ارينە, وعان ەش تاڭدانۋعا بولماس. ويتكەنى, قازىرگى كەزدە قازاقستاننىڭ بىلعارى قولعاپ شەبەرلەرى اراسىندا جالعىز گەننادي گولوۆكين عانا ەڭ بەلدى نۇسقالار بويىنشا الەم چەمپيونى اتاعىن يەلەنۋدە. ازىرگە وزگە جىگىتتەرىمىز ونداي تابىستارىمەن ماقتانا المايدى. GGG ء–نىڭ شارشى الاڭعا شىقپاعانىنا ءبىر جىلدان اسا ۋاقىت وتسە دە, ودان بەدەلىنە ەش نۇسقان كەلگەن جوق. ەستەرىڭىزگە سالا كەتەيىك, سوڭعى رەت جەرلەسىمىز 2019 جىلدىڭ 5 قازانىندا ۋكراينالىق سەرگەي دەرەۆيانچەنكودان باسىم تۇسكەن بولاتىن. ەندى ول 18 جەلتوقساندا پولشالىق كاميل شەرمەتامەن كۇش سىناسۋعا ءتيىس. بارلىعى 42 رەت رينگكە كوتەرلىگەن GGG 40 جەكپە-جەكتى ءوز پايداسىنا شەشتى. 35 قارسىلاسىن نوكاۋتقا جىبەردى. ءبىر رەت ۇتىلىپ, ءبىر باسەكەدە تەڭ ەسەپ تىركەلدى.
ال ۇزدىكتەر تىزىمىندە گەننادي گولوۆكيننەن كەيىنگى ساتىلارعا دانيار ەلەۋسىنوۆ (10-0, 6 كو), قانات يسلام (27-0, 21 كو), باتىر جۇكەمباەۆ (18-0, 14 كو), ءالي احمەدوۆ (16-0, 12 كو), جانىبەك ءالىمحان ۇلى (9-0, 5 كو), مەيىرىم نۇرسۇلتانوۆ (13-0, 8 كو), ايدوس ەربوسىن ۇلى (14-0, 9 كو), سادريددين احمەدوۆ (11-0, 10 كو) جانە جان كوسوبۋتسكي (14-0, 13 كو) سىندى ساڭلاقتار جايعاستى.
