سالتاناتتى راسىمنەن كەيىن وتكەن كەزدەسۋدە تاراپتار ساياسي, ەكونوميكالىق جانە مادەني-گۋمانيتارلىق سالالارداعى ەكىجاقتى ىنتىماقتاستىقتىڭ جاي-كۇيى مەن كەلەشەگىن, سونداي-اق كوروناۆيرۋستىق جاعدايداعى حالىقارالىق پروبلەمالاردى تالقىلادى. ەلشى مەملەكەت باسشىسى قاسىم-جومارت توقاەۆتىڭ ارىپتەسىنىڭ اتىنا جولداعان ىزگى تىلەكتەرىن جەتكىزىپ, قازاقستانداعى الەۋمەتتىك-ەكونوميكالىق احۋال تۋرالى, ەلدى ودان ءارى رەفورمالاۋ جانە قازاقستاندىق قوعامدى دامىتۋ جونىندەگى شارالار, سونداي-اق الداعى پارلامەنتتىك سايلاۋعا دايىندىق تۋرالى حاباردار ەتتى.
كەزدەسۋ سوڭىندا وتاندىق ديپلومات ەكىجاقتى ىنتىماقتاستى ودان ءارى نىعايتۋ ءۇشىن بارلىق كۇش-جىگەرىن جۇمسايتىنىنا سەندىردى. ءوز تاراپىنان پرەزيدەنت س. پەنداروۆسكي ەلشىنى سولتۇستىك ماكەدونياداعى ديپلوماتيالىق ميسسياسىنىڭ باستالۋىمەن قۇتتىقتاپ, جۇمىسىنا تابىس تىلەدى.
سول كۇنى ج. ءابدىراشوۆ سولتۇستىك ماكەدونيا جينالىسىنىڭ (پارلامەنتىنىڭ) توراعاسى تالات دجافەريمەن كەزدەسىپ, ەكى ەل اراسىنداعى پارلامەنتارالىق ىنتىماقتاستىق ماسەلەلەرى بويىنشا پىكىر الماستى. تاراپتار زاڭ شىعارۋ سالاسىندا تاجىريبە الماسۋ ماقساتىندا ەكى ەلدىڭ زاڭ شىعارۋشى ورگاندارى اراسىنداعى بايلانىستاردى ىنتالاندىرۋعا ءوزارا مۇددەلى ەكەندىكتەرىن اتاپ ءوتتى.
ج. ءابدىراشوۆتىڭ سولتۇستىك ماكەدونيا سىرتقى ىستەر ءمينيسترى بۋدجار وسمانيمەن كەزدەسۋىندە ەكى ەلدىڭ سىرتقى ساياسي ۆەدومستۆولارى اراسىنداعى ىنتىماقتاستىقتى دامىتۋ ماسەلەلەرى مەن وزەكتى حالىقارالىق تاقىرىپتار تالقىلاندى. سونىمەن قاتار, تاراپتار ەكى مەملەكەت اراسىنداعى ديپلوماتيالىق قاتىناستاردىڭ ورناعانىنا 25 جىل تولۋىمەن قۇتتىقتاۋلارمەن الماستى.
