حابار بەرۋشى 2013 جىلدان بەرى ىزدەۋدە جۇرگەن ايەلدىڭ «جۇمىسشى كەنتىندە» جاسىرىنىپ جۇرگەنى تۋرالى ايتقان. وسىدان سەگىز جىل بۇرىن قالالىق پوليتسەيلەر «گەروين» ەسىرتكىسىن تاراتقان پەتروپاۆل قالاسىنىڭ ءبىر تۇرعىنىنا قاتىستى قىلمىستىق ءىستى تەرگەگەن. تەرگەۋ بارىسىندا قىلمىسقا ونىڭ 1959 جىلى تۋعان اناسىنىڭ قاتىستىلىعى دا انىقتالدى. الايدا تەكسەرۋ بارىسىندا ايەلدىڭ ۇيىنەن بەلگىسىز جاققا جالتارىپ كەتكەن. وعان 2013 جىلى ىزدەۋ جاريالانعان. ەندى سول ايەلدىڭ حابارى شىعىپ وتىر.
پەتروپاۆل قالاسى پب باستىعىنىڭ ورىنباسارى, پوليتسيا كاپيتانى جاسۇلان بالديكوۆتىڭ سوزىنشە, تەكسەرىس بارىسىندا ايەلدىڭ جۇرگەن جەرى تۋرالى جەدەل اقپارات راستالدى. ول «جۇمىسشى كەنتىنىڭ» ورتالىعىندا ورنالاسقان جەكە مەنشىك ۇيلەردىڭ بىرىنەن ۇستالدى. قىلمىستىق جاۋاپكەرشىلىكتەن جالتارۋ ماقساتىندا ول 2012 جىلى قوستاناي قالاسىنداعى الىس تۋىستارىنا كەتكەنىن ايتتى. سوڭعى ءتورت جىلدا - پەتروپاۆلدىڭ «جۇمىسشى كەنتىندەگى» تۋىسىنىڭ ۇيىندە قايتا تۇرا باستاعان. وسى جىلدارى ۇيدەن ەشقايدا شىقپاي, ءتارتىپ ساقشىلارىنان تىعىلىپ جۇرگەن. ايتۋىنا قاراعاندا سوڭعى ءتورت جىلدا العاشقى رەت تانىسىنىڭ ۇيىنەن ءبىر جۇمىسىمەن شىعىپ, بىردەن پوليتسەيلەردىڭ قولىنا تۇسكەن. بىراق ونىڭ بۇل ءسوزى كۇماندى. وسىنشا ۋاقىت ۇيدەن شىقپاۋى مۇمكىن ەمەس. ەگەر جەدەل اقپارات بەرۋشى بولماسا ونىڭ پوليتسيانىڭ قولىنا ءتۇسۋى دە نەعايبىل ەدى.
قازىر ايەل پەتروپاۆل قالاسى ۋاقىتشا ۇستاۋ وقشاۋلاعىشىنا قامالىپ, ۇستىنەن تەرگەۋ جۇرگىزىلۋدە.
