انانىڭ جازباسىن وقىعاننان كەيىن اۋداندىق پوليتسيا ءبولىمىنىڭ قىزمەتكەرلەرى از عانا ۋاقىتتىڭ ىشىندە جوعالعان ۇلىن تاۋىپ بەردى. اناسىنىڭ ايتۋىنا قاراعاندا, 41 جاستاعى ۇلىنىڭ بۇرىن ۇيگە كەلمەي قالعان كەزى بولماپتى. سول سەبەپتى دە انا جۇرەگى ەلەگىزىپ, الدەنەگە الاڭداعان. ىزدەپ شىعۋعا ءوزىنىڭ شاماسى بولماعان سوڭ پوليتسيا بولىمىنە قۇلاققاعىس ەتىپ, كومەك سۇراعان. جاعدايدى بىردەن تۇسىنگەن پوليتسيا قىزمەتكەرلەرى كەلىپ ءمان-جايدى بىلگەن سوڭ قارت انانىڭ جوعالىپ كەتكەن ۇلىن ىزدەۋگە جۇمىلا كىرىسكەن.
جەدەل ءارى ساۋاتتى ءىس-ارەكەتتەرىنىڭ ارقاسىندا ءىز-ءتۇزسىز جوعالعان ەر ادام ءبىر تاۋلىكتىڭ ىشىندە تابىلدى. ۇلىنىڭ اماندىعى تۋرالى اناسىنا بىردەن حابارلاندى. قۋانىشى قوينىنا سىيماعان انا استراحان اۋداندىق پوليتسيا ءبولىمىنىڭ قىزمەتكەرلەرى, پوليتسيا كاپيتاندارى ءسالىمجان ەرجانوۆ, ايازبەك تايشىباەۆ, لەيتەنانت اسلان قالمۇقانوۆتارعا اق العىسىن جاۋدىردى. بىلاي قاراعاندا, سونشا كۇردەلى دە ءىس ەمەس, بىراق قاراپايىم ادامداردىڭ جانايقايىنا ءجىتى نازار اۋدارىپ, كومەك قولىن سوزۋ جانە ودان ناتيجە شىعارۋ ايتارلىقتاي دۇنيە.
اقمولا وبلىسى
