Finprom.kz دەرەگىنشە, التىن ۆاليۋتا قورىنىڭ ءوسىمى التىن پورتفەلىنىڭ وسىمىمەن بايلانىستى. بىلتىرمەن سالىستىرعاندا 26,9 پايىزعا ءوسىم بار. بۇل اقشاعا شاققاندا – 23,2 ملرد دوللار. جالپى, 2015 جىلدان بەرى ەل رەزەرۆىندەگى التىن ۇلەسى ۇدايى ءوسىپ كەلە جاتىر. بيىل قازان ايىندا ول 69,1 پايىزعا ارتقان.
"التىن ۇلەسىنىڭ ەداۋىر ۇلعايۋى قر ۇب-نىڭ باعالى مەتالدى بەلسەندى ساتىپ الۋىمەن جانە پورتفەلدى ارتاراپتاندىرۋمەن بايلانىستى. كوروناۆيرۋس پاندەمياسى تۋعىزعان داعدارىس, سونداي-اق ەنەرگەتيكالىق نارىقتاعى بەلگىسىزدىك جاعدايىندا التىنعا ينۆەستيتسيا بۇرىنعىدان دا ماڭىزدى بولا ءتۇستى. بۇل اكتيۆ ۇنەمى جوعارى ءوتىمدى كۇيىندە قالادى, نەسيەلىك تاۋەكەلگە ۇشىرامايدى جانە اسا تاپشى مەتالل بولعاندىقتان ۋاقىت بويىنشا قۇنىن ساقتاپ قالادى. التىن ءتورت نەگىزگى ادىسپەن پورتفەلدى كۇشەيتە تۇسەدى:
· ۇزاق مەرزىمدى پايداعا كەنەلۋگە;
· ديۆەرسيفيكاتور رەتىندە ارەكەت ەتۋ جانە نارىقتىق سترەسس كەزىندە شىعىندى ازايتۋ;
· نەسيە تاۋەكەلىنسىز وتىمدىلىكتى قامتاماسىز ەتۋ;
· پورتفەلدىڭ جالپى تيىمدىلىگىن جاقسارتۋ" دەپ جازادى Finprom.
التىننىڭ ەشقاشان قۇنىن جوعالتپايتىن قۇندى مەتالل ەكەنىنە جىل ساناپ كوز جەتكىزىپ كەلەمىز. 2001-2019 جىلدار ارالىعىندا التىنعا دەگەن الەمدىك ينۆەستيتسيالىق سۇرانىس 14 پايىزعا وسسە, وسى جىلدار ارالىعىندا التىن باعاسى ءتورت مارتە قىمباتتاعان. جالپى, التىن الەمنىڭ دامىعان ەلدەرىندە رەزەرۆتىڭ نەگىزگى بولىگىن قۇرايدى. ماسەلەن, اقش رەزەرۆىندەگى التىن ۇلەسى 79,4 پايىز (8,1 مىڭ توننا) بولسا, گەرمانيادا – 76,6 پايىز (3,4 مىڭ توننا), يتاليادا – 71,1 پايىز (2,5 مىڭ توننا), فرانتسيادا – 66,7 پايىز (2,4 مىڭ توننا). بۇل ەلدەر التىن قورى بويىنشا كوشباسشى مەملەكەتتەر بولىپ سانالادى.
ال قازاقستان الەمدەگى التىن قورى بويىنشا 13-ورىندا. سالماقپەن ەسەپتەگەندە ەلىمىزدە 383,3 توننا التىن قورى بار. سوڭعى بەس جىلدا ۇلتتىق بانك 215,2 توننا التىن ساتىپ العان. سونداي-اق بيىل ءۇشىنشى توقساندا قازاقستان التىن ساتىپ الۋ بويىنشا توپ-5 ەلدەر قاتارىنا كىردى. پورتفەلدى التىننىڭ پايداسىنا ءارتاراپتاندىرۋ ەلدە التىن ۆاليۋتا قورىن ساقتاپ جانە ۇزاق مەرزىمدى پايدا الىپ كەلۋگە مۇمكىندىك بەرگەن.
