ينتەراكتيۆتى اناليتيكالىق پورتال قازاقستاننىڭ جانە ونىڭ وڭىرلەرىنىڭ ساۋدا سەرىكتەستەرى, تاۋار پوزيتسيالارى (ساناتتار مەن قايتا بولىنىستەر بويىنشا) بولىنىسىندە اقشالاي كورىنىستە دە, فيزيكالىق كولەمدە دە ساۋدا اعىندارى تۋرالى مالىمەتتەردى جەدەل رەجيمدە الۋعا مۇمكىندىك بەرەدى. رەسۋرس سىرتقى ساۋدا تۋرالى ستاتيستيكالىق اقپاراتقا تولاسسىز تالداۋ جۇرگىزۋ, سونداي-اق رەسمي كوزدەردەن پورتالعا دەرەكتەردى اۆتوماتتى تۇردە ءتۇسىرۋ جانە قۇرىلىمداۋ بولىگىندە جوعارى يكەمدىلىكپەن ەرەكشەلەنەدى.
اناليتيكالىق پورتال Microsoft Power BI نەگىزىندە جۇمىس ىستەيدى. دامۋ بانكى ينۆەستيتسيالاۋ ءۇشىن پەرسپەكتيۆالى سالالار مەن تاۋارلىق تاۋاشالاردى ايقىنداۋ جۇيەسىن قۇرۋ ءۇشىن ءتيىستى باعدارلامالاۋ ءبىلىمى جانە ۇلكەن دەرەكتەردى تالداۋ (big data) جانە ماشينالىق وقىتۋدى ەنگىزۋ (machine learning) بويىنشا جۇمىس تاجىريبەسى بار ماماندى تارتتى.
بولاشاقتا پورتالدىڭ فۋنكتسيونالىن كەڭەيتۋ جانە الەمنىڭ ءتۇرلى ەلدەرىنە ءتۇرلى ونىمدەردىڭ يمپورتى مەن ەكسپورتى تۋرالى اقپارات الۋعا مۇمكىندىك بەرەتىن حالىقارالىق ساۋدا ستاتيستيكاسىنىڭ بازاسىن قوسۋ جوسپارلانۋدا. بانك ءۇشىن قازاقستاننىڭ ەكونوميكاداعى شيكىزاتتىق ەمەس سەكتورلارىنداعى نەگىزگى ساۋدا سەرىكتەستەرى تۋرالى اقپارات قولجەتىمدى بولادى. بۇل قازاقستاندىق ءونىمنىڭ جەكەلەگەن توپتارىنىڭ ەلدەن تىس جەرلەردەگى سۇرانىسى مەن ساۋدا پەرسپەكتيۆالارىن ۇتىمدى باعالاۋعا مۇمكىندىك بەرەدى.
«بۇل پورتال الەۋەتىن ارتتىرۋعا بولاتىن ەكونوميكاداعى قاجەتتى سالالاردى انىقتاۋعا مۇمكىندىك بەرەدى. مىسالى, ەگەر قازاقستاندا بەلگىلى ءبىر ونىمدەردىڭ يمپورتى جىل سايىن وسەتىن بولسا, وندا بۇل ءونىمدى وزىمىزدە شىعارۋدىڭ امالىن ويلاستىرۋ قاجەت دەگەن ءسوز. ەكسپورتقا قاتىستى جاعداي دا وسىنداي. ءبىز مۇنىمەن توقتاپ قالمايمىز, پورتالدىڭ فۋنكتسيالارىن كەڭەيتۋگە جانە ءبىزدىڭ نارىقتاعى شەتەلدىك ينۆەستورلاردىڭ مۇددەلەرىن ەسكەرۋگە مۇمكىندىك بەرەتىن باسقا دا دەرەكقورلاردى قوساتىن بولامىز. كاسىپكەر وسى پورتالعا كىرگەن كەزدە, ول تاۋارلاردى جەتكىزۋ بويىنشا ىشكى نارىقتىڭ پەرسپەكتيۆالارىن, ءاربىر وڭىردەگى قانداي دا ءبىر سالانىڭ دامۋ سەرپىنىن ايقىنداۋعا قانداي يمپورت/ەكسپورت مۇمكىندىك بەرەتىنىن كورەتىن بولادى. پورتالدى ءبىزدىڭ سەرىكتەس بانكتەر, رەسەيلىك, تۇرىك, پاكىستاندىق ارىپتەستەر جانە ت.ب. بەلسەندى پايدالانۋدا», دەپ اتاپ ءوتتى «قازاقستاننىڭ دامۋ بانكى» اق باسقارما توراعاسى اباي سارقۇلوۆ.
قازاقستاننىڭ جانە وڭىرلەردىڭ سىرتقى ساۋداسى تۋرالى ستاتيستيكالىق اقپاراتتى تالداۋدىڭ قولجەتىمدى جانە قولايلى قۇرالى قازىردىڭ وزىندە كاسىپكەرلەرگە بەلگىلى ءبىر تاۋارلاردى جەتكىزۋ بويىنشا ىشكى نارىقتىڭ دامۋ پەرسپەكتيۆالارىن, سىرتقى ساۋدا قىزمەتى پريزماسى ارقىلى سول نەمەسە وزگە سالانىڭ دامۋ سەرپىنىن ايقىنداۋعا مۇمكىندىك بەرەدى.
رەسۋرستىڭ مىندەتى تۇلعالاردىڭ كەڭ اۋقىمىن, ونىڭ ىشىندە بيزنەس قوعامداستىقتى, مەملەكەتتىك ورگانداردى, سىرتقى ەكونوميكالىق قىزمەتكە قاتىسۋشىلاردى, سالالىق ساراپشىلاردى جانە باسقا دا مۇددەلى تۇلعالاردى قازاقستاننىڭ وڭىرلەرىندەگى سىرتقى ساۋدا تۋرالى تەگىن جەدەل ستاتيستيكالىق اقپاراتپەن قامتاماسىز ەتۋ.
«نارىقتا سىرتقى ساۋدانىڭ فيزيكالىق كولەمى بويىنشا اقپاراتقا ۇلكەن سۇرانىس بار, ونىڭ ىشىندە ەكونوميكالىق قىزمەت تۇرلەرىنىڭ جالپى جىكتەۋىشىن (ەقجج) قولدانا وتىرىپ, سىرتقى ساۋداعا تالداۋ جۇرگىزۋگە سۇرانىس بار. قازىرگى قارقىندى دامىپ كەلە جاتقان ەكونوميكالىق جاعدايدا, ونىڭ ىشىندە كوروناۆيرۋستىق پاندەمياعا بايلانىستى, پورتالدىڭ بيزنەس-قاۋىمداستىقتار ءۇشىن ماڭىزدىلىعى, پايداسى مەن وزەكتىلىگى ارتىپ كەلەدى. سوندىقتان ءبىزدىڭ قۇرال ماقساتتى اۋديتوريادا سۇرانىسقا يە بولاتىنىنا سەنىمدىمىز», دەدى قدب باسقارۋشى ديرەكتورى راحىمجان ساتاەۆ.
اناليتيكالىق پورتال بانكتىڭ رەسمي سايتىندا ءۇش تىلدە ورنالاستىرىلعان. ستاتيستيكالىق دەرەكتەر قر ۇلتتىق ەكونوميكا مينيسترلىگى ستاتيستيكا كوميتەتى مەن قر قارجى مينيسترلىگى مەملەكەتتىك كىرىستەر كوميتەتىنىڭ رەسمي ساۋدا ستاتيستيكاسىنىڭ جاڭارتىلۋىنا قاراي اۆتوماتتى تۇردە جاڭارتىلادى.
