جالپاق جۇرتقا جاقسى ۇلگى بولۋعا ابدەن جارايتىن كوپ بالالى وتباسىلاردى شادىمان شاتتىققا بولەگەن قامقورلىقتى جەرگىلىكتى سەرىكتەستىك جاساپ وتىر. ولار ۇزاق ۋاقىتتان بەرى جايلى دا جارىق باسپاناعا قولى جەتپەي كەلە جاتقان وسىناۋ وتباسىلارعا جاڭا پاتەرلەردىڭ كىلتىن تابىس ەتىپ, جۇرەك جىلۋىمەن جىلىتىپ, مەرەيلەرىن تاسىتىپ جىبەردى. ايتالىق, تاياۋدا باسپانالى بولعان بينيماندار مەن چۋماكوۆتاردىڭ كوپ بالالى وتباسىلارى ءدال وسىنداي اقجارىلقاپ ءساتتى ۇزاق ۋاقىتتان بەرى توسقان ەدى. بۇرىنعى تۇرعان ۇيلەرى اپاتتى جاعدايدا بولاتىن. باسقا بارار جەرلەرى بولماعان سوڭ, امالسىزدان الدەنەشە جىل ابدەن كونەرگەن, ەسكى ۇيلەردى پانالاپ كەلگەن. تاياۋدا سەرىكتەستىك ءوز قاراجاتى ەسەبىنەن ەكى ءۇي ساتىپ اپەردى. تۇرۋعا ابدەن جارايتىن ۇيلەردى تاپ-تۇيناقتاي ەتىپ جوندەپ, تىرشىلىككە قاجەتتى ينفراقۇرىلىمدار تارتىپ بەردى.
– مىنەكي, قولىما جاڭا باسپانانىڭ كىلتى ءتيدى. ءدال وسىنداي ۇيگە يە بولامىن دەپ ارمانداعان ەمەسپىن. ەڭسەسى بيىك, ۇلكەن, جىلى ءۇي. جاناشىر ادامداردىڭ وسىنداي ەسىڭنەن كەتپەس قامقورلىق جاساعانى قانداي جاقسى. ءبىزدىڭ ورتاق وتانىمىز – قازاقستاندا اركىم دە وسىنداي جاقسىلىقتىڭ شاراپاتىن كورىپ جاتسا, عانيبەت ەمەس پە؟! – دەيدى كاپيتونوۆكا اۋىلىنىڭ تۇرعىنى كونستانتين بينيمان.
ەكىنشى ۇيگە يە بولعان سەرگەي چۋماكوۆ تا – وسى توپىراقتىڭ تۋماسى ءارى كوپ بالالى اكە. سەرگەي باسپانامەن قامتاماسىز ەتكەن «جۋراۆلەۆكا-1» سەرىكتەستىگىنىڭ باسشىلىعى مەن ۇجىمىنا العىسىن ايتىپ تاۋىسا الار ەمەس.
جەرگىلىكتى اتقارۋشى بيلىك شاعىن اۋىلداعى الدارىنان جۇمىس ۇركىپ وتىراتىن ەڭبەكقور تۇرعىنداردى ءاردايىم باعالاپ, ولاردىڭ مۇڭ-مۇقتاجىنا ءجىتى نازار اۋدارىپ, كومەك-قولداۋىن كورسەتىپ وتىرادى. جوعارىدا ايتىلعان ەكى وتباسىنىڭ وتاعاسى دا اتالعان سەرىكتەستىكتە ۇزاق جىلدان بەرى قاجىرلى ەڭبەك ەتىپ كەلەدى. سوندىقتان بۇگىنگىدەي قۋانىشقا بولەنۋگە ابدەن حاقىلى. ءوز كەزەگىندە ولار دا قامقورلىقتىڭ ءمانىن ەتەنە ءتۇسىنىپ, الداعى ۋاقىتتا جاسالعان جاقسىلىقتىڭ قارىمتاسىن قايتارامىز دەپ بىلەكتەرىن سىبانىپ وتىر.
– وكرۋگتە كوپ بالالى ون وتباسى بار. ولاردىڭ ەكەۋى باسپانالى بولدى. الداعى ۋاقىتتا قالعان كوپ بالالى وتباسىلارعا دا وسىنداي كومەك كورسەتىلۋى ابدەن مۇمكىن. اۋىلدىق جەر بولعانىمەن, ۇيلەر دە ارزان ەمەس. ارقايسىسى شامامەن 6 ملن تەڭگە تۇرادى, – دەيدى اۋىلدىق وكرۋگتىڭ اكىمى باقىت راقىمجانوۆا.
اۋداندا وتكەن جىلى كوپ بالالى 15 وتباسى قونىس تويىن تويلادى. بۇگىندە بۇل كورسەتكىش 42-گە جەتىپ وتىر. جارىق دۇنيەدە ءۇبىرلى-ءشۇبىرلى ۇرپاق ءوربىتىپ, بولاشاقتىڭ تىلەۋىن تىلەپ وتىرعان كوپ بالالى وتباسىلاردى جان جىلۋىمەن جىلىتقاننان ارتىق قۋانىش بولار ما ەكەن؟!
اقمولا وبلىسى,
بۇلاندى اۋدانى
