داررەن ديتس كانادانىڭ البەرتا پروۆينتسياسىنىڭ مەديسين-حات دەپ اتالتىن شاعىن قالاسىندا دۇنيە ەسىگىن اشتى. ءوزىنىڭ سپورتتىق كارەراسىنىڭ العاشقى كەزەڭدەرىن ول «مونرەال كاناديەنستىڭ» امەريكا حوككەي ليگاسىنداعى (احل) ونەر كورسەتەتىن «گاميلتون بۋلدوگس» پەن «سەنت-دجونس ايسكەپس دەپ اتالاتىن فارم-كلۋبتارىندا باستادى. ىشكى بىرىنشىلىكتە كوزگە ءتۇسىپ, قىراعى ماماندار نازارىن بىردەن وزىنە اۋداردى. سودان 2015-2016 جىلعى ماۋسىمدى ۇلتتىق حوككەي ليگاسىندا (ۇحل) وتكىزدى. بىراق ديتس «مونرەال كاناديەنستە» كوپ تۇراقتاعان جوق. كوپ ۇزاماي ايتۋلى قورعاۋشى احل-عا قايتا ورالدى.
2017 جىلى داررەن قازاقستانعا قونىس اۋدارىپ, «بارىستىڭ» جەيدەسىن كيدى. كەلگەن بەتتە ول ايقىشتى ونەر كورسەتىپ, ەلوردالىق جانكۇيەرلەردىڭ سۇيىكتى ويىنشىلارىنىڭ بىرىنە اينالدى. ونىڭ نەگىزگى امپلۋاسى قورعاۋشى بولعانىمەن, ديتس ءوز مىندەتىن مۇلتىكسىز اتقارىپ قانا قويماي, ءجيى-ءجيى شابۋىلدارعا دا ارالاسىپ تۇرادى. كانادالىق لەگيونەر سان مارتە وڭتايلى پاس بەرىپ, ماڭىزدى گولدار سوققانىن دا كوزىمىز كوردى. 2019 جىلى قازاقستاننىڭ ازاماتتىعىن العان داررەن سول كەزدەن بەرى ۇلتتىق قۇراما كوماندامىزدىڭ ساپىندا ونەر كورسەتۋدە.
داررەن ءديتستىڭ قول جەتكىزگەن تابىستارىنا كەلەر بولساق, ول 2019 جىلى قازاقستان قۇراماسى ساپىندا الەم بىرىنشىلىگىندە («ا» ديۆيزيونى) ءبىرىنشى ورىن الدى. سول جارىستىڭ شارتتى قۇراماسىنا ەندى. قاتارىنان ەكى جىل بويى قحل-دىڭ «جۇلدىزدار ماتچىندا» وينادى. كانادالىق قورعاۋشى جىلىنا 75 ميلليون رۋبل (421 ميلليون تەڭگە نەمەسە 999 مىڭ اقش دوللارى) مولشەرىندە جالاقى الادى ەكەن.
بۇل تىزىمدە ماسكەۋدىڭ «دينامو» كلۋبىنىڭ قوس ويىنشىسى كوش باستاپ تۇر. 33 جاستاعى شابۋىلشى ۆاديم شيپاچەۆتىڭ جىلدىق جالاقاسى 120 ميلليون ءرۋبلدى قۇراسا, 27 جاستاعى سۇرمەرگەن دميتري ياشكين 95 ميلليوندى قالتاعا باسادى. ءۇشىنشى جانە ءتورتىنشى ورىنداردى ۋفانىڭ «سالاۆات يۋلاەۆى» ساپىندا جاسىنداي جارقىراپ جۇرگەن 30 جاستاعى سۋومي ەلىنىڭ وكىلى تەەمۋ حارتيكاينەن مەن ەكاتەرينبۋرگتىڭ «اۆتوموبيليست» كلۋبىنىڭ 32 جاستاعى چەحيالىق قاقپاشىسى ياكۋب كوۆارج ءوزارا بولىسۋدە. ولاردىڭ ارقايسىسى 95 ميلليوننان يەمدەنۋدە. سونداي-اق, قحل-دا ەڭ كوپ ەڭبەكاقى الاتىن حوككەيشىلەر قاتارىندا كاندالىق دجاستين ازەۆەدو مەن شۆەتسيالىق انتون لاندەر (85 ملن.) جانە دانيالىق فيليپ لارسەن مەن فينليانديالىق يۋحا مەتسولا (80 ملن.) سىندى ساڭلاقتار بار.
ءبىر جىلدىق جالاقاسى ءدال داررەن ديتستىكىندەي 75 ميلليون ءرۋبلدى قۇرايتىن تاعى التى ويىنشى بار. ولار – الەكسەي مارچەنكو (رەسەي, «لوكوموتيۆ» ياروسلاۆل), اندرە پەتەرسسون (شۆەتسيا, «لوكوموتيۆ» ياروسلاۆل), سەرگەي پلوتنيكوۆ (رەسەي, «مەتاللۋرگ» ماگنيتوگورسك»), ماگنۋس پيايارۆي (شۆەتسيا, «دينامو» ماسكەۋ), انتون سلەپىشەۆ (رەسەي, تسسكا ماسكەۋ) جانە ۆلاديمير تكاچەۆ (رەسەي, «لوكوموتيۆ» ياروسلاۆل).
