اۋداندىق مادەنيەت ءۇيى عيماراتىنىڭ نەگىزى 1979 جىلى قالانعان. سوڭعى رەت كۇردەلى جوندەۋ جۇمىستارى وسىدان 20 جىل بۇرىن جۇرگىزىلىپتى. وندا 230 ورىنعا ارنالعان كورەرمەن زالى, ءتۇرلى شىعارماشىلىقپەن اينالىساتىن 16 كابينەت جانە سپورت زالى بار. سونداي-اق ورتالىق كىتاپحانا مەن تىلدەردى وقىتۋ ورتالىعى ورنالاسقان.
"كورەرمەن زالى بويىنشا قابىرعاسى مەن توبەسى سىلانىپ, اكتەلگەن بولاتىن. ەدەن اعاشتارى اۋىستىرىلىپ, ورىندىقتارى جاڭارتىلىپ, جابدىقتالدى. بي زالى بويىنشا ەدەنىنە بەتون قۇيىلىپ, لامينات توسەلدى. بي زالى بيشىلەرگە كاسىبي دايىندىق وتكىزۋگە قولايلى بولدى", – دەيدى اۋداندىق مادەنيەت جانە تىلدەردى دامىتۋ ءبولىمىنىڭ باس مامانى قىزىر قازي ۇلى.
جالپى, بيىل اۋدان بويىنشا 4 مادەني نىسانعا كۇردەلى جوندەۋ جۇمىستارى جۇرگىزىلگەن. اتاپ ايتقاندا, وركەن, قىزىلتاڭ جانە قونىسباي ەلدىمەكەندەرىندەگى اۋىلدىق كلۋبتار دا جاڭارتىلدى. بۇل جۇمىستارعا 50 ملن تەڭگەدەن استام قاراجات بولىنگەن.
