سالتاناتتى ءىس-شارا 1 جەلتوقسان - قر تۇڭعىش پرەزيدەنتى كۇنى جانە 16 جەلتوقسان - قازاقستان رەسپۋبليكاسىنىڭ تاۋەلسىزدىك كۇنى ارالىعىندا ۇيىمداستىرىلدى.
مەرەيتويلىق جيىنعا وڭتۇستىك افريكا رەسپۋبليكاسىنىڭ ساياسات جانە قوعام قايراتكەرلەرى قاتىستى. ال ديپلوماتيالىق كورپۋس جانە شەتەلدىك مەملەكەتتەر اتىنان ازيا توبىنىڭ دۋاەينى, فيليپپين ەلشىسى جوزەف انجەلەس, ءازىربايجان, بانگلادەش, بەلارۋس, يندونەزيا, يراك, يران, كۋۆەيت, ماۆريكي, پاكىستان, رەسەي جانە تۇركيانىڭ ەلشىلەرى, بىرىككەن ۇلتتار ۇيىمى ەسىرتكى جانە قىلمىس باسقارماسى افريكا وڭتۇستىك وڭىرىندەگى وكىلى جۇلدىز اقىشەۆا; قازاقستان رەسپۋبليكاسىنىڭ موزامبيكتەگى قۇرمەتتى كونسۋلى دينو فوي; سونداي-اق يۋنۋس ەمرە اتىنداعى تۇرىك ءتىلى جانە مادەنيەتى ينستيتۋتىنىڭ وار-داعى وكىلدىگىنىڭ باسشىلىعى قاتىستى.
اشىلۋ سالتاناتى بارىسىندا قازاقستان رەسپۋبليكاسىنىڭ ەلشىسى قانات تۋمىش پەن وڭتۇستىك افريكا رەسپۋبليكاسىنىڭ حالىقارالىق قاتىناستار جانە ىنتىماقتاستىق ءمينيسترىنىڭ ءبىرىنشى ورىنباسارى ەلۆين بوتەس ءسوز سويلەدى.
قازاقستاندىق ديپلومات ءىس-شاراعا قاتىسۋشىلاردى قازاقستان مەن وڭتۇستىك افريكا اراسىنداعى ەكىجاقتى قاتىناستاردىڭ نەگىزگى باعىت جانە تۇستارىمەن, ءوز ەلىنىڭ سىرتقى جانە ىشكى ساياساتىنىڭ جەتىستىكتەرىمەن تانىستىرىپ, قازاقستان باسشىلىعىنىڭ ماڭىزدى باستامالارىن تىلگە تيەك ەتتى. ول سونداي-اق, قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ 2020 جىلعى 1 قىركۇيەكتەگى قازاقستان حالقىنا جولداۋىنا قاتىستى پىكىرىن ءبىلدىردى.
وار سىرتقى ساياسي ۆەدومستۆوسى باسشىسىنىڭ ورىنباسارى ە.بوتەس ءوزىنىڭ سويلەگەن سوزىندە: «مادەني ديپلوماتيا قازاقستان مەن وڭتۇستىك افريكانىڭ ەكىجاقتى قارىم-قاتىناستاردىڭ دامۋىندا ماڭىزدى تەتىكتەرىنىڭ ءبىرى بولىپ كەلەدى. بۇل تۇرعىدان العاندا, بۇگىنگى ءىس-شارا ۋاقىت, ۇرپاقتار مەن قۇرلىقارالىق ساباقتاستىقتى قامتاماسىز ەتۋمەن بىرگە, جاس بۋىنعا ليدەرلىك قاسيەتتەردى تانىتا وتىرىپ, ولارعا قولداۋىن كورسەتۋدە» دەپ اتاپ ءوتتى.
سونداي-اق تسۆانە قالاسىندا قازاقستاننىڭ وڭتۇستىك افريكا رەسپۋبليكاسىنداعى ەلشىلىگى ءتورت تىلدە – اراب, اعىلشىن, قازاق جانە ورىس تىلدەرىندە شىعارعان ءال-ءفارابيدىڭ ء«مىنسىز مەملەكەتكە ۇمتىلۋ قاجەتتىلىگى تۋرالى عاقليا» اتتى كىتابىنىڭ تۇساۋكەسەرىن وتكىزدى. بۇل تراكتات عۇلاما عالىمنىڭ مەتافيزيكا, ساياساتتانۋ, الەۋمەتتانۋ جانە تەولوگيا قيىلىسىنداعى نەگىزگى جۇمىستارىنىڭ ءبىرى.
بۇل باسىلىم قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ قازاقستاندىق قوعامدىق سانانى جاڭعىرتۋ قاجەتتىلىگى تۋرالى باستاماسى اياسىندا جارىق كورگەنىن دە ايتا كەتكەن ءجون. كىتاپ جاڭا رەداكتسيادا شىعارىلعان, ول قايتا وڭدەلىپ, قازىرگى زامانعا قاراي سايكەستەندىرىلىپ, بەيىمدەلىپتى.
كىتاپ وار-دىڭ ۇلتتىق كىتاپحاناسىنا, جەتەكشى ۋنيۆەرسيتەتتەرىنە, مەكتەپ, ليتسەي مەن كوللەدجدەرىنە سىيعا تارتىلدى.
ءىس-شارانىڭ سوڭىندا, قازاقستان ەلشىسى وڭتۇستىك افريكالىق «ITV» تەلەكانالىنا سۇحبات بەرىپ, وتكىزىلگەن شارانىڭ باستى يدەيالارى تۋرالى بايانداپ, قر مەن وار اراسىنداعى ەكىجاقتى ىنتىماقتاستىعىنىڭ, سونىڭ قاتارىندا مادەني-گۋمانيتارلىق سالاداعى قارىم-قاتىناستارى تۋرالى حابارلادى.
