قۇرىلىسىنا 100 ملن تەڭگەدەن استام قاراجات جۇمسالعان كەشەندە اۋىل ازاماتتارىنىڭ سپورتپەن اينالىسۋىنا عانا ەمەس, جالپى بوس ۋاقىتىن ءتيىمدى وتكىزۋگە بارلىق جاعداي جاسالعان. بۇل جەردە ۆولەيبول, باسكەتبول, شاعىن فۋتبول الاڭدارىمەن قاتار بيشىلەرگە ارنالعان دا ورىن بار. ءبىر مەزەتتە 120 ادام جاتتىعا الاتىن بۇل كەشەندە بولاشاقتا 16 ادام تۇراقتى جۇمىسپەن قامتىلماق.
مادەني-سپورت كەشەنىنىڭ اشىلۋ سالتاناتىنا باتىس قازاقستان وبلىسىنىڭ اكىمى عالي ەسقاليەۆ, وليمپيادا ويىندارىنىڭ قولا جۇلدەگەرى ەكاتەرينا لاريونوۆا ارنايىلاپ باردى.
- جىل باسىندا مەملەكەتتىك-جەكەمەنشىك سەرىكتەستىكتى نىعايتىپ, كاسىپكەرلەردى تۋعان اۋىلىنا كومەك كورسەتۋگە شاقىرعان ەدىم. تاپسىرماما العاشقىلاردىڭ ءبىرى بولىپ قۇلاق اسقان بەيبىت بايتەنياز ۇلىنا ەلدىڭ جانە ءوزىمنىڭ اتىمنان شىنايى العىسىمدى بىلدىرەمىن. قاسيەتتى تاۋەلسىزدىك مەرەكەسى قارساڭىندا اۋىلىنا وسىنداي تاماشا سىي جاساعان اسانوۆتار اۋلەتىنىڭ ءىسى باسقا ازاماتتارعا دا ۇلگى بولادى دەگەن سەنىمدەمىن. ءبىزدىڭ ءوڭىر دارىندى سپورتشىلارعا كەندە ەمەس. ازيا, الەم چەمپيوندارى مەن وليمپيادا ويىندارىنىڭ جۇلدەگەرلەرى بار. ولاردىڭ كوبى اۋىلدان شىققان. ءدال وسىنداي جاڭا زامان تالابىنا ساي سپورت كەشەنىندە جاتتىققان ورەندەر بولاشاقتا ەل ءۇمىتىن اقتايتىن سپورتشى بولادى دەگەن سەنىم مول, - دەدى عالي ناجىمەدەن ۇلى ءوز سوزىندە.
سوڭعى جىلدارى باتىس قازاقستان وبلىسىندا سپورتقا ەرەكشە كوڭىل ءبولىنىپ كەلەدى. بيىلدىڭ وزىندە ورال قالاسى مەن اۋدانداردا توعىز سپورت كەشەنى قۇرىلىسى ءجۇرىپ جاتىر. جاڭاقالا اۋىلىنداعى سپورت نىسانى جاقىندا عانا پايدالانۋعا بەرىلسە, جىل سوڭىنا دەيىن پودستەپنىي مەن سايحىن اۋىلدارىنداعى كەشەن قۇرىلىسى اياقتالادى.
ءوڭىر باسشىسى جاڭا كەشەنگە سوڭعى ۇلگىدەگى led-ەكران مەن مۋزىكالىق اپپاراتۋرانى سىيعا تارتتى.
- ون جىلدان بەرى اۋىلىما وسىنداي سپورت كەشەنىن سالۋدى ارمانداپ كەلگەن ەدىم. مىنە وعان قول جەتكىزدىم. ەندى اۋىلىمىزدىڭ بالالارى مەن جاستارى وسى جەرگە كەلىپ, بوس ۋاقىتىن ءتيىمدى وتكىزە الادى. حالقىما قۋانىش سىيلاعانىما ءوزىم دە ەرەكشە قۋانىپ تۇرمىن. مەن تەك مادەني-سپورت كەشەنىن تۇرعىزدىم. وسى ىسكە باسقا كاسىپكەرلەر قولدان كەلگەنشە كومەگىن بەردى. ءبىرى كوشە جارىعىن تارتسا, ەندى ءبىرى سپورت قۇرالدارىن سىيلاپ جاتتى. قولعابىس ەتكەن بارشا دوستارىم مەن تۋىستارىما جانە قۇرىلىس جۇمىستارىن جۇرگىزگەن جىگىتتەرگە ريزاشىلىعىم شەكسىز, -دەيدى اتىمتاي كاسىپكەر بەيبىت اسانوۆ.
