ەلىمىزدىڭ تۇڭعىش پرەزيدەنتىنىڭ ساياساتى ءاربىر حالىقتىڭ قىمباتتى دا قاسيەتتى ءتىلى, مادەنيەتى مەن سالت-داستۇرلەرىنىڭ دامۋىنا باعىتتالعان. سونداي سارابدالدىق ناتيجەسىندە تاتۋلىق پەن تۇراقتىلىق جونىنەن ءبىز الەمنىڭ كوپتەگەن ەلدەرىنە ۇلگى بولىپ وتىرمىز. «ءبىز ءبۇكىل قازاقستاندىقتاردىڭ باسىن بىرىكتىرەتىن باستى فاكتور – مەملەكەتتىك ءتىل – قازاقتاردىڭ تۋعان ءتىلىن دامىتۋ ءۇشىن بارلىق كۇش-جىگەرىمىزدى جۇمساۋىمىز كەرەك» دەگەن ەلباسىنىڭ قازاقستان حالقىنا جولداۋىنداعى سوزدەرى بۇگىنگى ومىرىمىزدەن شىنايى كورىنىس تاۋىپ جاتقاندىعىنا ەرەكشە قۋانىشتىمىز.
ەلىمىزدىڭ تۇڭعىش پرەزيدەنتىنىڭ ساياساتى ءاربىر حالىقتىڭ قىمباتتى دا قاسيەتتى ءتىلى, مادەنيەتى مەن سالت-داستۇرلەرىنىڭ دامۋىنا باعىتتالعان. سونداي سارابدالدىق ناتيجەسىندە تاتۋلىق پەن تۇراقتىلىق جونىنەن ءبىز الەمنىڭ كوپتەگەن ەلدەرىنە ۇلگى بولىپ وتىرمىز. «ءبىز ءبۇكىل قازاقستاندىقتاردىڭ باسىن بىرىكتىرەتىن باستى فاكتور – مەملەكەتتىك ءتىل – قازاقتاردىڭ تۋعان ءتىلىن دامىتۋ ءۇشىن بارلىق كۇش-جىگەرىمىزدى جۇمساۋىمىز كەرەك» دەگەن ەلباسىنىڭ قازاقستان حالقىنا جولداۋىنداعى سوزدەرى بۇگىنگى ومىرىمىزدەن شىنايى كورىنىس تاۋىپ جاتقاندىعىنا ەرەكشە قۋانىشتىمىز.
دەمەك, مەملەكەتتىڭ اتا زاڭىن سىيلايتىن ءاربىر ازامات ۇلتىنا, تەگىنە قاراماي, قازاقشا ۇيرەنۋگە, ءىس-قاعازدارىن جۇرگىزۋگە مىندەتتى. ادام ءتىل مادەنيەتىن وقۋ-تاربيە ارقىلى سانالى تۇردە ۇيرەنەدى. مىنە, وسى بىلىكتى ۇسىناتىن, ءتىل زاڭدىلىقتارىن جۇيەلى تۇردە ۇيرەنەتىن ورىن – بالاباقشا. قازىرگى ۋاقىتتا بالاباقشامىزدا قازاقستانداعى تىلدەردى قولدانۋ مەن دامىتۋدىڭ باعدارلاماسى اياسىندا اۋقىمدى جۇمىستار اتقارىلۋدا.
بارلىق وقۋ-تاربيە جۇمىستارى, ءىس قاعازدارى مەملەكەتتىك تىلدە جۇرگىزىلەدى. پەداگوگيكالىق كادرلار ۇجىمىنداعى جانە بالالار اراسىنداعى ءىس-شارالار انا تىلىندە ايشىقتالادى. تاربيەشىلەرىمىز شىعارماشىلىق ىزدەنىسپەن جۇمىس ىستەۋدە «انا ءتىلدىڭ ايبىنى», «ءتىل قادىرى», «شەشەندىك سوزدەر», «بالالار ادەبيەتى», «مەنىڭ وتانىم – قازاقستان» دەگەن تاقىرىپتار ءتالىم-تاربيەمىزدى تاعىلىمدى ەتە تۇسۋدە.
ءبىزدى قالامىزدا قازاق بالاباقشالارى, قاتارى جىلدان-جىلعا كوبەيىپ كەلە جاتقانى قۋانتادى. تاۋەلسىزدىكتىڭ ارقاسىندا كوپتەگەن ورىس ءتىلدى جانە ارالاس بالاباقشالار تازا قازاق بالاباقشالارى بولىپ وركەن جايۋدا. دۇنيە ەسىگىن اشقان ءسابيدىڭ شىر ەتكەن داۋىسى قانداي عاجاپ بولسا, ونىڭ بالاباقشاعا كەلگەننەن كەيىنگى پاك سەزىممەن, ءتاتتى سوزىمەن قازاقستان رەسپۋبليكاسىنىڭ گيمنىن شىرقاپ ايتۋىنىڭ ءوزى سونداي شەكسىز قۋانىش ەمەس پە. وسىنداي عاجاپتى ولارعا نۇرسۇلتان اتالارى سىيلاپ وتىر.
انا ءتىلىمىزدى قاستەرلەپ, قادىرلەۋ پارىز ءارى مىندەت. ولاي بولسا, ۇلتتىق يدەولوگيامىزعا باسىمدىق بەرىپ, بوتەن ءتىلدىڭ كولەڭكەسىندە قالدىرماي, نامىسىمىزدى ەشكىمنىڭ تابانىنا تاپتاتپاي وتانىمىزدىڭ يگىلىگىنە اينالۋىنا بار كۇشىمىزدى سالايىق, ارىپتەستەر دەگىم كەلەدى. تاۋەلسىزدىك جىلدارىنداعى قازاق ەلىن بار جاھانعا تانىتقان ەلباسى تاعىلىمى ءبىزدى وسىنداي ورنەكتى ونەگەگە شاقىرادى.
باعدات بەكجانوۆا,
بوستاندىق اۋدانىنداعى №68 ساناتوريالىق-بوبەكجاي بالاباقشاسىنىڭ مەڭگەرۋشىسى.
الماتى.
مەن باقىتتىمىن!
از عانا جىلداردىڭ ىشىندە قازاقستاندى دۇنيەجۇزىنە تانىتقان, بۇرىن بوساعاسىنان دا سىعالاتپايتىن الپاۋىت ەۋروپالىق ەلدەرمەن تەرەزەمىزدى تەڭگەرگەن ەلباسىمىز نۇرسۇلتان ءابىش ۇلى نازارباەۆتىڭ بارلىق جولداۋلارىندا ءبىزدىڭ باستى بايلىعىمىز – ادام, سوندىقتان دا رەسپۋبليكا حالقىنىڭ ورتا جاسىن جەتپىسكە جەتكىزۋىمىز كەرەك دەگەنىمەن ءبارىڭىز دە تانىس بولارسىزدار. قازىر مەنىڭ جاسىم جەتپىس ەمەس, سەكسەن ەكىدەن استى. بۇل كۇندە نەمەرەدەن شوبەرە ءسۇيىپ وتىرعان قارت اجەمىن. وتكەن عاسىردىڭ الپىس ەكىنشى جىلىنان باستاپ پارتيا, سوۆەت قىزمەتكەرى بولىپ, 1970 جىلى ويىل اۋداندىق پارتيا كوميتەتىنىڭ حاتشىسى بولا ءجۇرىپ رەسپۋبليكالىق دارەجەدەگى زەينەتكەرلىككە شىقتىم. قازىر اقتوبە قالاسىنىڭ تۇرعىنىمىن. ءبىزدىڭ وبلىسىمىزدا مەنىڭ قۇرداستارىم مىڭداپ سانالادى. قاجەت بولسا الدى توقساننان اسقان اعالارىم مەن جەڭگەلەرىم دە جەتكىلىكتى. ءسوزىم دالەلدى بولۋ ءۇشىن سولاردىڭ ەكى-ۇشەۋىن اتاپ كەتەيىن. ولار – بيىل توقساننىڭ ەكەۋىنە شىققان جەڭگەم سۋقاشەۆا قاليما, بيىل توقسان جاسىن تويلاعان ويىلدىق اسقاروۆا ءبيبى مەن شەريازدانوۆا ءماريالار. ءبىزدىڭ بۇلايشا كوپ جاساۋىمىز اقتوبە وبلىسى الەۋمەتتىك-ەكونوميكالىق دامۋ جاعىنان رەسپۋبليكا بويىنشا الدىڭعى بەستىكتىڭ قاتارىندا بولۋىنىڭ, حالىقتىڭ الەۋمەتتىك جاعدايىنىڭ جاقسارۋى مەن جوعارعى دارەجەلى حيرۋرگ قايرات سابىر باسقارىپ وتىرعان اق حالاتتى ابزال جانداردىڭ ارقاسى.
ەلباسى تاپسىرماسى بويىنشا وبلىس كولەمىندە سالىنۋعا ءتيىستى بەس ەمحانانىڭ بىرەۋى ويىل اۋدانىندا, قالعان تورتەۋى قالادا سالىنىپ ءبىتىپ, پايدالانۋعا بەرىلگەن ەدى. وسى ەمحانالاردىڭ ءبارى دە جيىرما ءبىرىنشى عاسىردىڭ سىرقاتتاردى انىقتايتىن, ەمدەيتىن تەحنيكالارىمەن تۇگەل جابدىقتالعان. وسى ەمحانالاردىڭ ءبارىنىڭ دە ءدام-تۇزىن تاتىپ, ەمدەلىپ شىعىپ ءجۇر ەدىم. جاس ۇلعايىپ بويدان قۋات ازايعان سوڭ ادام اۋرۋشاڭ بولا ما, سولار ازداي-اق, وتىمدە تاس پايدا بولدى. كارى دەنەگە اۋرۋدىڭ قاي-قايسىسى دا جاقسى ەمەس قوي. وتىمدەگى تاس ەكى كۇننىڭ بىرىندە الىپ ۇرىپ, تاماق ىشۋدەن, ءجۇرىپ-تۇرۋدان قالدىم. ەندى كارى كىسىگە كىم وتا جاسار دەپ كۇدەر ۇزگەندە, بالالارىم حابارلادى ما, قايرات سابىر: – اپاي, قورىقپاڭىز, تاستى الىپ تاستايمىز! – دەمەسى بار ما...
اقىرى جانىم قينالعان سوڭ قالا سىرتىنداعى وبلىستىق ەمحانانىڭ جالپى وتا جاساۋ بولىمىنە جاتتىم. قايرات سابىر باستاعان وتاشى مارات جۇماباەۆ وتا جاساپ, وتتەگى تاستى الىپتى. وتادان كەيىن قولىما ۇستاتقاندا قاتتى تاڭعالدىم. تاس بىرەۋ ەكەن دەسەم, بۇرشاقتىڭ كولەمىندەي جەتەۋ بولىپ شىقتى. قازىر تاستان قۇتىلدىم, دەنساۋلىعىم جاقسى, دارىگەرلەردىڭ ايتۋىمەن ديەتا ساقتاپ ءجۇرمىن. مىڭ كۇنگى جۇماقتان ءبىر كۇنگى تىرلىك ارتىق دەگەندەي, ومىرگە انامنان جاڭا تۋىپ كەلگەندەي بولدىم. قايرات سابىرعا, ونىڭ قاراماعىنداعى وتاشىلارعا ايتار العىسىم شەكسىز.
مەن رەسپۋبليكالىق دەنساۋلىق ساقتاۋ مينيسترىنەن اقتوبە وبلىستىق دەنساۋلىق ساقتاۋ باسقارماسىنىڭ حالىق ءۇشىن اتقارىپ جاتقان ەڭبەكتەرىن كوپكە جاريا ەتىپ, ولاردىڭ تاجىريبەسىن ەل كولەمىنە تاراتۋدى وتىنەر ەدىم. ەلباسىمىزدىڭ قاناتتى قامقورلىعىنا بولەنگەن ارداگەر رەتىندە ءوزىمدى باقىتتى ادام سەزىنەمىن. ءبارىمىزدىڭ باسىمىزدان باقىت كەتپەسىن.
قارلىعا كەرەيقىزى,
رەسپۋبليكالىق دارەجەدەگى زەينەتكەر.
اقتوبە.
وركەندەۋ, دامۋ جولىن سالعان
«...جالعىز جەر بايلىعىنا سەنىپ قالۋعا بولمايدى.
ەڭ الدىمەن, ەل بايلىعىنا سەنۋ كەرەك.
ەل بايلىعى دەگەن نە؟ ول – ءبىلىم, ول – جاڭا تەحنولوگيا, ول – وسى زامانعى ينفراقۇرىلىم, ول – بارىنەن بۇرىن وتانشىلدىق سەزىم, قازاقستاندىق پاتريوتيزم».
ن.ءا.نازارباەۆ.
تاۋەلسىز قازاقستاننىڭ ىرگەتاسىن قالاپ, شەكاراسىن شەگەلەپ, بولاشاققا باعىت-باعدار بەرگەن تۇڭعىش پرەزيدەنتتىڭ حالىق الدىنداعى ەڭبەگى ۇشان-تەڭىز. عاسىرعا بەرگىسىز جيىرما ەكى جىلدىڭ ىشىندە قازاق دەگەن ۇلتتى, قازاقستان اتتى مەملەكەتتى بۇۇ قۇرامىنداعى بارلىق مەملەكەت تۇگەل مويىندادى, تاۋەلسىزدىگىن تانىدى. الەمنىڭ 150-دەن استام ەلىمەن ديپلوماتيالىق قارىم-قاتىناس ورناتتى. ەلىمىز ەلدىگى مەن ەرلىگىن كورسەتتى. قازاق حالقى ەگەمەندىگىن الىپ, تاۋەلسىزدىككە قول جەتكىزگەندە ءوز الدىمىزعا ەل بولا الاتىندىعىمىزعا كۇماندانعان جاندار دا بولعان. بىراق ار-نامىستى تۋ ەتكەن ەلباسىمىز بەن ۇكىمەت باسىنداعى ەل ءۇشىن ەڭبەك ەتكەن اعالارىمىزدىڭ ايانباي ەڭبەك ەتۋى وسى نۇرلى كۇندەرگە جەتكىزدى. تاۋەلسىزدىك اياسىندا ەل ءۇشىن جاعىمدى جاڭالىقتار مەن ەلەۋلى وزگەرىستەر مول بولعانى ءسوزسىز.
ەل پرەزيدەنتىنىڭ بارلىق قىزمەتى, بارلىق الەۋمەتتىك-ەكونوميكالىق رەفورمالار تەك حالىق يگىلىگى ءۇشىن جاسالدى. وسىناۋ ۋاقىت ىشىندە ەكونوميكا, ساياسات, الەۋمەتتىك جانە ءبىلىم, عىلىم سالالارىندا وراسان زور جەتىستىكتەرگە قول جەتكىزدىك, وسىلاردىڭ بارلىعى ن.نازارباەۆتىڭ ەڭبەگىمەن تىكەلەي بايلانىستى. بۇكىل الەم كەزىندە كەڭەس وداعىندا ارتتا قالعان مەملەكەتتىڭ ءبىرى سانالعان قازاقستاننىڭ قازىر وسىنشاما وراسان تابىستارعا جەتكەنىنە قايران قالادى. ەلىمىزدىڭ جاھاندىق رەيتينگتە الەمدىك وزىق دامىعان ەلدەر ىشىندە 50-ءشى تۇعىرعا كوتەرىلۋى بىزگە زور سەنىم مەن جىگەر بەرەدى. قازاقستاندا سوڭعى جىلداردىڭ وزىندە قانشاما وقۋ ورىندارى, اۋرۋحانالار سالىنۋدا. قازاقستاندىقتاردىڭ ءومىر ساپاسىن جاقسارتۋعا باعىتتالعان قانشاما الەۋمەتتىك باعدارلامالار جۇزەگە اسۋدا. ەل پرەزيدەنتى حالىقپەن ءجيى كەزدەسۋلەر وتكىزىپ, بۇقارانىڭ قولداۋى مەن سەنىمى ارقاسىندا مەملەكەتىمىزدىڭ تۇراقتىلىعى جانە وركەندەۋىنە قول جەتكىزدى. كوشباسشى مەملەكەتتەر قاتارىنان كورىنۋ باعىتىنداعى تىڭ يدەيالارى مەن باستامالارىن جۇزەگە اسىرىپ كەلەدى.
بۇگىنگى تاڭدا ەلىمىزدىڭ تابىستى دامۋىن قامتاماسىز ەتەتىن, ءاربىر ازاماتتىڭ بىلىمگە دەگەن سۇرانىسى مەن قىزىعۋشىلىعىن قاناعاتتاندىراتىن مەملەكەت پەن قوعام اراسىنداعى جاڭا ءوزارا قارىم-قاتىناس قۇرۋ قاجەتتىلىگى تۋىندادى. بۇل باسەكەگە قابىلەتتى ءبىلىم جۇيەسىن قۇرۋدىڭ باسى بولىپ سانالادى. قازىر ەلىمىزدە ساپالى ءبىلىم بەرۋگە جانە وعان قول جەتكىزۋگە بارلىق العىشارتتار بار. ن.ءا.نازارباەۆ ايتقانداي, «العا قارايتىن كەز كەلدى. ىسكە كىرىسەر كەز كەلدى. ەرىك-جىگەرىمىزدى تانىتاتىن كەز كەلدى. ءومىردى وزگەرتەتىن كەز كەلدى». قازاقستان رەسپۋبليكاسى ءبىلىم جانە عىلىم مينيسترلىگىنىڭ ءبىلىم بەرۋ جۇيەسى جاڭعىرتىلىپ, «ورلەۋ» بىلىكتىلىكتى ارتتىرۋ ۇلتتىق ورتالىعى» اكتسيونەرلىك قوعامى وسىناۋ ۋاقىت تالابىمەن قۇرىلدى. ۇلتتىق ورتالىقتىڭ بارلىق فيليالدارى قازاقستان رەسپۋبليكاسىنىڭ ءبىلىم جانە عىلىم مينيسترلىگى جۇرگىزىپ وتىرعان رەفورمانىڭ الەمدىك دامۋ تەندەنتسيالارىنىڭ تالاپتارىنا ساي بىلىكتىلىكتى ارتتىرۋدىڭ كوپباعدارلى مودۋلدىك باعدارلامالارىن, وقۋ ادىستەمەلىك قۇرالدار مەن تسيفرلىق فورماتتاعى ءبىلىم رەسۋرستارىن جاساۋعا جۇمىلدىرىلۋدا.
ۇستاز دەگەن مارتەبەلى ماماندىق يەلەرىنىڭ الەۋەتى مەن بىلىكتىلىگىن ارتتىرا وتىرىپ, قوعامنىڭ دامۋىنا, وركەنيەت پەن رۋحاني مادەنيەتتىڭ جوعارى تالابىنا ساي ەڭبەك جاسالۋدا. ءبىز دامۋ باعىتىنداعى ساتىلى جولدارمەن ءجۇرىپ, بيىك ءبىر بەلەستى باعىندىردىق, زور مۇمكىندىكتەرگە دە يە بولدىق. ورتالىق جۇمىسىنىڭ عىلىمي جانە يننوۆاتسيالىق باعىتتىلىعىنىڭ ناتيجەسىندە اتقارىلىپ جاتقان يگى ىستەر سان الۋان. ينستيتۋت ۇجىمى «زاماناۋي ءبىلىم بەرۋ جۇيەسىنە كىرىگۋ ماقساتىندا وقىتۋدىڭ يننوۆاتسيالىق نىساندارى مەن ادىستەرىن ەنگىزۋ ارقىلى پەداگوگتاردىڭ كاسىبي قۇزىرەتتىلىگىن جوعارى دەڭگەيگە كوتەرۋ» ماسەلەسىمەن اينالىسا وتىرىپ, ۇلتتىق ءبىلىم بەرۋ مودەلىن جاڭعىرتۋ جاعدايىندا بىلىكتىلىكتى ارتتىرۋدىڭ مازمۇنىن ايقىنداپ, كاسىبي دامۋىن قامتاماسىز ەتۋدە.
وزگەرمەلى ءومىر تالابىنا ساي جەكە تۇلعانىڭ قالىپتاسۋى ۇستازدان باستالادى, قوعامداعى وزگەرىستەر ۇستازداردىڭ كاسىبي بىلىمىندەگى جاڭاشىلدىقتى تالاپ ەتەدى. ۇلتتىڭ باسەكەلەستىك قابىلەتى ءبىرىنشى كەزەكتە ونىڭ بىلىمدىلىك دەڭگەيىمەن ايقىندالادى. ۇستاز نەگىزى بولمىسىنان جاڭالىققا جانى قۇشتار, جارشىسى بولۋعا ءتيىستى جان. ەڭ باستىسى – ادام فاكتورى: ونىڭ ەركى, كۇش-جىگەرى, تاباندىلىعى مەن ءبىلىمى. ولاي بولسا, عىلىم مەن اقىل-وي باسەكەسىنىڭ عاسىرىندا عىلىم مەن تەحنيكانىڭ وزىق ۇلگىلەرىن مەڭگەرە وتىرىپ, ەلباسىنىڭ «ەلىمىزگە بويىنا اتا-بابامىزدىڭ ەل مەن جەرگە دەگەن سۇيىسپەنشىلىك قاسيەتى دارىعان, ەگەمەندى ەلىمىزگە ايانباي قىزمەت ەتەتىن, وي-ءورىسى كەڭ, العىر دا جۇرەكتى, ساۋاتتى دا سالاۋاتتى ازاماتتار قاجەت» دەگەن بيىگىنەن كورىنە بەرەيىك.
مارجان عالىمجانوۆا,
«ورلەۋ» بىلىكتىلىكتى ارتتىرۋ ۇلتتىق ورتالىعى» اق فيليالى اتىراۋ وبلىسى بويىنشا پەداگوگيكالىق قىزمەتكەرلەردىڭ بىلىكتىلىگىن ارتتىرۋ ينستيتۋتىنىڭ ديرەكتورى.
بۇكىل الەم تانيدى
تاۋەلسىز قازاقستان رەسپۋبليكاسىنىڭ دامۋ تاريحى ونىڭ نەگىزىن قۇراۋشى جانە تۇڭعىش پرەزيدەنتى نۇرسۇلتان ءابىش ۇلى نازارباەۆتىڭ ەسىمىمەن تىعىز بايلانىستى. 1991 جىلدىڭ 1 جەلتوقسانى – قازاقستان ءۇشىن ماڭىزدى كۇن. سول كۇنى نۇرسۇلتان ءابىش ۇلى نازارباەۆ قازاقستاننىڭ پرەزيدەنتى بولىپ سايلاندى. بۇل جەڭىس جوعارى سەنىمنىڭ بەلگىسى جانە دە قازاقستان حالقىنىڭ جاۋاپتى تاڭداۋى بولدى. سول سەبەپتى 1 جەلتوقسان ەلىمىز تاريحىندا ءماڭگىگە قالادى جانە ءبىز قازىر ونى تۇڭعىش پرەزيدەنت كۇنى رەتىندە اتاپ وتەمىز.
10 جەلتوقسانداعى الماتىداعى رەسپۋبليكا سارايىندا ءوتكەن ۇلىقتاۋ ءراسىمى كەزىندە ن.نازارباەۆ وزىنە جۇكتەلگەن قازاقستان رەسپۋبليكاسىنىڭ پرەزيدەنتى مىندەتىن ورىنداپ, ازاماتتاردىڭ قۇقىقتارى مەن بوستاندىقتارىنا كەپىل بولۋعا, قازاقستان رەسپۋبليكاسىنىڭ كونستيتۋتسياسىن قاتاڭ ساقتاپ, كوپۇلتتى رەسپۋبليكا حالقىنا ادال قىزمەت ەتۋگە انت بەردى.
ءبىزدىڭ پرەزيدەنت – دەموكراتيالىق قوعام يدەياسىن نەگىزدەۋشى. مىنە, ءۇشىنشى ونجىلدىق, ونىڭ بارلىق كۇش-جىگەرى ازاماتتاردىڭ جاقسى ءومىر ءسۇرۋى مەن قوعامنىڭ نىعايۋىنا باعىتتالعان. نۇرسۇلتان ءابىش ۇلىنىڭ باسشىلىعىمەن ەلىمىزدىڭ الەۋمەتتىك-ەكونوميكالىق دامۋىنىڭ ناقتى باعدارلامالارى جاسالىپ, جۇزەگە اسىرىلىپ كەلەدى. وسىنىڭ ناتيجەسىندە بۇگىندە ەلىمىزدى بۇكىل الەم تانيدى.
ساياسي عىلىمدار دوكتورى بەيبىت يساباەۆ: «...ەلباسى نۇرسۇلتان نازارباەۆ ەسىمىن بىرەۋلەر كۇشتى جانە مىقتى باسشىمەن بايلانىستىرادى, ەندى بىرەۋلەر ءۇشىن – ول ۇنەمى ءوز ماقساتتارىنا جەتەتىن ادام, ەندى بىرەۋلەرگە – سۇيىكتى اكە. بىراق, بارىنەن بۇرىن ونىڭ ەسىمى ءوز ەلى مەن حالقىنىڭ تاعدىرىنا جاۋاپكەرشىلىكتى ءوز موينىنا العان اداممەن بايلانىستى», دەيدى. بۇل پىكىردى ءبىزدىڭ پرەزيدەنتىمىزدىڭ قىزمەتىن ءادىل باعالاعاندىق دەپ بىلەمىن.
مەملەكەت باسشىسى ءبىلىم مەن مادەنيەتتىڭ دە دامۋىنا كوپ كوڭىل بولەدى. «نازارباەۆ ۋنيۆەرسيتەتى» مەن بۇكىل قازاقستان رەسپۋبليكاسى بويىنشا زياتكەرلىك مەكتەپتەر جۇيەسى اشىلدى.
نۇرسۇلتان نازارباەۆ سياقتى تۇلعالارعا ارناپ ولەڭدەر مەن اندەر جازىلادى, ءوزىم ولەڭ شىعارمايتىن بولعاندىقتان, ماعان ۆلاديمير تاشپەكوۆتىڭ مىنا ولەڭ جولدارى وتە ۇنايدى:
بۋد سلاۆەن, پرەزيدەنت ستەپنوي سترانى,
وتەتس كازاحوۆ, ۆسەح راسسەياننىح پو ميرۋ.
نارود سبەرەگ موي ۆسە وبريادى ستارينى
ي پوچيتاەت مۋدروست, ترۋد ي ليرۋ!
ءوز اتىمنان مەملەكەت باسشىسىنا تابىس تىلەيمىن. ونىڭ بارلىق جاسامپاز يدەيالارى حالىق يگىلىگى ءۇشىن ورىندالا بەرسىن. ءبىز, كەلەشەك ۇرپاق, ۇلگىلى وقۋعا جانە سول ارقىلى تۋعان قازاقستانىمىزدى جەتىستىكتەرىمىزبەن تانىتۋعا ۋادە بەرەمىز!
ادەليا باكيەۆا,
ق.ساتباەۆ اتىنداعى №56 گيمنازيانىڭ 11 ۆ سىنىپ وقۋشىسى.
الماتى
