تۇركىستان وبلىسىندا العاش رەت مۇگەدەكتىككە شىعۋ دەڭگەيى 18 پايىزعا تومەندەدى

ايماقتار • 02 جەلتوقسان، 2020

تۇركىستان وبلىسىندا العاش رەت مۇگەدەكتىككە شىعۋ دەڭگەيى 18 پايىزعا تومەندەدى

14 رەت كورسەتىلدى

مۇگەدەكتىكتىڭ الدىن-الۋ ماقساتىندا انىقتاۋ، پروفيلاكتيكالىق جانە ەمدەۋ شارالارىن جۇرگىزۋ ناتيجەسىندە 2019 جىلمەن سالىستىرعاندا تۇركىستان وبلىسىندا العاش رەت مۇگەدەكتىككە شىعۋ دەڭگەيى 18%-عا تومەندەدى. بۇل تۋرالى قر پرەمەر-ءمينيسترى اسقار ءماميننىڭ توراعالىق ەتۋىمەن وتكەن ۇكىمەت وتىرىسىندا تۇركىستان وبلىسىنىڭ اكىمى ومىرزاق شوكەەۆ مالىمدەدى، دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.

Marzhan Tileubekova

مۇمكىندىگى شەكتەۋلى جانداردى الەۋمەتتىك قورعاۋ ماسەلەلەرى قارالعان وتىرىستا وبلىس اكىمى بۇل باعىتتا اتقارىلىپ جاتقان جۇمىستار جايلى باياندادى.

«تۇركىستان وبلىسىندا 94 500 مۇمكىندىگى شەكتەۋلى ازاماتتار تۇرادى، بۇل وبلىس حالقىنىڭ 5%-ن قۇرايدى. مۇمكىندىگى شەكتەۋلى ازاماتتاردى وڭالتۋ شارالارىمەن قامتاماسىز ەتۋ ءۇشىن بيۋدجەتتىڭ بارلىق كوزدەرىنەن بولىنگەن قارجى 22%-عا ۇلعايىپ، 2020 جىلى 4،8 ملرد. تەڭگەنى قۇرادى. ناتيجەسىندە، 34 مىڭنان استام ادام نەمەسە قاجەتتىلىكتىڭ 74%-ى وڭالتۋدىڭ تەحنيكالىق قۇرالدارىمەن جانە الەۋمەتتىك قىزمەتتەرىمەن قامتىلاتىن بولادى»،- دەدى ومىرزاق شوكەەۆ.

تۇركىستان وڭىرىنە وبلىس مارتەبەسى بەرىلىپ، قايتا جاڭعىرۋىنا بايلانىستى مۇگەدەكتەرگە ارنالعان زاماناۋي وڭالتۋ ورتالىعىن قۇرۋ قاجەتتىلىگى تۋىنداۋدا. بۇگىنگى تاڭعا، مۇگەدەكتەرگە ارنالعان سىيىمدىلىعى

50 ورىندىق 6 الەۋمەتتىك نىساننىڭ جانە 200 ورىندىق وڭالتۋ ورتالىعىنىڭ قۇرىلىسىن جۇرگىزۋگە جوبالاۋ-سمەتالىق قۇجاتتامالارى ازىرلەنىپ، 2024 جىلعا دەيىن كەزەڭ-كەزەڭىمەن جۇرگىزىلەتىن بولادى. ونىڭ ىشىندە 50 ورىندىق 3 نىساننىڭ قۇرىلىسى بيزنەستىڭ الەۋمەتتىك جاۋاپكەرشىلىگى اياسىندا جۇرگىزۋ جوسپارلانعان.

«ۇلتتىق جوسپاردىڭ ماڭىزدى باعىتى مۇمكىندىگى شەكتەۋلى ازاماتتارعا قولجەتىمدى ورتا قۇرۋ. وسى باعىتتا وبلىستا بەيىمدەلۋگە جاتاتىن 2 895 نىساننىڭ 98%-ى سايكەستەندىرىلگەن. وسى باعىتتاعى جۇمىستاردى جالعاستىرۋ ءۇشىن باسقارما جانە قوعامدىق ۇيىمدار تاراپىنان مونيتورينگ جۇرگىزىلىپ، قولجەتىمدى ورتانى ودان ارى ارتتىرۋ بويىنشا ءتيىستى ءىس-شارالار اتقارىلۋدا. بيىلعى جىلى پيلوتتىق رەجيمدە باستاما العان «الەۋمەتتىك قىزمەتتەر پورتالى» مۇمكىندىگى شەكتەۋلى ازاماتتار ءۇشىن

2021 جىلى تولىق ىسكە اسىرىلادى»، - دەدى وبلىس اكىمى.

بۇگىنگى كۇنگە مۇگەدەكتىگى بار ازاماتتاردىڭ 94%-ى ەلەكتروندىق-تسيفرلىق قولتاڭبا الدى. بۇل 42 مىڭعا جۋىق مۇگەدەكتىگى بار ازاماتتارعا وڭالتۋ شارالارىن ساپالى جانە دەلدالسىز ەركىن تاڭداۋعا تيىسىنشە، تولىق مۇمكىندىك بەرەدى.

وڭىردەگى ەرەكشە ءبىلىم بەرۋدى قاجەت ەتەتىن بالالاردىڭ 48%-ى (17 272 بالا) ينكليۋزيۆتى جانە ارنايى بىلىممەن وقىتىلۋدا. مۇگەدەكتىكتىڭ الدىن-الۋ ماقساتىندا انىقتاۋ، پروفيلاكتيكالىق جانە ەمدەۋ شارالارىن جۇرگىزۋ ناتيجەسىندە 2019 جىلمەن سالىستىرعاندا العاش رەت مۇگەدەكتىككە شىعۋ دەڭگەيى 18%-عا تومەندەدى.

جالپى، مۇمكىندىگى شەكتەۋلى جانداردىڭ 60%-ى، نە 59،2 مىڭ ادام ەڭبەككە قابىلەتتى جاستاعى ازاماتتار. ولاردى جۇمىسپەن قامتۋ ۇلەسىن ۇلعايتۋ ماقساتىندا «ەڭبەك» مەملەكەتتىك باعدارلاماسى شەڭبەرىندە بەلسەندى شارالار قاراستىرىلعان. 2020 جىلدىڭ 1 قاراشاسىنا ەڭبەككە جارامدى 1 610 مۇگەدەك جۇمىسپەن قامتۋ شارالارىنا تارتىلىپ، جوسپار 111 %-عا ورىندالدى. ونىڭ ىشىندە 541 ادام تۇراقتى، 1039 ادام ۋاقىتشا جۇمىسقا، 30 ادام قىسقا مەرزىمدى كاسىپتىك وقۋعا جولداندى. 572 ادامعا كۆوتا بەلگىلەنىپ، 263 ادام جۇمىسپەن قامتىلدى. 2021 جىلى مۇگەدەك جانداردى كۆوتامەن جۇمىسقا ورنالاستىرۋ ءۇشىن 1 334 كاسىپورىندا 3 331 مۇگەدەككە ورىن بەلگىلەنگەن.

ۇكىمەت وتىرىسىندا پرەمەر-مينيستر اسقار مامين جىل سوڭىنا دەيىن مۇمكىندىگى شەكتەۋلى جاندار ءۇشىن 100% كەدەرگىسىز قولجەتىمدىلىكتى قامتاماسىز ەتۋ جونىندەگى جول كارتاسىن ازىرلەۋدى تاپسىردى. اكىمدىكتەرگە مۇمكىندىگى شەكتەۋلى جانداردى الەۋمەتتىك قىزمەت كورسەتۋ پورتالى ارقىلى وڭالتۋ قۇرالدارىن الۋ داعدىلارىنا وقىتۋدى جاڭعىرتۋ، تسيفرلىق دامۋ مينيسترلىگىمەن بىرلەسىپ، جۇمىسپەن قامتۋ ورتالىقتارى مەن حقكو-لاردا مۇگەدەك ادامدار ءۇشىن وزىنە – ءوزى قىزمەت كورسەتۋ ايماقتارىن ۇلعايتۋ تاپسىرىلدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز