№2 كوپبەيىندى قالالىق بالالار اۋرۋحاناسىندا سيرەك كەزدەسەتىن اۋرۋعا شالدىققان 7 جاسار قىزعا وتا جاسالدى. كىشكەنتاي ءتوميريستىڭ بويىندا ءبىر ەمەس, ەكى پاتولوگيا بار. ونىڭ ءبىرى – پروتەيا سيندرومى. ەجەلگى گرەك ميفتەرىندەگى سىرت بەينەسىن جەدەل وزگەرتە الاتىن پروتەي قۇدايدىڭ اتىمەن اتالاتىن وتە سيرەك كەزدەسەتىن بۇل اۋرۋدىڭ ەرەكشەلىگى سوندا, وندا سىرقاتتىڭ تەرىسى مەن سۇيەگى شامادان تىس وسەدى. ال ءتوميريستىڭ ەكى تابانى وسىنداي الىپتىق بەينەدە وسكەنىنە قوسا, ىشەكتىڭ تامىرلى بۇزىلۋى وپەراتسياعا وزگەشە كۇردەلى سيپات بەرگەن.
«پروتەيا سيندرومى – سيرەك كەزدەسەتىن ءتۋابىتتى اۋرۋ. بۇل تەرىنىڭ, سۇيەكتەردىڭ, بۇلشىقەتتەردىڭ, ماي تىندەرىنىڭ, سونداي-اق قان مەن ليمفا تامىرلارىنىڭ شامادان تىس وسۋىمەن سيپاتتالادى. اتالعان اۋرۋ وتە سيرەك كەزدەسەدى جانە بۇگىندە الەمدە شامامەن 200 عانا وسىنداي جاعداي تىركەلگەن. بالانىڭ اياعىنىڭ مولشەرى ۇلكەن, ول دەنە سالماعى مەن مولشەرىنىڭ جارتىسىن قۇرايدى, ساۋساق ايماعىندا سوزىلمالى وستەوميەليت وشاقتارى بار», دەدى اۋرۋحانانىڭ ورتوپەديا جانە وڭالتۋ بولىمشەسىنىڭ مەڭگەرۋشىسى اعابەك چينكيباەۆ.
دارىگەردىڭ ايتۋىنشا, اياق مولشەرىنىڭ ۇلعايۋيىنان باسقا, بالا ىشەكتىڭ ليمفوانگيوماتوزىمەن اۋىرعان. ىشەكتەن ءجيى قان كەتۋ سالدارىنان توميريستە اۋىر انەميا قوسا ءجۇردى. سوندىقتان ونىڭ قانىن قالىپقا كەلتىرۋ ءۇشىن ايىنا 2-3 رەت قان قۇيۋ قاجەت بولاتىن.
بيىل جىل باسىندا توميريس جوسپارلى تۇردە اۋرۋحانانىڭ ورتوپەديا جانە وڭالتۋ بولىمىنە جاتقىزىلدى. №2 بالالار اۋرۋحاناسىنىڭ حيرۋرگتەرى ءساۋىر ايىندا ىشەككە ءبىرىنشى وپەراتسيا جاسادى. بۇل قايتالاناتىن قان كەتۋدى توقتاتۋعا مۇمكىندىك بەردى. وسى وپەراتسيادان باستاپ بالاعا ءجيى قان مەن ونىڭ كومپونەنتتەرىن قۇيۋ قاجەت بولماي, ءتوميريستىڭ حال-جاعدايى جاقسارىپ, سالماق قوسا باستادى.
«وسى اپتادا قۇرامىندا ورتوپەدتەر, حيرۋرگتەر مەن انەستەزيولوگتەر بار مۋلتيتارتىپتىك توپ سول اياعىنىڭ تابانىنا رەكونسترۋكتيۆتى وتانى ءساتتى جاساپ شىقتى. بۇل – توميريس ەمىنىڭ 2-كەزەڭى. كەلەر جىلى اياقتارىنا دا, ىشەكتە دە وپەراتسيالاردىڭ تاعى 3-كەزەڭىن ورىنداۋ جوسپارلانۋدا. وڭ اياعىنا جاسالعان وپەراتسيادان كەيىن بالانىڭ كۇشى مەن الەۋمەتتىك وسالدىعى تومەندەيدى», دەپ ءتۇسىندىردى ا.چينكيباەۆ.
قىزدىڭ اناسى وتا جاساۋعا قاتىسقان بارلىق دارىگەرگە ۇلكەن العىسىن ءبىلدىرىپ جاتىر.
