جيىندا مينيستر مەملەكەتتىك تۋدى زاڭسىز جاساپ شىعارۋ, جەكە جانە زاڭدى تۇلعالاردىڭ قولدانۋى, ۇلتتىق ستاندارت تۋرالى ايتتى. «قازاقستان رەسپۋبليكاسىنىڭ مەملەكەتتىك تۋى كولەمىنە قاراماستان, ۇلتتىق ستاندارتقا سايكەس كەلۋى ءتيىس. جەكە جانە زاڭدى تۇلعالاردىڭ ۇلتتىق ستاندارت تالاپتارىن بۇزىپ, مەملەكەتتىك تۋدى پايدالانۋىنا جول بەرىلمەيدى. ۇلتتىق ستاندارتقا ساي كەلمەۋ دەگەنىمىز – مەملەكەتتىك تۋداعى نىساندى, مولشەردى جانە تەحنيكالىق تالاپتاردى بۇزۋ. مەملەكەتتىك تۋ ۇلتتىق ستاندارتقا سايكەس كەلمەگەن جاعدايدا, ۇكىمەت ايقىنداعان تارتىپپەن اۋىستىرىلىپ, جويىلۋى كەرەك», دەپ اتاپ ءوتتى مينيستر.
اكىمشىلىك قۇقىق بۇزۋشىلىق تۋرالى كودەكسكە سايكەس, ۇلتتىق ستاندارت تالاپتارىنا ساي كەلمەيتىن مەملەكەتتىك تۋدى زاڭسىز دايىنداعاندارعا اكىمشىلىك ايىپپۇل سالىنادى. ءمينيستردىڭ ايتۋىنشا, ۇكىمەتتىڭ 2020 جىلعى 27 قاراشاداعى №801 قاۋلىسىنا سايكەس مەملەكەتتىك تۋىن, ەلتاڭباسىن جانە ولاردىڭ بەينەلەرىن, مەملەكەتتىك گيمننىڭ ءماتىنىن پايدالانۋ قاعيدالارىنا وزگەرىستەر ەنگىزىلدى. ەندىگى كەزەكتە بۇل وزگەرىستەر ارقىلى ازاماتتارىمىز ءۇشىن مەملەكەتتىك تۋدى پايدالانۋ اياسى زاڭنامالىق تۇرعىدا كەڭەيتىلىپ وتىر. ەڭ الدىمەن مەملەكەتتىك تۋدى جەكە جانە زاڭدى تۇلعالار عيماراتتاردا, ونىڭ ىشىندە بالكونداردا جانە سالتاناتتى ءىس-شارالار وتكىزىلەتىن ورىنداردا پاتريوتتىق سەزىمدەرىن, قازاقستاندىق بىرەگەيلىگىن ءبىلدىرۋ ءۇشىن, ەل ازاماتتارىنىڭ جەتىستىكتەرىن قولداۋ ماقساتىندا پايدالانا الادى.
«بۇگىنگى تاڭدا كونستيتۋتسيالىق زاڭعا سايكەس, مەملەكەتتىك تۋ بەينەسى وزگە دە ماتەريالدىق نىسانداردا سالىنۋى مۇمكىن. الايدا ءبىر رەت پايدالانىلاتىن زاتتار بۇل ماتەريالدىق نىسانداردىڭ قاتارىنا جاتپايدى. سونىمەن بىرگە مەملەكەتتىك تۋ قازاقستان رەسپۋبليكاسىنىڭ №988-2007 ۇلتتىق ستاندارتىن ساقتاي وتىرىپ جاسالعان جانە ونى ليتسەنزياسى بار ۋاكىلەتتى ۇيىمدار عانا جاساي الادى», دەپ جاۋاپ بەردى مينيستر جۋرناليستەردىڭ كونفەت سىرتىنداعى مەملەكەتتىك تۋدىڭ سۋرەتى جايىنداعى سۇراققا.
سونىمەن بىرگە مينيستر مەملەكەتتىك تۋدى قولدانۋعا بولمايتىن جايتتاردى ايتىپ بەردى. اشىپ ايتار بولساق, ادامعا نەمەسە زاتقا دەگەن قۇرمەت رەتىندە تۋ تومەن تۇسىرىلمەۋى كەرەك, تۋ قانداي دا ءبىر زاتقا, جەرگە نەمەسە سۋعا تيمەۋى كەرەك. سونداي-اق تۋدىڭ سابى كولدەنەڭىنەن كوتەرىلمەيدى. تۋعا جازۋ جازۋعا نەمەسە سۋرەت سالۋعا بولمايدى, ول كيىم نەمەسە توسەك, شىمىلدىق رەتىندە پايدالانىلمايدى. قازاقستان رەسپۋبليكاسى اتىنان ونەر كورسەتەتىن سپورتشىلاردىڭ كيىمىندە مەملەكەتتىك تۋدىڭ بەينەسىن پايدالانۋ ايرىقشا جاعداي سانالادى.
«2020 جىلعى 27 قازاندا مەملەكەت باسشىسى قاسىم-جومارت توقاەۆتىڭ مەملەكەتتىك تۋدى پايدالانۋعا قاتىستى مەملەكەتتىك رامىزدەردى پايدالانۋ قاعيدالارىن قايتا قاراۋ تاپسىرماسى بەرىلدى. اتالعان تاپسىرماعا سايكەس, مەملەكەتتىك تۋدى, ەلتاڭبانى جانە ولاردىڭ بەينەلەرىن, مەملەكەتتىك گيمننىڭ ءماتىنىن پايدالانۋ قاعيدالارىنا وزگەرىستەر ەنگىزىلدى. ەندىگى كەزەكتە ازاماتتارىمىز ءۇشىن مەملەكەتتىك تۋدى پايدالانۋ اياسى زاڭنامالىق تۇرعىدا كەڭەيتىلىپ وتىر», دەپ اتاپ ءوتتى مينيستر.
«سونىمەن قاتار جەكە تۇلعالارعا وسى قاعيدالارعا ەنگىزىلگەن وزگەرىستەرگە سايكەس, مەملەكەتتىك تۋدى ءبىر قاباتتى نەمەسە كوپ قاباتتى عيماراتتاردا ەكستەرەرلى نۇسقادا ورنالاستىرۋ كەزىندە عيماراتتىڭ ساۋلەت ەرەكشەلىكتەرىنە قاراماستان پايدالانۋ مۇمكىندىگى بەرىلدى. بۇدان بىلاي جەكە تۇلعالار عيماراتتاردا ورنالاستىرىلاتىن مەملەكەتتىك تۋدى قاراڭعى ۋاقىتتا جارىق قۇرالدارىن قولدانباي-اق پايدالانا الادى. جالپى العاندا, جوعارىدا كورسەتىلگەن وزگەرتۋلەر مەملەكەتتىك تۋدىڭ قولدانىلۋ اياسىن ەداۋىر كەڭەيتەدى», دەدى اقتوتى رايىمقۇلوۆا.
