الماتىلىق قۇقىق قورعاۋشىلار تاياۋدا وسىنداي ءبىر شيكىلىكتىڭ شەتىن بايقاپ, جاۋاپكەرشىلىگى شەكتەۋلى سەرىكتەستىكتىڭ بىلدەي ءبىر ديرەكتورىن اسا ءىرى كولەمدە الاياقتىق جاسادى دەگەن كۇدىكپەن ۇستادى. پوليتسيا دەپارتامەنتى ءمالىم ەتكەندەي, كۇدىكتى قارجىلىق ساۋات ارتتىرۋ بويىنشا سەمينارلار وتكىزىپ, وزىنە يمانداي ۇيىعان جۇرتتى قارجى كوزىن پايدالى اكتسيالاردا ساقتاۋ كەرەك دەپ سەندىرگەن. قازىرگى تاڭدا ونىڭ قىلمىستىق ارەكەتىنەن زارداپ شەككەن 725 ادام انىقتالىپ وتىر. سونىمەن قويماي ول بيرجالىق ساۋدامەن اينالىساتىن جالعان كومپانيالار مەن سايتتار ازىرلەۋمەن شۇعىلدانىپتى.
– كۇدىكتى ايەل مۇنداي ارەكەتىمەن ءىس جۇزىندە ۇزاق ۋاقىت اينالىسقان ادام رەتىندە ادەمى جانە ساۋاتتى سويلەگەندىكتەن, كەلۋشىلەر وعان سەنگەن. الدانعان ازاماتتارعا ول اكتسيونەر بولۋدى جانە بيرجالىق ساۋدالىق اكتيۆتەرگە ينۆەستيتسيالاۋ ارقىلى اقشالارىن كوبەيتۋدى ۇسىنعان. جوسپار بويىنشا سالىمشىلار سالىنعان قاراجاتتان 40% پايدا الۋى كەرەك بولاتىن. يدەيانى جۇزەگە اسىرۋعا ۆيرتۋالدى پلاتفورما قاجەت بولعان جانە ول ءۇشىن «ينۆەستورلارعا» لوگين مەن پارول بەرىلىپ, ەلەكتروندى ءاميان تىركەلگەن «itrade» سايتى قولدانىلعان. ولار ءىس جۇزىندە وزدەرى سالعان قاراجاتتىڭ جانە الىنعان كىرىستىڭ سوماسىن كورگەنىمەن, بۇل تەك مونيتورداعى ساندار عانا ەدى. ينۆەستيتسيا بەلسەندى «قارجىگەردىڭ» قالتاسىنا ءتۇسىپ وتىرعان, – دەيدى الماتى قالالىق پوليتسيا دەپارتامەنتى تەرگەۋ باسقارماسى باستىعىنىڭ ورىنباسارى مۇحامەدالى سەيسەن ۇلى.
تەرگەۋ بارىسىندا ازاماتتاردىڭ ينۆەستيتسيا رەتىندە 500-دەن 30 مىڭ اقش دوللارىنا دەيىن اقشا سالعانى انىقتالدى. سالىمشىلاردىڭ ەشقايسىسى ۋادە ەتىلگەن سومانى الا الماعان. قارجىلىق ساۋاتتى ۇيرەتىپ جۇرگەن ازاماتشا باستاپقىدا الىنعان اقشانى تولەۋدى جانە قايتارۋدى جوسپارلاماپتى دا. قۇزىرلى ورىننىڭ بولجامىنشا, ونىڭ قىلمىستىق ارەكەتىنەن 2019 جىلدىڭ قاڭتارىنان باستاپ جابىرلەنۋشىلەرگە جالپى سوماسى 180 مىڭ دوللاردان استام ماتەريالدىق شىعىن كەلگەن.
ء«ىس جۇزىندە زارداپ شەككەن ازاماتتاردىڭ سانى الدەقايدا كوپ بولۋى, كەلگەن شىعىن مولشەرى بۇدان دا جوعارى بولۋى مۇمكىن. كۇدىكتى سايتتا جوعارى كىرىستى پايدا تاپقىسى كەلەتىندەردى بەلسەندى پايدالانعان. قازىرگى تاڭدا قىلمىستىق كودەكستىڭ 190-بابى 4-بولىگىنىڭ 2-تارماعىمەن سوتقا دەيىنگى تەرگەۋ ءجۇرىپ جاتىر. بۇرىن وسىعان ۇقساس قىلمىستارى ءۇشىن قىلمىستىق جاۋاپكەرشىلىككە تارتىلعان, 1974 جىلى تۋعان ازاماتشا الماتى قالاسىنىڭ ۋاقىتشا ۇستاۋ يزولياتورىنا قامالدى», دەپ مالىمدەدى تەرگەۋ باسقارماسىنىڭ وكىلدەرى.
الماتى
