىققان ساتتە اۋىر ماشينالاردىڭ 25 تونناعا دەيىن, ياعني رۇقسات ەتىلگەن شامادان 10 توننا ارتىق سالماقتا جۇك الىپ بارا جاتقانىنىڭ كۋاگەرى بولامىز. اسىرەسە, كۇن جىلىدا جول جۇمسارعان كەزدە مىناداي كولىكتەر قاپتاپ جۇرسە مىنا جولدىڭ نەسى قالادى؟! ساپاسى قايدان بولادى؟! مەملەكەتتىڭ, بيۋدجەتتىڭ قاراجاتىن ءتيىمدى پايدالانۋ دەگەن ۇعىمدى قازىرگى قوعامعا مىناداي زاڭسىزدىقتى تىيماي تۇرىپ قولدانۋعا ءالى ەرتە سياقتى. سوندىقتان وسى باعىتتا مونيتورينگ جۇمىستارىن ءجيى جۇرگىزۋ قاجەت» - دەيدى «ماڭعىستاۋ - ادالدىق الاڭى» جوبالىق كەڭسەسىنىڭ جەتەكشىسى دايراباي ۇسىپباەۆ.
جول ساپاسىن باقىلاۋشىلار تراسساعا بارعان بويدا تەكسەرۋ جۇرگىزۋگە مۇمكىندىك بەرەتىن جىلجىمالى زەرتحانامەن قامتىلعان. جىل باسىنان بەرى وبلىس بويىنشا اۋىر جۇك كولىكتەرى ءجيى جۇرەتىن تراسسالارعا 340 رەت بارىپ كەلدى. ونداعى جولعا توسەلگەن ماتەريالداردىڭ قازىرگى جاي-كۇيىن انىقتاۋ ءۇشىن 1400-دەي سىناما الىندى. ونىڭ 500-گە جۋىعىنان اقاۋلىق تابىلىپ وتىر.
«سىنامالاردىڭ ىشىندە 462-ءسى ساپاعا ساي بولمادى. باس-اياعى 158 اقاۋلىق انىقتالىپ, جول قۇرىلىسىندا جۇرگەن مەردىگەر مەكەمەلەرگە جانە ولاردىڭ جۇمىسىنا تاپسىرىس بەرگەن اۋداندىق اكىمدىكتەردىڭ بولىمدەرىنە ەسكەرتىلىپ, قىزمەتتىك حات جولداندى. ناتيجەسىندە 88 اقاۋلىق قازىرگى تاڭدا تولىق جوندەلدى. قالعاندارىن قالپىنا كەلتىرۋ شارالارى جالعاسىپ جاتقانىن قازىردە كورىپ وتىرمىز» - دەيدى «جول اكتيۆتەرىنىڭ ۇلتتىق ساپا ورتالىعى» رمك ماڭعىستاۋ فيليالىنىڭ زەرتحانا مەڭگەرۋشىسى ساكەن مۇحتاروۆ.
وسى جىلدىڭ قاڭتار-قازان ارالىعىندا كولىكتىك باقىلاۋ ينسپەكتورلارىمەن بىرلەسە جۇرگىزىلگەن رەيدتىك ءىس-شارالار كەزىندە 1207 جۇك كولىگى توقتاتىلىپ, سالماعى تەكسەرىلدى.
زاڭ بۇزۋشىلىققا بارعان جۇك تاسىمالداۋشى تۇلعالارعا قر اكىمشىلىك قۇقىق بۇزۋشىلىق كودەكسىنىڭ 71-ءشى بابىنىڭ 1-ءشى تارماعى جانە 571-ءشى بابىنىڭ 6-شى تارماعىنا سايكەس 33 ملن 90 مىڭ تەڭگە كولەمىندە اكىمشىلىك ايىپپۇلدار سالىنىپ وتىر.
ماڭعىستاۋ وبلىسى
