ەكسپوزيتسياعا ەجەلگى جانە ورتاعاسىرلىق تالعار, قويلىق, وتىرار قالالارىندا جۇرگىزىلگەن ارحەولوگيالىق قازبالاردان تابىلعان قۇندى ەكسپوناتتار قويىلعان. مۋزەيدىڭ ەكىنشى زالىنا «دىنارالىق تاتۋلىقتىڭ قالىپتاسۋى. ۇلى جىبەك جولى قالالارىنداعى دىنارالىق ىنتىماقتاستىق پەن بەيبىتشىلىك» اتتى تاقىرىپ بەرىلگەن. وندا باي تاريحىمىز بەن دىنارالىق ىنتىماق شەجىرەسى وتكەن زاماننان سىر شەرتەدى.
شارانىڭ اشىلۋ سالتاناتىندا مەكەمە باسشىسى ولجاس سۇلەيمەنوۆ ءسوز سويلەپ, بۇل مۋزەيدىڭ اسا ماڭىزدى تاريحي قۇندىلىق ەكەنىن اتاپ ءوتتى.
« ۇلى جىبەك جولى ەجەلگى جانە ورتاعاسىرلارداعى ءىرى بايلانىس ارناسى بولا وتىرىپ, تاۋار مەن تەحنولوگيا الماسۋمەن قاتار, ءتۇرلى مادەنيەت, ءداستۇر, يدەيا جانە ءدىني ۇعىمداردىڭ ءوزارا بايلانىسى مەن جاقىندىعىن دامىتتى. ەجەلگى قازاق جەرىندە ءومىر ءسۇرىپ, قىزمەت ىستەگەن ۇلى تۇلعالاردىڭ قۋاتتى ينتەللەكتۋالدىق دەڭگەيى ۇلى جىبەك جولىنىڭ بويىندا الەمدىك دىندەردىڭ, مادەنيەت پەن ونەردىڭ بەرىك ىرگەتاسىن قالادى», دەدى ولجاس ومار ۇلى.
ديرەكتوردىڭ ورىنباسارى ايبەك سىدىقوۆ جاڭا ەكسپوزيتسيانىڭ قۇرىلىمىمەن تانىستىردى. ەكسپوزيتسيادا ۇلى جىبەك جولى بويىنداعى ورتاعاسىرلىق شاھارلار ورىندارىنان تابىلعان قۇندى جادىگەرلەر جيناقتالعان. سونىمەن قاتار ۇلى جىبەك جولى ارقىلى تارالعان دىندەردىڭ تاريحى زاماناۋي اقپاراتتىق تەحنولوگيالار ارقىلى ءۇش تىلدە ۇسىنىلدى.
ەكسپوزيتسيا باعدارلاماسىنان حالىقارالىق ورتالىقتىڭ قىزمەتى, يۋنەسكو جانە قازاقستان حالقى اسسامبلەياسىمەن ىنتىماقتاستىعى تۋرالى مالىمەت تە تىس قالمادى.
