باتىس قازاقستان وبلىسىنىڭ ورال قالاسىنداعى «كروۋن-باتىس» جاۋاپكەرشىلىگى شەكتەۋلى سەرىكتەستىگىنىڭ ديرەكتورى جاۋاپقا تارتىلدى. بۇل تۋرالى «موي گورود» پورتالى حابارلادى.
كەشە قالالىق سوتتا سۋديا ماعيرا قيتاروۆا ەۆگەني اليەۆتى قىلمىستىق كودەكستىڭ 177-بابى, 3-تارماعىندا قاراستىرىلعان «ءىرى كولەمدەگى الاياقتىق» جاسادى دەپ ايىپتاپ, مۇلكىن تاركىلەي وتىرىپ, ءۇش جىلعا باس بوستاندىعىنان ايىرۋعا ۇكىم شىعاردى. ول جازاسىن جالپى رەجىمدەگى كولونيادا وتەيتىن بولادى. ال زەلەنوۆ اۋدانى كاسىپكەرلىك جانە اۋىل شارۋاشىلىعى ءبولىمىنىڭ بۇرىنعى باستىعى نۇرلان اقاەۆ «سالدىر-سالاقتىعى» ءۇشىن ايىپتالىپ, 1 جىلعا باس بوستاندىعى شەكتەلدى. الايدا, ول راقىمشىلىققا ءىلىنىپ, جاۋاپكەرشىلىكتەن بوساتىلدى.
قىلمىستىق ىستە كورسەتىلگەندەي, 2011 جىلى «كروۋن-باتىس» جاۋاپكەرشىلىگى شەكتەۋلى سەرىكتەستىگى سيىر ەتىن دايىنداۋشىلار ءۇشىن بەرىلەتىن ارزانداتىلعان باعاداعى قۇراما جەمگە سۋبسيديا الاتىندار تىزىمىنە ەنگىزىلگەن. وسىنىڭ نەگىزىندە سەرىكتەستىك دايىنداعان ءار كيلو ەت ءۇشىن مەملەكەتتىك بيۋدجەتتەن 220 تەڭگە اقشا ءبولىنىپتى. قوماقتى قارجىنى يەلەنىپ قالۋ ماقساتىمەن ە. اليەۆ زەلەنوۆ اۋدانىنداعى كاسىپكەرلىك جانە اۋىلشارۋاشىلىعى بولىمىنە وندىرىلگەن ەت جونىندە جالعان مالىمەت ۇسىنعان. وسى ءبولىمدى كەزىندە باسقارعان ن. اقاەۆ قۇجاتتاردىڭ تالاپقا ساي ەمەستىگىن بىلە تۇرا, سەرىكتەستى سۋبسيديا الاتىندار تىزىمىنە ەنگىزىپ جىبەرىپتى. سونىڭ سالدارىنان ە. اليەۆ باسقاراتىن سەرىكتەستىككە 13 ملن. 828 مىڭ تەڭگە تولەنگەن. وسى سومانى سۋديا سەرىكتەستىك باسشىسىنا مەملەكەتكە كەرى قايتارۋعا مىندەتتەدى
ۇكىم ءالى زاڭدى كۇشىنە ەنگەن جوق.
باقىتبەك كەنەش ۇلى.
دەرەككوز: «موي گورود»
