اقتاۋ قالاسىنىڭ وڭتۇستىگىندە 100 شاقىرىم قاشىقتىقتا ورنالاسقان قۇرىق پورتى – ەلىمىزدىڭ ەكونوميكالىق الەۋەتىنە سەرپىن قوساتىن نىسان. پورتتىڭ قۇرىلىسى 2015 جىلدىڭ ءساۋىر ايىندا باستالىپ, ونىڭ العاشقى ىسكە قوسۋ كەشەن ايماعى – تەمىر جول پارومدى تەرمينالى – 2016 جىلدىڭ 6 جەلتوقسانىندا پايدالانۋعا بەرىلدى.
ماڭعىستاۋ جەرىنە جاڭا پاروم جەلىسى بويىنشا قادام باسقان «كومپوزيتور راحمانينوۆ» – RO-RO تيپتەس اتالعان كەمەدە ءارتۇرلى قۇرال-جابدىقتارمەن التى ەۋرو جۇك كولىگى كەلدى. ولاردىڭ بىرەۋىندە كيۆي جەمىسى بار.
– ەڭ باستىسى, پاروم ارقىلى كوكونىستەر مەن جەمىس-جيدەكتەر تيەلگەن جۇك كولىكتەرىندەگى تاۋارلاردى توگىپ-شاشپاي, ياعني باسقا كولىككە اۋىستىرىپ جۇكتەمەي تۇتىنۋشىعا جەتكىزۋگە مۇمكىندىك بار. «قۇرىق-اميراباد/ەنزەلي» پارومدى جەلىسى يراندىق جانە قازاقستاندىق كاسىپكەرلەر ءۇشىن دە قىزىقتى بولاتىنىنا سەنىمدىمىن, دەيدى قۇرىق پورتىنىڭ ماركەتينگ جانە لوگيستيكا بويىنشا اتقارۋشى ديرەكتورى الىبەك وتەگەنوۆ.
قۇرىق ءاۆتوموبيلدى ينفراقۇرىلىمى پورت ارقىلى ترانزيت جانە ەكسپورتتىق-يمپورتتىق باعىتتارداعى ءوتۋشى جۇكتەردى قابىلداۋ مەن جىلدام قىزمەت كورسەتۋگە تولىعىمەن دايىن.
2020 جىلدىڭ 10 ايىندا قۇرىق پورتى ارقىلى وتەتىن جۇكتەردى تيەۋ 1,352 ملن توننانى قۇرادى. كورسەتكىش وتكەن جىلمەن سالىستىرعاندا 290 مىڭ تونناعا نەمەسە 21%-عا جوعارى. ەكسپورتقا مۇناي, استىق جانە حالىقتىق قولدانىستاعى تاۋارلار جىبەرىلسە, زاتتىق ونىمدەر مەن قۇرىلىس ماتەريالدارى سەكىلدى حالىقتىق قولدانىستاعى تاۋارلار يمپورتتالدى.
قۇرىق پورتىنىڭ كەلەشەگى زور دەپ ەسەپتەلەدى. تەڭىز جولى ارقىلى قارىم-قاتىناستى جولعا قويىپ جانە ونىڭ باعىتتارى مەن جۇك كولەمىن جاڭعىرتىپ وتىرۋ – پورتتاعى جەمىستى جۇمىستاردىڭ ءبىرى.
ماڭعىستاۋ وبلىسى
