وبلىستىق قاج دەپارتامەنتىنە قاراستى كا-168/2 مەكەمەسىن كۇزەتۋگە وتكەن جىلى ۇلتتىق ۇلاننىڭ №6655 اسكەري بولىمىندەگى 1-ءشى اتقىشتار روتاسىنان 55 سارباز جىبەرىلگەن.
"تۇزەۋ مەكەمەسىندەگى تىنىشتىق پەن ءتارتىپتىڭ ساقتالۋى – ەڭ الدىمەن قاراۋىل كۇزەتىندە قالتقىسىز قىزمەت اتقارعان قىراعى جاۋىنگەرلەرىمىزدىڭ ارقاسى. سىزدەر, ءوز ومىرلەرىڭىزگە تونگەن قاۋىپتى ويلاماي, تۇزەۋ مەكەمەسىندەگى ىشكى تۇراقتىلىقتى ساقتاۋدا مىندەتتەرىڭىزدى ادال اتقارىپ, جيناقىلىق پەن اسكەري ءتارتىپتىڭ جاقسى ۇلگىسىن كورسەتتىڭىزدەر. وتانعا ادال بولۋعا اسكەري انت بەرگەن كۇننەن باستاپ, كۇنى-ءتۇنى قىراعىلىق پەن ساقتىقتى, ەرەكشە جاۋاپكەرشىلىكتى قاجەت ەتەتىن وسى قىزمەتتى ادال دا ابىرويمەن اتقارعان سازبازدارىمىز الداعى ۋاقىتتا دا وتانسۇيگىشتىكتىڭ جارقىن ۇلگىسىن كورسەتە بەرەدى دەپ سەنەمىن", دەدى اقتوبە وبلىسى بويىنشا قاج دەپارتامەنتى باستىعىنىڭ ورىنباسارى, ادىلەت پولكوۆنيگى دۋلات جۇماگەلدين.
"تۇزەۋ مەكەمەسىن كۇزەتۋگە جىبەرەر الدىندا كومانديرلەرىمىز ءبىزدى پسيحولوگيالىق جانە كۇشەيتىلگەن اسكەري دايىندىقتان وتكىزدى. ولار ءبىزدى كەز كەلگەن جاعدايعا ءازىر بولۋعا, شاپشاڭ ويلاۋعا جانە تەز قيمىلداۋعا, مورالدىق-پسيحولوگيالىق تۇرعىدان مىقتىلىققا ۇيرەتتى. ءوز باسىم اسكەري مىندەتىمدى تۇزەۋ مەكەمەسىندە اتقارىپ شىققانىما ەش وكىنبەيمىن. ويتكەنى ءبىر جىلدىڭ ىشىندە مەن جيناقىلىققا ۇيرەندىم, ۋاقىتتىڭ قادىرىن ءبىلدىم, ءوز ىسىمە جاۋاپكەرشىلىكپەن قاراۋعا ماشىقتاندىم, باتىل بولا ءتۇستىم. ەڭ باستىسى – وتاندى ءسۇيۋ, ەلگە قىزمەت ەتۋدىڭ ەرەجەسى دە قاراپايىم بولاتىنىنا كوزىم جەتتى. بۇل قوعامدا ادال ءومىر ءسۇرۋ, ادىلەتسىزدىككە توزبەۋ, ءتارتىپ بۇزباۋ, جولداستارىڭدى قادىرلەۋ, جاقىندارىڭدى سىيلاۋ, ومىردە تاڭداعان ماماندىعىڭمەن كاسىبي دەڭگەيگە كوتەرىلۋ, وتباسىن قۇرىپ, جاقسى دا ونەگەلى ۇرپاق ءوسىرۋ", دەدى 1-ءشى اتقىشتار روتاسىنىڭ ساربازى مۇستافا يسمايل ماراپاتتاۋ راسىمىندە.
سالتاناتتى شارانىڭ سوڭىندا كا-168/2 مەكەمەسىنىڭ تاربيە ءىسى جونىندەگى ورىنباسارى, ادىلەت مايورى قانات ماقاتوۆ تە مەكەمە باستىعىنىڭ اتىنان 1-ءشى اتقىشتار روتاسىنىڭ ساربازدارىنا العىس حاتتار تابىستادى.
