ونەر • 10 جەلتوقسان، 2020

تۋعان جەر – التىن بەسىگىم

تۇڭعىش پرەزيدەنت – ەلباسى كىتاپحاناسى مۋزەيىندە «تۋعان جەرىم» XV حالىقارالىق بەينەلەۋ ونەرى بايقاۋىنىڭ كورمەسى ءوتتى. اتالعان جوبا جاس سۋرەتشىلەردىڭ شىعارماشىلىق الەۋەتىن ارتتىرۋعا، بالالار شىعارماشىلىعىن ناسيحاتتاۋعا باعىتتالىپ وتىر.

ايا ءومىرتاي

جيىندى اشقان ەلباسى كىتاپحاناسىنىڭ ديرەكتورى ءامىرحان راحىمجانوۆ بيىلعى كەزەڭنىڭ تەك قازاقستاندىقتار ءۇشىن عانا ەمەس، كۇللى الەم حالقىنا وڭايعا سوقپاعانىن، ايتسە دە قالىپتى جاعدايعا بەت بۇرىپ كەلە جاتقانىن تىلگە تيەك ەتتى.

بايقاۋدى ەلباسى كىتاپحاناسى، «بايتا» قورى، «قۇلانشى» ورتالىعى جانە نۇر-سۇلتان قالاسىنىڭ بالالار كوركەمسۋرەت مەكتەپ – يۋنەسكو كلۋبى بىرلەسە ۇيىمداستىردى. قازىلار القاسىنا قازاقستاننان بولەك، رەسەي، تاتارستان، باشقۇرتستان، وزبەكستان، ۋكراينا، ازەربايجان جانە بەلارۋس ەلدەرىنەن 400-گە جۋىق تۋىندى ۇسىنىلدى. جەڭىمپازدارعا ديپلوم مەن ەستەلىك سىيلىق تابىستالدى.

«ونەرلى بالاقايلارعا قولداۋ بىلدىرگەندەرىڭىز ءۇشىن العىس بىلدىرگىم كەلەدى. ءبىز وسى بالالاردىڭ ءبىر ارمانىن ورىندادىق. ەندى ولار ءوز كۇشتەرىنە سەنىپ، ودان ءارى ۇشتالا تۇسەتىندىگىنە كامىل سەنىمدىمىن»، دەپ اتاپ ءوتتى «بايتا» قورىنىڭ جەتەكشىسى سۆەتلانا ماحات.

جوبا جۇمىس ىستەپ كەلە جاتقان 15 جىلدان استام ۋاقىت ىشىندە ءداستۇرلى كەسكىندەمە، گرافيكا، مۇسىننەن باستاپ ساندىك-قولدانبالى ونەردىڭ ءتۇرلى سالالارىنا دەيىن جۇمىستاردى قاراستىردى. جاس تالانتتارعا ولاردىڭ وتان تۋرالى تۇسىنىكتەرىن، ءداستۇر ساباقتاستىعىن، ءوز حالقىنىڭ مادەني ەرەكشەلىگىن كورسەتەتىن تاقىرىپتار ۇسىنىلدى.

«تۋعان جەرىم» بايقاۋىنىڭ ماڭىزدىلىعى مەن تانىمالدىلىعى جايلى 15 جىلدىق تاريحىنىڭ ءوزى ايتىپ تۇر. جىل وتكەن سايىن اۋقىمى كەڭەيىپ، قارقىندى دامىپ كەلەدى. جاھاندىق پاندەمياعا قاراماستان، وسى كورمەنى تۇڭعىش پرەزيدەنت مۋزەيىندە وتكىزۋ ارقىلى ءبىز ونەرگە ەشقانداي تۇساۋ جوق ەكەندىگىنە تاعى ءبىر كوز جەتكىزىپ وتىرمىز»، دەدى «قۇلانشى» زاماناۋي ونەر ورتالىعىنىڭ كۋراتورلىق كەڭەس ءتورايىمى.

بايقاۋ لاۋرەاتتارىنىڭ جۇمىستارى قالىڭ كورەرمەنگە جەلتوقسان ايىندا ۇسىنىلادى. كورمەگە كەلۋشىلەر ءتۇرلى ەلدەردىڭ جاس سۋرەتشىلەرىنىڭ ونەر تۋىندىلارىن كورىپ، تاماشالاي الادى. كورمە 2021 جىلدىڭ 25 قاڭتارىنا دەيىن جالعاسادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز