سپورت • 03 جەلتوقسان، 2020

ەرتۋعاننىڭ ەڭبەگى ەش كەتكەن جوق

135 رەت كورسەتىلدى

جۋىردا عانا شىمكەنتتە اياقتالعان قازاقستان چەمپيوناتىندا ەرەكشە كوزگە تۇسكەن بوكسشىلاردىڭ ءبىرى ەرتۋعان زەينۋلينوۆ. 63 كيلو سالماق دارەجەسىندە سىنعا تۇسكەن 23 جاستاعى جالىندى جاس بارلىق قارسىلاسىنان باسىم ءتۇسىپ، باس جۇلدەنى ولجالادى. وسى جارىستىڭ كۋاسى بولعان بىلىكتى باپكەرلەردەن باستاپ، كوگىلدىر ەكرانعا كوز تىككەن كورەرمەندەردىڭ بارلىعى دا ايتۋلى بىلعارى قولعاپ شەبەرىنىڭ ونەرىن جوعارى باعالادى، دەپ حابارلايدى Egemen.kz.

ەرتۋعان ءوزىنىڭ تۋىپ-وسكەن جەرى – الماتى وبلىسى قاراتال اۋدانىنىڭ ۇشتوبە قالاسىندا بوكستىڭ قىر-سىرىنا قانىقتى. جەر جانناتى – جەتىسۋدا الماس جىڭعىلباەۆتىڭ قول استىندا جاتتىعىپ، تىرناقالدى تابىستارىنا قول جەتكىزدى. سول كەزدەگى ونىڭ ەڭ ءىرى جەتىستىگى – بانگكوكتا وتكەن جاستاردىڭ ازيا بىرىنشىلىگىنىڭ قولا جۇلدەسى. ءوز قۇرداستارى اراسىندا زەينۋلينوۆ باسقا دا دودالاردا دارالاندى. ەسەيە كەلە الماتىداعى قازاقتىڭ سپورت جانە تۋريزم اكادەمياسىنا وقۋعا ءتۇسىپ، ول جەردە قايرات كارمەنوۆتەن ءتالىم-تاربيە الدى.

ايتۋلى بوكسشىنىڭ العاش رەت جارىق ەتىپ كوزگە تۇسكەن تۇسى – 2016 جىلى تاجىكستاننىڭ باس شاھارى – دۋشانبەدە ۇيىمداستىرىلعان ستۋدەنتتەر اراسىنداعى ازيا بىرىنشىلىگى. ءسوز ورايى كەلگەندە، قازاقستان رەسپۋبليكاسىنا ەڭبەك سىڭىرگەن جاتتىقتىرۋشى داستان سادۋاقاسوۆتىڭ كوماندا جاساقتاۋدا قىراعىلىعىن ەرەكشە اتاپ وتكەن ءجون. جاس بولسا دا، باس بولعان ايتۋلى مامان ەسىمى كوپشىلىككە بەيمالىم بوكسشىنى ەل قۇراماسىنا قوستى. پامير تاۋىنىڭ ەتەگىندە زەينۋلينوۆ سەنىمدى اقتاپ، كۇمىس مەدالدى ولجالادى. ارادا ەكى-ءۇش اي وتكەننەن سوڭ تايلاندتىڭ چيانگ-ماي قالاسىندا ستۋدەنتتەردىڭ الەم چەمپيوناتىنىڭ جالاۋى جەلبىرەدى. بۇل جارىستا ەرتۋعان قولا جۇلدەنى قورجىنعا سالدى.     

جوعارىداعى جاعداي جاس جىگىتتى قاناتتاندىردى. شىمكەنتتە ۇيىمداستىرىلعان ەل چەمپيوناتىندا ول ءوزىن جاقسى قىرىنان كورسەتتى. باستاپقى باسەكەلەردە قارسىلاستارىن ەش قينالماي ۇتقان ەرتۋعان جارتىلاي فينالدا ازيا بىرىنشىلىگىنىڭ كۇمىس جۇلدەگەرى زاكىر سافيۋللينگە ەسە جىبەردى. بۇل جەڭىلىسكە بولا 20 جاستاعى جىگىتتى ەشكىم سوكپەدى. ويتكەنى، قارسىلاسى تام ازۋلى ەدى. 31 جاستاعى زاكىردىڭ 60 كيلو سالماقتا ەلىمىزدىڭ ءبىرىنشى ءنومىرلى بوكسشىسى ەكەنىن جۇرت جاقسى بىلەدى. كەرىسىنشە، ونىڭ ساقا سپورتشىعا لايىقتى قارسىلىق كوسەتكەنىنە كۇش-جىگەرى جەتكەنىنە باپكەرلەرى دە، باسقالار دا ريزا بولدى. شىمكەنت ساپارىنان قولا مەدالمەن ورالعان زەينۋلينوۆ ۇلتتىق قۇراما ساپىنا قابىلداندى.

– رەسپۋبليكامىزدىڭ بارلىق وڭىرىنەن جينالعان بىلعارى قولعاپ شەبەرلەرى باس قوسقان جارىستا ۇزدىكتەر ساناتىنا قوسىلعاننان كەيىن جولىم وڭعارىلاتىن شىعار دەپ ويلادىم. بىراق، اياق استىنان قىرسىق شالدى. ابايسىزدا اياعىمدى سىندىرىپ الىپ، ءبىر جىلعا جۋىق ۋاقىت ەمدەلدىم. جاتتىعۋ مەن جارىستار جايىنا قالدى. بىراق مەن كۇدەرىمدى ۇزبەدىم. جازىلعاننان سوڭ بارىمدى سالىپ دايارلاندىم. ەرەڭ ەڭبەكتىڭ ەش كەتپەيتىنىنە سەندىم. وسى ورايدا ءوزىمنىڭ جەكە باپكەرلەرىم – الماس جىڭعىلباەۆ پەن قايرات كارمەنوۆكە، قازاقتىڭ سپورت جانە تۋريزم اكادەمياسىندا پرەزيدەنتى قايرات زاكيريانوۆ جانە وسى ءبىلىم ورداسىندا ەڭبەك ەتىپ جۇرگەن جاتتىقتىرۋشىلار – ەدۋارد گابدۋلوۆ، بەكەن بەكمۇحامەدوۆ، جەتكەرگەن مالشيەۆ، باقىت سارسەكباەۆ، داستان سادۋاقاسوۆقا ءوز ريزاشىلىعىمدى بىلدىرەمىن. سونداي-اق، جەكە كاسىپكەرلەر تولەگەن ماقاشەۆ پەن سەرىك ايداربەكوۆكە دە العىسىم شەكسىز. وسى اعالارىمنىڭ قولداۋىنىڭ ارقاسىندا ەشتەڭەگە الاڭداماي، كوزدەگەن ماقساتىما قول جەتكىزۋگە مۇمكىندىك تۋىندادى، – دەيدى ەرتۋعان زەينۋلينوۆ.

2019 جىلى جاراقاتىنان تولىقتاي ايىققان ەرتۋعان حالىقارالىق تۋرنيرلەردە قايتا اتوي سالدى. الماتىداعى ساعادات نۇرماعامبەتوۆ، اتىراۋداعى يساتاي مەن ماحامبەت جانە اقتاۋداعى شوقىر بولتەك ۇلىن ەسكە تۇسىرۋگە ارنالعان جارىستاردا جۇلدەگەرلەر ساناتىنا قوسىلدى. جىل سايىن الاتاۋ باۋرايىندا ۇزدىكسىز ۇيىمداستىرىلىپ تۇراتىن قايرات رىسقۇلبەكوۆتىڭ تۋرنيرىندە التىن تۇعىرعا كوتەرىلدى. شىمكەنتتەگى قاراكوز ابداليەۆتىڭ ءداستۇرلى دوداسىندا دا قارسىلاس شاق كەلتىرمەدى. سول باسەكەلەردە نەبىر مىقتىلارمەن كۇش سىناسقان زەينۋلينوۆتىڭ شەبەرلىگى ابدەن شىندالىپ، وزىنە دەگەن سەنىمى ارتا ءتۇستى.

جۋىردا شىمكەنتتە وتكەن ەل چەمپيوناتىندا ەرتۋعان زەينۋلينوۆ 63 كيلو سالماقتا ونەر كورسەتتى. باستاپقى باسەكەلەردە تارازدىق ءالىمجان بەسكەمپىر مەن نۇرسۇلتاندىق تەمىرحان تەزەكتى تىزە بۇكتىرسە، شيرەك فينالدا ماڭعىستاۋلىق ءدىلشات نۇرىمدى ەڭسەردى. ءبىر وكىنشتىسى، وسى جەكپە-جەكتە الماتى وبلىسى وكىلىنىڭ ساۋساعى سىنىپ كەتتى. ەندى الدا ەكى جول بار. جارىستى ارى قاراي جالعاستىرىپ، چەمپيوندىق تۇعىرعا كوتەرىلۋ ءۇشىن ايقاسقا شىعۋ نەمەسە قولا مەدالدى قاناعات ۇتىپ، قايتا ەم-دوم قابىلداۋ. جاعدايدى باپكەرىنە ايتاپ كورگەن ەدى، قايرات كارمەنوۆ «قولىڭ ءتۇسىپ قالسا دا، جۇدىرىقتاساسىڭ» دەپ اڭگىمەنى شورت كەستى. بوكسشى باسىن يزەپ، كەلىسكەندەي سىڭاي تانىتتى. كەلەسى كۇنى زەينۋلينوۆتى جارتىلاي فينالدىق سايىس كۇتىپ تۇردى.

– ءبىزدىڭ ودان باسقا امالىمىز جوق ەدى، –دەپ باپكەرى قايرات كارمەنوۆ اڭگىمەنى ارى قاراي جالعاستىردى. – سەبەبى، ەرتۋعان 2018 جىلى اياعىن سىندىرىپ العاننان كەيىن ۇلتتىق قۇرامادان شىعىپ قالدى. جاتتىعۋ پروتسەسسىن ارى قاراي جالعاستىرىپ، جارىستارعا شىعۋ ءۇشىن ءوزىمىز قارجى ىزدەپ الەك بولدىق. تىپتەن، كۇللى الەمدى دۇرلىكتىرگەن پاندەميا كەزىندە دە بوس جاتپادىق. ىندەت باستالماي تۇرىپ، الماتى وبلىسى اقسۋ اۋدانىنىڭ تاراس اۋىلىنا اتتاندىق. سول جەردە تولەگەن ماقاشەۆ ەسىمدى ديقانشى-كاسىپكەر ءبىزدىڭ الاڭسىز جاتتىعۋىمىز ءۇشىن قولايلى جاعداي جاسادى. تىپتەن، ەل چەمپيوناتىنا بارىپ-قايتۋ ءۇشىن قاجەتتى قاراجاتتى دا سول كىسى ءوز قالتاسىنان بەردى. ءسويتىپ، ەكى ايعا جۋىق ۋاقىت بويى جاقسىلاپ تۇرىپ جاتتىعىپ، شىمكەنتكە ناعىز بابىمىزدا اتتاندىق.

جارتىلاي فينالدا زەينۋلينوۆتىڭ جولى ءدىلمۇرات ميجيتوۆپەن قيىستى. الماتى قالاسىنىڭ وكىلى سوڭعى جىلدارى ەل بىرىنشىلىگىندە ۇنەمى جۇلدەگەرلەر قاتارىنان كورىنۋدە. ەكى ماۋسىم بويى ول دۇنيەجۇزىلىك بوكس سەرياسى دوداسىندا «استانا ارلاندارى» ساپىندا ونەر كورسەتتى. مىنە، وسى ساقا سپورتشىعا قارسى سىنىق قولىمەن جۇدىرىقتاسقان قانداسىمىز تاكتيكالىق تۇرعىدان وتە ساۋاتتى قيمىلداپ، كۇمانسىز جەڭىسكە جەتتى.

فينالدا ەرتۋعان زاكىر سافيۋللينمەن كۇش سىناسقىسى كەلدى. سەبەبى، وسىدان ءۇش جىل بۇرىن ءدال وسى بوكسشىدان ول ەل چەمپيوناتىنىڭ جارتىلاي فينالىندا ۇتىلعان بولاتىن. سودان بەرى تالاي دۇرمەكتى كورگەن جاس جىگىتتىڭ شەبەرلىگى ابدەن شىڭدالدى. ەندى ءوزىنىڭ مىقتىلىعىن مويىنداتۋ ءۇشىن وليمپيادا ليتسەنزياسىنا يەلىك ەتكەن ساڭلاقتى جەڭۋ قاجەت ەدى. بىراق باستاپقى باسەكەلەرىنىڭ بىرىندە جاراقات العان زاكىر جارىستى جالعاستىرۋدان باس تارتتى. ەندى اقتىق سىندا ونى بولات ەرسۇلتان كۇتىپ تۇردى. الايدا كورەرمەندەر دارىندى جاستاردىڭ ايقاسىن كورە المادى. جارتىلاي فينالدا جاراقاتتانعان اقمولا وبلىسىنىڭ وكىلى شارشى الاڭعا شىقپادى. وسىلايشا، زەينۋلينوۆ ءوزى كوپتەن بەرى ارمانداپ جۇرگەن قازاقستان چەمپيونى دەگەن اتاققا قول جەتكىزدى.

كەلەسى جىلى توكيو وليمپياداسىنىڭ الاۋى تۇتانادى. وعان ەرتۋعاننىڭ بارا المايتىنى انىق. ويتكەنى، عالامدىق دودانىڭ ليتسەنزياسى 34 جاستاعى ارداگەر بوكسشى زاكىر ءسافيۋللينىڭ ۋىسىندا. دەسەك تە، الدا الەم مەن قۇرلىق چەمپيوناتتارى جانە ازيا ويىندارى سەكىلدى كوپتەگەن بايراقتى باسەكەلەر بار. مىنە، الماس جىڭعىلباەۆ پەن قايرات كارمەنوۆتىڭ شاكىرتى وسى جارىستاردا جاسىنداي جارقىرايدى دەپ ۇمىتتەنەمىز. 

سوڭعى جاڭالىقتار

جىلجىمالى زەرتحانالار جولعا شىقتى

مەديتسينا • بۇگىن، 21:25

بيىل 200 جاڭا مەكتەپ سالىنادى

ءبىلىم • بۇگىن، 14:47

ۇقساس جاڭالىقتار