- قازىر وبلىستاعى 230 اۋىلدىق ەلدى مەكەننىڭ 170-ءى كەڭ جولاقتى ينتەرنەتپەن قامتاماسىز ەتىلگەن. مەملەكەتتىك-جەكەشەلىك ارىپتەستىك اياسىندا وڭىردە 73 ەلدى مەكەننىڭ مەملەكەتتىك ورگاندارى تالشىقتى-وپتيكالىق بايلانىس جەلىسىمەن قامتاماسىز ەتىلىپ, ونىڭ 14-نە «قازاقتەلەكوم» اكتسيونەرلىك قوعامى تالشىقتى-وپتيكالىق بايلانىس جەلىسىن جۇرگىزدى. بۇگىندە جوعارى جىلدامدىقتى ينتەرنەت جەلىسىمەن قامتاماسىز ەتۋ ماسەلەسى بويىنشا شەشىمىن تاپپاعان 39 ەلدى مەكەندى جانە شالعاي ورنالاسقان 14 ەلدى مەكەندى جوعارى جىلدامدىقتى ينتەرنەتپەن قامتاماسىز ەتۋ مۇمكىندىگىن قاراستىرۋىڭىزدى ۇسىنامىز – دەدى وبلىس اكىمى.
وتكەن جىلدىڭ ناۋرىز ايىندا قىزىلوردا وبلىسىنىڭ تسيفرلىق تەحنولوگيالار باسقارماسى مەن "قازاقتەلەكوم" اق وڭتۇستىك وڭىرلىك تەلەكوممۋنيكاتسيالار ديرەكتسياسى اراسىندا "قىزىلوردا وبلىسىنىڭ مەملەكەتتىك ورگاندارىنا تالشىقتى-وپتيكالىق بايلانىس جەلىسىن جۇرگىزۋ" تۋرالى مەملەكەتتىك-جەكەشەلىك ارىپتەستىك شارتى جاسالعان. بۇگىندە شارتا كورسەتىلگەن قۇرىلىس جۇمىستارى تولىعىمەن اياقتالىپ, 69,7 شاقىرىم تالشىقتى-وپتيكالىق جەلى جۇرگىزىلىپ, ايماقتاعى مەملەكەتتىك ورگانداردىڭ 77 وبەكتىسى ينتەرنەت جەلىسىنە قوسىلدى.
وبلىس بويىنشا ءبىلىم بەرۋ جانە دەنساۋلىق ساقتاۋ نىساندارى ينتەرنەتكە تولىق قوسىلعان. قازىرگى ۋاقىتتا بيۋدجەتتىك ۇيىمداردى ەمەس, حالىقتى (مەكتەپ جاسىنداعى بالالار, ستۋدەنتتەر جانە ت.ب.) ساپالى ينتەرنەتپەن قامتاماسىز ەتۋ ماسەلەسى وتكىر تۇر. سونداي-اق, ءبىلىم بەرۋ سالاسىندا "قاۋىپسىز مەكتەپ" جوباسى بويىنشا ورتا ءبىلىم بەرۋ مەكەمەلەرىن بەينەباقىلاۋ جۇيەسىمەن قامتاماسىز ەتۋ جوباسى كەزەڭ-كەزەڭىمەن ىسكە اسىرىلۋدا. اعىمداعى جىلى وبلىستىق بيۋدجەتتەن 70 مەكتەپكە بەينەباقىلاۋ كامەرالارىن ورناتۋعا 250 ملن تەڭگە ءبولىندى. وسىعان وراي مەملەكەتتىك ساتىپ الۋدىڭ اشىق كونكۋرستارى وتكىزىلىپ, كامەرالاردى ورناتۋ جۇمىستارى جۇرگىزىلۋدە.
«قازاقتەلەكوم» اق وڭتۇستىك وڭىرلىك تەلەكوممۋنيكاتسيا ديرەكتسياسىنىڭ باس ديرەكتورى ۇسەنحان اۋباكىروۆ Smart City جوباسى اياسىندا اتقارىلاتىن جۇمىستاردى باياندادى. زامانۋي LoRaWAN تەحنولوگياسىن قولدانۋ, ينتەراكتيۆتى ەسەپتەۋ اسپاپتارىن ورناتۋ, اقىلدى جارىقتاندىرۋ, اقىلدى تۇراقتار سىندى كوممەرتسيالىق ۇسىنىستار زەردەلەنىپ جاتقاندىعىن جەتكىزدى.
