وتىرىسقا 57 ەلدىڭ سىرتقى ساياسات ۆەدومستۆولارىنىڭ باسشىلارى قاتىستى. البانيانىڭ توراعالىعىمەن وتكەن جيىنعا قاتىسۋشىلار ۇيىمنىڭ اعىمداعى جىلداعى جۇمىسىنىڭ قورىتىندىلارى جانە ەۋروپاداعى قاۋىپسىزدىك جانە ىنتىماقتاستىق ۇيىمى (ەقىۇ) كەڭىستىگىندەگى گەوساياسي احۋالدىڭ وزەكتى ماسەلەلەرىن تالقىلادى. قازاقستان دەلەگاتسياسىن ەلىمىزدىڭ سىرتقى ىستەر ءمينيسترى مۇحتار تىلەۋبەردى باسقاردى.
وتىرىستىڭ ماڭىزدى ماسەلەلەرىنىڭ ءبىرى ەقىۇ جاڭا باسشىلارىن – باس حاتشىنى, دياقب باسشىسىن, از ۇلتتار ىستەرى جونىندەگى جوعارعى كوميسساردى جانە باق ماسەلەلەرى جونىندەگى وكىلدى سايلاۋ بولدى. مينيستر م.تىلەۋبەردى ءوز سوزىندە قازاقستان پرەزيدەنتى قاسىم-جومارت توقاەۆتىڭ ساياسي جانە الەۋمەتتىك-ەكونوميكالىق رەفورمالارى تۋرالى حاباردار ەتىپ, ەلدەگى 2021 جىلعى 10 قاڭتاردا وتەتىن پارلامەنت ءماجىلىسىنىڭ سايلاۋىنا دايىندىق تۋرالى اڭگىمەلەدى.
قازاقستاننىڭ سىرتقى ىستەر ءمينيسترى ەقىۇ استانا ءسامميتىنىڭ 10 جىلدىعىن اتاپ ءوتىپ, ورتاق ەۋرازيالىق جانە ەۋرواتلانتيكالىق قاۋىپسىزدىك كەڭىستىگىن قالىپتاستىرۋ ءۇشىن كۇش-جىگەردى جۇمىلدىرۋعا شاقىردى. وتىرىستا ەۋروپاداعى قاۋىپسىزدىك جانە ىنتىماقتاستىڭ ۇيىمىنىڭ سوڭعى 6 ايعا سوزىلعان ينستيتۋتسيونالدىق داعدارىسى اياقتالعانى حابارلاندى. اعىمداعى جىلدىڭ شىلدە ايىندا ۇيىمنىڭ بارلىق 4 باسشىسىنىڭ – باس حاتشىنىڭ, دياقب باسشىسىنىڭ, از ۇلتتار ىستەرى جونىندەگى جوعارعى كوميسساردىڭ جانە باق بوستاندىعى جونىندەگى وكىلدىڭ مانداتتارى توقتاتىلعان-دى.
ۇزاق ىرىكتەۋ جانە كەلىسۋ پروتسەسىنىڭ قورىتىندىلارى بويىنشا قاتىسۋشىلار ورتاق شەشىمگە كەلىپ, ونلاين رەجىمدە شارا بارىسىندا جاڭا باسشىلاردى سايلادى. سايلاۋ پروتسەسىنىڭ باسىنان باستاپ نەگىزگى لاۋازىمداردىڭ بىرىنە – ەقىۇ از ۇلتتار ىستەرى جونىندەگى جوعارعى كوميسسارى لاۋازىمىنا (ەقىۇ اۇجك) – قازاقستان ءوزىنىڭ شۆەتسياداعى ەلشىسى قايرات ءابدىراحمانوۆتىڭ كانديداتۋراسىن ۇسىندى. ەلشى ق.ءابدىراحمانوۆتىڭ كانديداتۋراسىن ەقىۇ-عا قاتىسۋشى ەلدەر دە قولدادى. وسىلايشا اشىق كونكۋرستا قازاقستاندىق ديپلومات جاڭا لاۋازىمعا سايلاندى. قايرات ءابدىراحمانوۆتىڭ سىرتقى ىستەر ءمينيسترى, بۇۇ جانىنداعى جانە ەقىۇ جانىنداعى تۇراقتى وكىلى لاۋازىمىندا ايتارلىقتاي ديپلوماتيالىق جۇمىس تاجىريبەسى بار.
بۇعان دەيىن تمد جانە ورتالىق ازيانى قوسا العاندا, «ۆەنادان شىعىسقا» قاراي ورنالاسقان ەلدەردىڭ وكىلدەرى ەشقاشان ەقىۇ باسشىلىعىنىڭ قۇرامىندا بولماعانىن اتاپ ءوتۋ كەرەك. قازاقستاننىڭ كوپۇلتتى جانە كوپكونفەسسيالى قوعامداعى بەيبىتشىلىك پەن كەلىسىمدى قولداۋ جونىندەگى تاجىريبەسى ناق وسى قازاقستاندىق كانديداتتى تاڭداۋعا ىقپال ەتكەنى ءسوزسىز.
سىرتقى ىستەر ءمينيسترى مۇحتار تىلەۋبەردى بيىلعى جىلدىڭ ۇيىم ءۇشىن وڭاي بولماعانىن مالىمدەدى.
«3-4 جەلتوقسان كۇندەرى ونلاين فورماتتا ەۋروپاداعى قاۋىپسىزدىك جانە ىنتىماقتاستىق ۇيىمىنىڭ سىرتقى ىستەر مينيسترلەرىنىڭ 27-ءشى وتىرىسى ءوتتى. ول جيىندا ۇيىمعا قاتىسۋشى ەلدەر ونىڭ مانداتىنا قاتىستى ماڭىزدى ماسەلەلەردى تالقىلادى. وزدەرىڭىز بىلەتىندەي, 2020 جىل ەقىۇ ءۇشىن وڭاي بولعان جوق. سەبەبى كەيىنگى جىلدارى بۇل ۇيىم باسشىسىز جۇمىس ىستەپ كەلدى. اتاپ ايتقاندا, شىلدە ايىندا ءتورت باسشىنىڭ ءبارى بىردەي ءوز مانداتتارىنان ايىرىلعان بولاتىن. ءبىز بۇل كەزەڭگە ينستيتۋتسيونالدىق داعدارىس رەتىندە قارادىق. بۇگىن بۇل ماسەلە شەشىمىن تاۋىپ, كونسەنسۋس ورناپ, جاڭا باسشىلار سايلاندى», دەدى مۇحتار تىلەۋبەردى.
ونىڭ ايتۋىنشا, قايرات ءابدىراحمانوۆتىڭ ەۋروپاداعى قاۋىپسىزدىك جانە ىنتىماقتاستىق ۇيىمىنىڭ جوعارعى كوميسسارى لاۋازىمىنا سايلانۋى – تاريحي وقيعا, ويتكەنى تمد مەن ورتالىق ازياداعى ەلدەردىڭ ىشىنەن بۇل ۇيىمنىڭ باسشىلىعىنا ەشكىم سايلانباعان.
«بۇل تۇرعىدا قازاقستان از ۇلتتار ىستەرى جونىندەگى جوعارعى كوميسسار لاۋازىمىنا تاجىريبەلى قازاقستاندىق ديپلومات, ءبىزدىڭ ەلدىڭ شۆەتسيا مەن دانياداعى ەلشىسى قايرات قۇدايبەرگەن ۇلى ءابدىراحمانوۆتى ۇسىنۋ تۋرالى شەشىم قابىلدادى. قايرات ءابدىراحمانوۆتىڭ ۇسىنىلۋىن ەقىۇ-عا مۇشە مەملەكەتتەر جىلى قابىلدادى. وسىلايشا قازاقستان ءبىزدىڭ كانديداتۋرا بويىنشا ۇلكەن قولداۋعا يە بولدى», دەپ اتاپ ءوتتى مينيستر.
حالىقارالىق ۇيىمىڭ باسشىسىنا اينالعان ديپلومات ەندى ۇيىمنىڭ جارعىسىنا سايكەس, ءوز ەلىندەگى بۇكىل ۇلتتىق لاۋازىمداردان بوساتىلىپ, ءوز قىزمەتىندە تاۋەلسىز ءارى وبەكتيۆتى بولۋى كەرەك.
