كاسىپقوي رينگتە 13 كەزدەسۋ وتكىزىپ ۇلگەرگەن 29 جاستاعى قانداسىمىز بارلىعىندا جەڭىسكە جەتىپ, توعىز باسەكەنى مەرزىمىنەن بۇرىن اياقتادى. سوڭعى رەت ايدوس ەربوسىن ۇلى بيىل جازدا مينسكىدە گەرمانيانىڭ تۋى استىندا ونەر كورسەتىپ جۇرگەن نيگەريالىق بوكسشى نۋحۋ ناۆالدى ۇپاي سانىمەن ۇتتى. قازىرگى كەزدە ول WBC Asia, WBA International جانە WBO Global نۇسقالارى بويىنشا التىن بەلبەۋلەردى يەلەنۋدە.
ايدوسقا قارسىلاس اتانعان جىگىتتىڭ جاسى 31-دە. يسسا سامير كەزىندە اۋەسقويلار اراسىندا دا ءوزىن جاقسى قىرىنان كورسەتىپ, بۇكىلافريكا ويىندارىندا كۇمىس مەدالدى موينىنا ءىلدى. 2011 جىلدان بەرى ول كاسىپقوي رينگتە كۇش سىناسۋدا. سول ارالىقتا 19 رەت شارشى الاڭعا كوتەرىلىپ, بارلىق باسەكەلەستەرىنەن باسىم ءتۇستى. 16 جەكپە-جەكتى يسسا نوكاۋتپەن اياقتادى.
سونداي-اق ايتۋلى جارىستا بەكزات نۇرداۋلەتوۆتە ونەر كورسەتەدى. كاسىپقوي رينگكە ەكىنشى رەت شىققالى وتىرعان الەم چەمپيونى 40 جاستاعى نيگەريالىق كابيرۋ توۆولاۆيمەن جۇدىرىقتاسادى. قارا قۇرلىقتىڭ وكىلى بۇعان دەيىن 15 كەزدەسۋ وتكىزىپ, 13 رەت ۇستەمدىك تانىتقان.
