27 قاراشادا قازاقستان رەسپۋبليكاسى ورتالىق سايلاۋ كوميسسياسىنىڭ «قر سايلاۋ تۋرالى» كونستيتۋتسيالىق زاڭىنىڭ 87 جانە 89-باپتارىنا سايكەس «ADAL» قب ساياسي پارتياسى پارلامەنت ءماجىلىسى دەپۋتاتتارىنىڭ سايلاۋىنا كانديداتتاردى ۇسىنۋ تۋرالى قۇجاتتارىن تاپسىردى. ۇمىتكەرلەردىڭ قورىتىندى تىزىمىنە پارتيانىڭ 16 وكىلى كىردى:
- ولجاس ورداباەۆ - «اتامەكەن» ۇلتتىق كاسىپكەرلەر پالاتاسى توراعاسىنىڭ ورىنباسارى, ءبىلىم بەرۋ سالاسىنىڭ ساراپشىسى;
- ماقسات تولىقباي – بەلگىلى تەلەجۋرناليست, «اشىق الاڭ» تەلەجوباسىنىڭ جۇرگىزۋشىسى, Maltabu.kz سايتىنىڭ اۆتورى;
- المازبەك سادىرباەۆ –«شوپان اتا» قازاقستان قوي وسىرۋشىلەرى قاۋىمداستىعىنىڭ توراعاسى;
- داۋلەت مۇقاەۆ – تەلەجۋرناليست, قوعام بەلسەندىسى;
- لاۋرا ماليكوۆا – «تاجىريبەلى ەكولوگتار قاۋىمداستىعىنىڭ» توراعاسى;
- جيگۋلي دايراباەۆ - «قازاقستان فەرمەرلەر وداعى» رەسپۋبليكالىق قوعامدىق بىرلەستىگىنىڭ پرەزيدەنتى»;
- ارداق نازاروۆ – بەلگىلى سپورتشى, قوعام بەلسەندىسى;
- اقمارال بەكمۇرزاەۆا – بيزنەس-ترەنەر, كاسىپكەر;
- يگور شاتسكي –كاسىپكەرلەر قۇقىعىن قورعاۋ جونىندەگى ساراپشى;
- نۇرلىبەك مالەلوۆ – قارجىگەر, مەملەكەت قايراتكەرى;
- عالىمبەك جاقسىلىقوۆ – قوعام قايراتكەرى, قىزىلوردا وبلىسىنىڭ بەلسەندى تۇرعىنى;
- الينا اسقارقىزى – بيزنەس-ءبىلىم بەرۋ سالاسىن باسقارۋ جونىندەگى مامان, ساراپشى;
- لاززات شىڭعىسباەۆا - «مەنىڭ اتامەكەنىم» الەۋمەتتىك قورىنىڭ توراعاسى;
- عاني ابادان – پارتيانىڭ الماتى قالالىق فيليالىنىڭ توراعاسى;
- سەرىك سۇلتانعالي - «ADAL» پارتياسىنىڭ توراعاسى;
- ەلدار جۇماعازيەۆ – مەملەكەت جانە قوعام قايراتكەرى, بىرقاتار ءبىلىم جانە الەۋمەتتىك جوبالاردىڭ اۆتورى, ەكونوميست, ساياساتتانۋشى;
ايتا كەتەيىك, «قازاقستان رەسپۋبليكاسىنداعى سايلاۋ تۋرالى» جانە «ساياسي پارتيالار تۋرالى» زاڭدارعا سايكەس پارتيالىق تىزىمدە ايەلدەر مەن جاستاردىڭ 30% كۆوتالىق ۇلەسى ساقتالعان.
ورتالىق سايلاۋ كوميسسياسى پارتيادان ءتىزىم تۇسكەننەن كەيىن كانديداتتاردىڭ كونستيتۋتسيامەن جانە «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭمەن قويىلاتىن تالاپتارعا سايكەستىگى انىقتالاتىنىن حابارلادى.
سونداي-اق وبلىستىق اۋماقتىق سايلاۋ كوميسسيالارىنا «ADAL» پارتياسىنىڭ ايماقتىق فيليالدارىنان قۇجاتتار تۇسە باستاعانىن حابارلايمىز. قازىرگى ۋاقىتتا كوميسسياعا اقتوبە وبلىستىق ءماسليحاتىنىڭ دەپۋتاتتىعىنا كانديداتتاردىڭ پارتيالىق تىزىمدەر بويىنشا قۇجاتتارى بەرىلدى. جاقىن ارادا قاجەتتى قۇجاتتار باسقا وڭىرلىك سايلاۋ كوميسسيالارىنا تاپسىرىلاتىن بولادى.
ەستەرىڭىزگە سالا كەتەيىك, 19 قاراشا كۇنى نۇر-سۇلتان قالاسىندا «ADAL» ساياسي پارتياسىنىڭ VII سەزى ءوتتى. ءىس-شارا بارىسىندا سايلاۋالدى باعدارلامانىڭ جوباسى ۇسىنىلىپ, پارتيانىڭ سايتى تانىستىرىلدى.
