قوعام • 27 قاراشا، 2020

الەمدى قىزعىلت سارى ەتەيىك

سارسەنبىنىڭ ساتىنەن باستاپ بۇكىلالەمدىك گەندەرلىك زورلىق-زومبىلىققا قارسى 16 كۇندىك بەلسەندىلىك ناۋقانى باستالدى. وسى ورايدا قازاقستانداعى اقش وكىلدىگى گەندەرلىك زورلىق-زومبىلىقتىڭ سالدارى جايىندا الەۋمەتتىك بەلسەندىلىكتىڭ 16 كۇندىك اكتسياسىن اشىق دەپ جاريالادى.

ايا ءومىرتاي

ناۋقان كۇندەرى اتالعان ماسەلە بويىنشا ساراپشىلار مەن ادۆوكاتتار گەندەرلىك قۇقىقتار مەن ەركىندىكتەردى جۇزەگە اسىرۋ بويىنشا تالقىلاۋ وتكىزەدى. الەۋمەتتىك جەلىدەگى ناۋقانمەن بىرگە، بىرىككەن ۇلتتار ۇيىمىنىڭ «2030 جىلعا قاراي ايەلدەرگە قاتىستى زورلىق-زومبىلىقتى بىرلەسىپ توقتاتامىز» اتتى كومپانياسىن قولداپ، ونىڭ «الەمدى قىزعىلت سارى ەتەيىك: قارجىلاندىرۋ، جاۋاپ بەرۋ، الدىن الۋ، جيناۋ!» دەگەن جاھاندىق تاقىرىبىنا ساي نۇر-سۇلتان قالاسىنداعى اقش ەلشىلىگى ءوز عيماراتىنىڭ سىرتىنا 16 كۇن بويى كەشكى ۋاقىتتا قىزعىلت سارى ءتۇستى جارىقپەن كومكەرىپ قويدى.

جەرگىلىكتى بيلىك پەن رەسپۋبليكالىق ۇكىمەت COVID-19 پاندەمياسىن جويۋ ءۇشىن ماڭىزدى شارالاردى قابىلداعانىمەن، ايەلدەرگە قاتىستى زورلىق-زومبىلىقتىڭ ءورشۋى تۋرالى مالىمەت قاتارى ارتقانى بايقالادى.

ء«بىز وسى ناۋقاندا داۋسى ماڭىزدى قازاقستاندىقتارمەن سەرىكتەس بولعاندىعىمىزدى ماقتان تۇتامىز. جەكە تۇلعالار مەن ۇيىمدار ناۋقاننىڭ ماقساتىنا قاراي، ياعني قازاقستاندا حاباردارلىقتى ارتتىرۋ جانە گەندەرلىك زورلىق-زومبىلىقتىڭ الدىن الۋدا بارلىق ادامدار ماڭىزدى ءرول اتقارا الاتىندىعىن ەسكە سالۋعا نەگىزدەلىپ، شاقىرىلدى»، دەيدى ۇيىمداستىرۋشى تاراپ.

ناسيحات جۇمىسىنىڭ العاشقى كەيىپكەرى – نينا بالاباەۆا. اقش مەملەكەتتىك دەپارتامەنتى نينانىڭ ادام ساۋداسىنا (TIP) قارسى قىزمەت ەتۋ سالاسىنداعى جۇمىسىن مويىنداپ قانا قويماي، ادام ساۋداسى تۋرالى باياندامانىڭ كەيىپكەرى رەتىندە زاماناۋي قۇلدىقتى توقتاتۋدى جاقتايتىن قاھارمان سىيلىعىن بەرگەن. قازىرگى قازاقستان قوعامىندا مەملەكەتتىڭ گەندەرلىك ساياساتىن قالىپتاستىرۋ جانە ونى جۇزەگە اسىرۋ ماسەلەلەرى جايىندا جان-جاقتى اقپارات ەلشىلىكتىڭ الەۋمەتتىك جەلىلەردەگى پاراقشالارىندا كۇندە جاريالانادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز