قالا اكىمى نۇرلىبەك نالىباەۆتىڭ توراعالىعىمەن وتكەن اپپارات ماجىلىسىندە اقسۋات, قوسشىڭىراۋ اۋىلدىق وكرۋگتەرىندە جىل كولەمىندە اتقارىلعان جۇمىستار مەن الداعى مىندەتتەر قارالدى. اقسۋات اۋىلى جايلى حابارلاما جاساعان وكرۋگ اكىمى مامبەتالى اقمىرزاەۆ 10 اي كولەمىندە كاسىپكەرلىك نىساندار سانىنىڭ ارتقانىن ايتىپ ءوتتى. ەلدى مەكەندە "اۋىل – ەل بەسىگى" باعدارلاماسىنا اياسىندا دا اۋقىمدى ءىس اتقارىلعان.
بيىل قوسشىڭىراۋ اۋىلىندا اۋىز سۋ ماسەلەسى تولىعىمەن شەشىلىپتى. وكرۋگ اكىمى دۋلات تاۋباي ەلدى مەكەندە جول جاعدايى دا جولعا قويىلعانىن ايتتى. جىل باسىنداعى ەسەپتىك كەزدەسۋلەردە تۇرعىندار كەشكى مەزگىلدە ەلەكتر قۋاتىنىڭ السىرەپ قالاتىنىن ايتقان ەدى. بۇل قالا اكىمدىگىنىڭ قولداۋىمەن ءوز شەشىمىن تاپتى.
قوس اۋىلدىڭ تىنىس-تىرشىلىگىن باعامداپ, جىل كولەمىندەگى جەتىستىكتەرىن سارالاعان شاھار باسشىسى قالا ىرگەسىندە قانات جايىپ, كۇرە جولدىڭ بويىنان ورىن تەپكەن اقسۋاتتا مەملەكەتتىك باعدارلامالارعا مويىن بۇرعان ازاماتتاردىڭ قاتارى ءالى دە از ەكەنىن ايتىپ, كاسىپكەرلىك باعىتقا كەلگەندە قوسشىڭىراۋ دا كەيىن قالىپ تۇرعانىن اتاپ ءوتتى. قالا اكىمى جىل اياعىنا دەيىن قوس اۋىلدىڭ دا كورسەتكىشتەرىن كوتەرۋدى جۇكتەدى.
سونىمەن قاتار اۋىلدىق وكرۋگتەردەگى جول جوندەۋ, اۋىل شارۋاشىلىق سالاسىن تسيفرلاندىرۋ, تازالىق, قىلمىستى بولدىرماۋ ماقساتىندا جۇمىستاردى ۇيىمداستىرۋ جايلى ۇسىنىستارىن جەتكىزدى. وكرۋگتەر اۋماعىندا جاسالعان قىلمىستاردىڭ اشىلۋى بويىنشا بىرقاتار سىن-ەسكەرتپە ايتقان قالا اكىمى قوس باسشىعا دا جۇمىستى شيراتۋدى تاپسىردى.
