قىزىلوردا وبلىسىنىڭ باستى ەرەكشەلىگى – بۇل ينجەنەرلىك جۇيەگە كەلتىرىلگەن ەگىس القاپتارى. بۇگىنگى كۇنى وبلىستا 236 مىڭ گەكتار سۋارمالى جەر بولسا, ونىڭ 178 مىڭى ينجەنەرلىك جۇيەگە كەلتىرىلگەن. جىلدا 180 مىڭ گەكتاردىڭ ۇستىندە اۋىل شارۋاشىلىعى داقىلدارى ەگىلەدى. مەملەكەتتىك قولداۋلاردىڭ ارقاسىندا وبلىستىڭ اۋىل شارۋاشىلىعى ءوندىرىسىنىڭ دامۋىندا وڭ ناتيجەلەر قالىپتاستى.
- بيىلعى 10 ايدا اۋىل شارۋاشىلىعى ونىمدەرىنىڭ ءوندىرىسى 128,5 ملرد تەڭگەگە جەتتى. ەسەپتى كەزەڭدە اۋىل شارۋاشىلىعى سالاسىنا تارتىلعان ينۆەستيتسيا 10,6 ملرد تەڭگەنى قۇراپ, وتكەن جىلدىڭ وسى كەزەڭىمەن سالىستىرعاندا كورسەتكىش 1,9 ەسەگە, تاماق ونىمدەرىنە سالىنعان ينۆەستيتسيا كولەمى 1,2 ملرد تگ قۇراپ 1,6 ەسەگە ءوستى.
دەگەنمەن, سوڭعى جىلدارى اۋا رايىنىڭ وزگەرىستەرى مەن سۋ تاپشىلىعى وبلىستا ەگىن شارۋاشىلىعىن ءارتاراپتاندىرۋدى قاجەت ەتىپ وتىر. ەگىس كولەمىن ءارتاراپتاندىرۋ باعىتىندا سوڭعى بەس جىلدا مال ازىقتىق داقىلدار كولەمى 4 مىڭ گەكتارعا, ال, كۇرىشتەن باسقا ءداندى داقىلدار كولەمى 7,5 مىڭ گەكتارعا كوبەيگەنىمەن, ءارتاراپتاندىرۋ جۇمىستارى ءالى دە باياۋ جۇرۋدە. سۋ تاپشىلىعى جاعدايىندا ءبىز نەگىزگى داقىل كۇرىش ەگىستىگىنىڭ كولەمىن بەلگىلى ءبىر دەڭگەيگە دەيىن تۇراقتاندىرىپ, ونىڭ ونىمدىلىگىن ارتتىرۋدى جانە سۋدى ۇنەمدەۋگە مۇمكىندىك بەرەتىن باسقا داقىلدار كولەمىن ۇلعايتۋدى قاراستىرۋىمىز قاجەت, – دەدى وبلىس اكىمى گۇلشارا ابدىقالىقوۆا.
بۇگىنگى كۇنى جاڭبىرلاتىپ, تامشىلاتىپ سۋارۋ جانە اكۆاگەلدى پايدالانا وتىرىپ اۋىل شارۋاشىلىعى ونىمدەرىن وندىرۋگە ەرەكشە نازار اۋدارىلۋدا. وسى باعىتتا جاڭاقورعان اۋداندا «Orbis Agro» كومپانياسى 3 مىڭ گەكتارعا تامشىلاتىپ سۋارۋ ارقىلى قىزاناق, شيەلى اۋدانىندا «تىڭ ءورىس» كومپانياسى 10 مىڭ گەكتارعا جاڭبىرلاتىپ سۋارۋ ادىسىمەن جوڭىشقا, قازالى اۋدانىندا «رزا-اگرو» سەرىكتەستىگى 87 گەكتارعا جاڭبىرلاتىپ سۋارۋ ارقىلى جۇگەرى ەگۋدى قولعا العان.
سونىمەن قاتار, بيىلعى جىلدان باستاپ ءتالىمدى جەرلەر يگەرىلۋدە. كەلەسى جىلى اتالعان جۇمىستاردى اتقارۋعا جاڭاقورعان اۋدانىندا اكۆاگەلدى قولدانۋ ارقىلى 500 گەكتار ماقسارى داقىلى مەن 200 گەكتار جازدىق بيداي ەگىلەدى دەپ جوسپارلانۋدا.
ماجىلىستە سالا عالىمدارى ءارتاراپتاندىرۋ كەزىندە سۋارمالى سۋدى ۇنەمدەۋدىڭ جاڭا تەحنولوگيالارىن ەنگىزۋ, سۋارمالى جەرلەرىنىڭ دەگراداتسياسى جانە ولاردى تومەندەتۋ جولدارى, كۇرىش اۋىسپالى ەگىسىن ءارتاراپتاندىرۋ جانە كۇرىش القاپتارى مەن ەگىستىگىنىڭ جاعدايىنا عارىشتىق مونيتورينگ جۇرگىزۋ ماسەلەلەرىن ءسوز ەتتى.
2021 جىلى ەگىلەتىن داقىلداردىڭ ەگىس كولەمىنىڭ سىزباسى قىزىلوردا قالاسى مەن اۋدان اكىمدىكتەرىمەن جانە ءتيىستى مەكەمەلەرىمەن كەلىسىلىپ, بولىنەتىن سۋ كولەمى ءليميتى شەگىندە جاسالىندى. سىزباعا سايكەس, اۋىل شارۋاشىلىعى داقىلدارىن 187,3 مىڭ گەكتارعا ورنالاستىرۋ مەجەلەنسە, ونىڭ ىشىندە نەگىزگى داقىل كۇرىشتىڭ كولەمى 85,7 مىڭ گەكتاردى قۇراپ وتىر.
جيىن سوڭىندا ايماق باسشىسى سۋ تاپشىلىعى جاعدايىندا ءارتاراپتاندىرۋدى جۇزەگە اسىرۋ ءۇشىن ەگىنشىلىك مادەنيەتىنە عىلىمنىڭ وزىق جەتىستىكتەرىن ەنگىزۋدى جانە ەگىنشىلىك سالاسىن پايدالى كاسىپكە اينالدىرۋ قاجەت ەكەنىن اتاپ ءوتتى.
