قۇنى 2 ميلليارد 157 ميلليون تەڭگەگە باعالانعان جوبانىڭ قۇرىلىسىن «مەليورياتور» جشس 10 ايدىڭ ىشىندە جۇزەگە اسىرعان. 77 شاقىرىمدىق سۋ قۇبىرىنا قوسا 17 شاقىرىمدىق ەلەكتر جەلىسى جۇرگىزىلىپ, بۇل ىسكە 60 ادام تارتىلىپتى. تازا سۋ بۇگىندە جىمپيتى مەن ولەڭتى اۋىلدارىنا جەتكەن, بولاشاقتا شاعىرلاي, بۇلان, جامبىل, جىراقۇدىق, قوسوبا اۋىلدارىنا قۇبىر تارتىلادى. وسىلايشا سىرىم اۋدانى تۇرعىندارىنىڭ تەڭ جارىمى اۋىز سۋ تاپشىلىعىنان قۇتىلماق.
– كەڭاششىدان تارتىلعان 77 شاقىرىمدىق ماگيسترالدى سۋ قۇبىرى جىمپيتى جانە ولەڭتى اۋىلدارىنداعى جاز ايلارىنداعى سۋ قىسىمىنىڭ ازايۋى ماسەلەسىن شەشەدى دەپ ويلايمىن. وسى كەزگە دەيىن پايدالانعان دانيلل نۇكتەسى كۇنىنە 500 تەكشە مەتر سۋ وندىرەتىن بولسا, حالىق تۇتىنۋ ءۇشىن بۇدان ەكى ەسە ارتىق مولشەردە سۋ كەرەك بولدى. كەڭاششى سۋ كەن ورنى كۇنىنە 2 مىڭ تەكشە مەتر سۋ وندىرۋگە قاۋقارلى. بىراق ءبىز بۇل سۋدى ۇنەمدەۋگە ءتيىسپىز. مۇمكىندىك بولسا بوگەتتەردى قالپىنا كەلتىرىپ, جەراستى سۋ قورلارىن تاۋىپ, قۇدىقتار قازىپ, مالعا قاجەتتى سۋ ماسەلەسىن ءوز الدىنا بولەك شەشۋىمىز كەرەك. اۋىز سۋدى ءراسۋا قىلماي, ماقساتتى پايدالانايىق. ۇنەمدەمەسەك, سۋ تاپشىلىعى ماسەلەسىنە قايتا تاپ بولامىز, – دەدى وسى جوبانىڭ اشىلۋىنا ارنايى كەلگەن وبلىس اكىمى عالي ەسقاليەۆ.
ءوڭىر باسشىسى وسى جوبانىڭ جۇزەگە اسۋىنا ۇلەس قوسقان ەل ۇكىمەتى مەن اۋىل شارۋاشىلىعى مينيسترلىگىنە, سۋ رەسۋرستارى كوميتەتىنە, پارلامەنت دەپۋتاتتارىنا العىس ايتتى.
«قازەكولوگياجوبالاۋ» جشس باس ينجەنەرى ليۋدميلا لەبەدەۆانىڭ ايتۋىنشا, كەڭاششى جەراستى سۋ قورىنا 3 ۇڭعىما قازىلعان. ونىڭ ەكەۋى پايدالانىلىپ, بىرەۋى قوسالقى قور رەتىندە ساقتالماق. مۇنداعى ءار ۇڭعىما ساعاتىنا 60 تەكشە مەتر سۋ وندىرەدى. «كەڭاششىنىڭ سۋىنىڭ قۇرامىندا تەمىر كوپ. وندىرىلگەن سۋ ەكىنشى نۇكتەدەگى سۋ سورۋ ستانساسىنا كەلىپ, تولىق تازارتۋدان وتەدى. اۋىز سۋ ساپاسى بارلىق تالاپتارعا ساي», دەيدى ل.لەبەدەۆا.
باتىس قازاقستان وبلىسى
