وبلىس اكىمى گۇلشارا ابدىقالىقوۆا مەن قالا اكىمى نۇرلىبەك نالىباەۆ سىرداريا وزەنىنىڭ سول جاعالاۋىنان بوي كوتەرگەن 2 كوپقاباتتى تۇرعىن ءۇيدى پايدالانۋعا بەرۋگە ارنالعان ءىس-شاراعا قاتىسىپ, وندا 80 وتباسىعا جاڭا باسپانا كىلتى تابىستالدى. باسپاناعا يە بولعاندار قاتارىندا مۇعالىمدەر, دارىگەرلەر جانە مادەنيەت سالاسىنىڭ ماماندارى بار.
پاتەر يەلەرىن جاڭا قونىستارىمەن قۇتتىقتاپ, قۇرىلىس سالاسىنداعى ايماقتىڭ جەتىستىكتەرىن اتاپ وتكەن ءوڭىر باسشىسى بيىل قىزىلوردا قالاسىندا 580 پاتەردى قۇرايتىن 15 تۇرعىن ءۇي پايدالانۋعا بەرىلگەنىنە توقتالىپ, جىل اياعىنا دەيىن سىرداريا وزەنىنىڭ سول جاعالاۋىندا 725 پاتەرلىك 15 كوپقاباتتى تۇرعىن ءۇيدىڭ 14-ءى تابىستالىپ, 2021 جىلى سپمك-70 تۇرعىن اۋدانى بويىنشا 13 كوپقاباتتى تۇرعىن ءۇيدىڭ قۇرىلىسى اياقتالاتىنىن ايتتى.
سوڭعى جىلدارى سىر ەلىنىڭ باس شاھارىندا جەكەمەنشىك مەكتەپتەردىڭ قاتارى كوبەيىپ كەلەدى. سونىڭ ءبىر دالەلى مەرەكە اياسىندا پايدالانۋعا بەرىلگەن 500 ورىندىق «زەردە» ينتەللەكتۋالدى مەكتەبى.
جاڭا مەكتەپتىڭ اشىلۋىندا وبلىس اكىمى ءبىلىم ۇياسىنان تاۋەلسىز ەلىمىزدىڭ دامۋىنا ايانباي ۇلەس قوسىپ, سىر ەلىن الەمگە تانىتار زياتكەر ۇرپاق ءبىلىم الىپ شىعادى دەپ سەنىم بىلدىرەتىندىگىن جەتكىزدى.
ينتەللەكتۋالدى مەكتەپ عيماراتى 3 قاباتتان تۇرادى. ءبىرىنشى قاباتتا وقۋشىلار ءۇشىن سپورتزال, بي زالى, اسحانا مەن وقۋ كابينەتتەرى ورنالاسسا, ەكىنشى قاباتتا بالالار دەمالىس الاڭى جانە تەننيس زالى سالىنعان. ال, ءۇشىنشى قابات زاماناۋي ۇلگىدەگى اكت زال, كومپيۋتەر سىنىپقا ارنالعان. جاڭا ءبىلىم ۇياسى 120 ادامدى جۇمىسپەن قامتىعان. 8 مىڭ شارشى مەتر جەرگە ورنالاسقان عيماراتتىڭ اۋلاسىنىڭ جالپى كولەمى 1,6 گەكتاردى قۇرايدى.
زاماناۋي باعىتتا سالىنعان ينتەللەكتۋالدىق مەكتەپتىڭ ەرەكشەلىكتەرىمەن تانىستىرعان ءبىلىم ۇياسىنىڭ قۇرىلتايشىسى سەيتقالي الشىنباەۆ «زەردە - وقۋشىلاردىڭ جارىق تا كەڭ, جاڭا تەحنولوگيالارمەن جابدىقتالعان مەكتەپتە ءبىلىم الۋىنا مۇمكىندىك سىيلايدى» - دەپ, اتاپ ءوتتى.
ايتا كەتەيىك, قىزىلوردا وڭىرىندە 293 مەملەكەتتىك مەكتەپ بولسا, جەكە مەكتەپتەر سانى 8-گە جەتتى.
