سۋرەتتى تۇسىرگەن نۇربەك يحسان
باتىس قازاقستان وبلىسىنىڭ ەڭ ءىرى اۋدانى ءوتىپ بارا جاتقان جىلدى قورىتىندىلاپ, ءار سالادا ۇزدىك ەڭبەك ناتيجەسىن كورسەتكەن جەرلەستەرىن ماراپاتتادى.
پاندەميا اسەر ەتسە دە 2020 جىل ءبىزدىڭ اۋدانىمىز ءۇشىن تابىستى جىل بولدى. اۋداندا قۇرىلىس, ينۆەستيتسيا كولەمى ارتتى. حالىقتىڭ ءال-اۋقاتى تۇراقتى. اۋدان ورتالىعى مەن اۋىلدىق وكرۋگتەردە الەۋمەتتىك نىساندار كۇردەلى جوندەۋدەن ءوتىپ, جاڭا قۇرىلىستار بوي كوتەردى. كوشەلەر جارىقتاندىرىلىپ, اۋىلىشىلىك جولدار جوندەلدى. اۋدان ەكونوميكاسى اۋىلشارۋاشىلىق ءۇشىن قولايلى بولعاندىقتان اگرونەركاسىپ كەشەنى مەن كاسىپكەرلىك سالاسىن دامىتۋدا اۋقىمدى جۇمىستار اتقارىلدى, -دەدى سالتاناتتى جينالسىتا ءسوز العان اۋدان اكىمى قاليار ايتمۇحامبەتوۆ.
بيىل اۋداننىڭ قادىرقۇل, قىزىلجار, كەڭسۋات, بازارتوبە, جامبىل, بيتىلەۋ اۋىلدارى تازا اۋىز سۋمەن قامتىلسا, جايىق, جاڭابۇلاق, ءىلبىشىن اۋىلدارىنا كىرە-بەرىس جولدار كۇردەلى جوندەۋدەن وتكىزىلگەن. سونداي-اق ورال-اتىراۋ كۇرە جولىنان ءبىراز الىس جاتقان العاباس اۋىلىنا اپاراتىن 38 كم جولدىڭ قۇرىلىسى باستالدى. ول كەلەر جىلى تولىق اياقتالادى. سارمان, بيتىلەۋ, اقبۇلاق, ەسىم, تەگىسجول, جاڭاجول, قاراعاي, توعان, جامبىل, ۇشتوبە, بىتىك سەكىلدى شاعىن-شاعىن 11 ەلدىمەكەنگە تابيعي گاز قۇبىرى تارتىلىپ, اۋدان تۇرعىندارىنىڭ 100 پايىزى كوگىلدىر وتىنمەن قامتىلدى.
بيىل جامبىل اۋىلىندا مادەنيەت ءۇيى كۇردەلى جوندەۋدەن ءوتتى. اتامەكەن اۋىلىنداعى مۇراجاي عيماراتىنا كۇردەلى جوندەۋ جۇمىسى ءجۇرىپ جاتىر. چاپاەۆ اۋىلىنداعى 300 ورىندىق اباي اتىنداعى مەكتەپ-گيمنازيانىڭ جاڭا عيماراتى مەن 100 ورىندىق ينتەرناتىنىڭ قۇرىلىسى اياقتالدى. سونىمەن قاتار, العاباس اۋىلىنداعى مەكتەپكە كۇردەلى جوندەۋ جۇرگىزىلدى.
بيىل اقجايىق اۋدانى اقىن جۇبان مولداعاليەۆتىڭ 100 جىلدىق مەرەيتويىن پاندەمياعا قاراماستان ەرەكشە اتاپ ءوتتى. چاپاەۆ اۋىلىندا كاسىپكەرلەردىڭ جانە شارۋا قوجالىقتاردىڭ قولداۋىمەن جۇبان ورتالىعىنىڭ عيماراتى سالىندى. اقىننىڭ عاسىر تويىنا وراي كوپتەگەن ءىس-شارا ءوتتى.
باتىس قازاقستان
