23 قاراشادا قاراعاندى وبلىسىنىڭ پد كريمينالدىق پوليتسيا باسقارماسىنا رەسەي ءىىم سامارا وبلىسى بويىنشا باس باسقارماسىنان اسا اۋىر قىلمىس جاسادى دەگەن كۇدىكپەن ىزدەۋدە جۇرگەن 43 جاستاعى رەسەي ازاماتىنىڭ قاراعاندى وبلىسىنىڭ اۋماعىندا بولۋى مۇمكىن دەگەن اقپارات كەلىپ ءتۇستى.
رەسەي تاراپىنان كەلىپ تۇسكەن مالىمەتتەر بويىنشا, اتالعان ازامات 2005 جىلى رەسەي فەدەراتسياسىنىڭ سامارا وبلىسىنىڭ اۋماعىندا سىبايلاستارىمەن بىرگە جابىرلەنۋشىنى (رەسەي ازاماتى) ۇرلاپ كەتكەن. كەيىننەن ونى بالتالاپ ءولتىرىپ, ءمايىتىن ورتەپ, قالعانىن جاقىن ماڭداعى سۋ قويماسىنا باتىرىپ جىبەرگەن.
اتالعان فاكت بويىنشا رەسەي فەدەراتسياسى قىلمىستىق كودەكسىنىڭ 105-بابىنىڭ 2-بولىگى (ادام ءولتىرۋ) بويىنشا قىلمىستىق ءىس قوزعاعان.
30 قاراشادا تەمىرتاۋ قالاسىندا جەدەل-ىزدەستىرۋ ءىس-شارالارىن جۇرگىزۋ بارىسىندا قاراعاندى وبلىسىنىڭ پد كريمينالدىق پوليتسيا باسقارماسىنىڭ قىزمەتكەرلەرى ون بەس جىل بويى قاشىپ جۇرگەن رەسەيلىك ازاماتتى انىقتاپ, ۇستادى.
ىزدەۋدە جۇرگەن كۇدىكتى ۋاقىتشا ۇستاۋ يزولياتورىنا قامالىپ, بۇل تۋرالى رەسەي ءىىم باس باسقارماسىنا حابارلاندى.
