بالەكەت ىندەت ەل باسىنا زور قاۋىپ-قاتەرىن توندىرگەن كەزەڭ ءبارىمىز ءۇشىن ۇلكەن سىناق بولدى. وسىناۋ قىسىلتاياڭ شاقتا ەلدىگىمىز بەن بىرلىگىمىزدىڭ سىنالعانى انىق. مەملەكەت تاراپىنان كوپتەگەن ءىس-شارا جۇزەگە اسىرىلىپ, جۇمىسى تۇرالاپ قالعان ازاماتتاردان باستاپ از قامتىلعان وتباسىلارعا دەيىن جان-جاقتى الەۋمەتتىك قولداۋ كورسەتىلدى.
ىندەت قوس بۇيىردەن قىسقان كۇردەلى كەزەڭگە قاراماي, ۇلكەن ءىس اتقارىلدى. وسى ورايدا قازاقستاننىڭ 8 وبلىسىندا اشىلعان وڭالتۋ ورتالىقتارىن ەرەكشە اتاپ وتەر ەدىم. بۇل يگى ءىس ەلباسى نۇرسۇلتان نازارباەۆتىڭ «قامقورلىق» باستاماسىنىڭ اياسىندا جۇزەگە استى. اتالعان ءىس-شارالار ء«بيبى-انا» قايىرىمدىلىق قورىنىڭ بىرنەشە جىلدان بەرى كوتەرىپ كەلە جاتقان ماسەلەلەرىنىڭ دە شەشىلۋىنە ىقپال ەتتى. مۇنداي ورتالىقتار مۇگەدەك بالالاردى دامىتۋعا ۇلكەن سەپتىگىن تيگىزەدى. سوندىقتان وڭالتۋ ورتالىقتارىنىڭ اشىلعانىنا قۋانىپ قالعان انالار قاۋىمى بىزگە حابارلاسىپ, العىسىن جەتكىزۋىمىزدى سۇراپ جاتىر.
بيىل ءبىز باۋىرمالدىعىمىزدىڭ, بىرلىگىمىزدىڭ ايعاعىنداي بولعان كوپتەگەن قايىرىمدى ءىستىڭ كۋاسى بولدىق. ءوزىمىز دە ەلگە دەگەن جاناشىرلىقپەن, قامقورلىقپەن ءبىرشاما ىسكە قولعابىس ەتتىك. قازىر اقتوبە وبلىسى شالقار اۋدانىندا وڭالتۋ ورتالىعىن اشۋعا اتسالىسىپ جاتىرمىز. مەنىڭ انام «جاقسىلىقتى اۋەلى ادال ەڭبەگىڭمەن وتباسىڭا جاساۋعا تىرىس. وتباسىڭنان اۋىسساڭ كورشىڭە, اۋىلىڭا جاسا, ءارى قاراي دەڭگەيىڭ جەتسە, ەلىڭە جاسا» دەپ ايتىپ وتىراتىن ەدى.
قايىرىمدى قوعام – ادىلەتتى قوعام. ادىلدىكتىڭ سالتانات قۇرعانى قوعامدىق تۇراقتىلىققا نەگىز بولادى. ال تۇراقتىلىق بۇل ءبىزدىڭ قاستەرلى تاۋەلسىزدىگىمىزدىڭ باياندى بولۋى دەر ەدىم. قازاقستاننىڭ ۇلكەن وزگەرىستەرگە بەت بۇرعانىنا قۋانامىز. ەل ەكونوميكاسى ىلگەرى جىلجىپ, الەۋمەتتىڭ ءال-اۋقاتى جاقسارىپ, باستامالاردىڭ ءبارى وڭىنان جۇزەگە اسا بەرسىن, تاۋەلسىزدىگىمىز جاساي بەرسىن!
بيبىگۇل يمانعازينا,
ء«بيبى-انا» قايىرىمدىلىق قورىنىڭ پرەزيدەنتى
