تورت ءپىسىرۋشى جىگىت

قوعام • 25 قاراشا، 2020

تورت ءپىسىرۋشى جىگىت

20 رەت كورسەتىلدى

تاماق ءپىسىرۋدى تەك ايەلدەرگە ءتان جۇمىس دەپ ولاردىڭ مىندەتىنە ارتىپ تاستاۋ دۇرىس پا، دۇرىس ەمەس پە؟

ەر ادامنىڭ جىلى-جۇمساق پىسىرۋمەن اينالىسۋىن ناپاقا تاۋىپ، بالا-شاعا اسىراۋ ءۇشىن «ايەلدىڭ ءىسى، ەردىڭ كۇشى» دەپ جۇمىستى «جىنىسقا» جىكتەمەي، قولدان كەلگەن تىرلىكتى جاساۋ، ءسويتىپ، كاسىپتىڭ كوزىن تابۋ دەيمىز بە، ايتەۋىر ەشكىم جاقسى ءىستى جوققا شىعارا المايدى. قازىر اسحانالاردا تاماقتى ءدامدى ەتىپ دايىنداۋدا اناۋ-مىناۋ ايەلدى جارتى جولدا قالدىراتىن بەساسپاپ اسپاز ەرلەر از ەمەس، ءتىپتى مارتەبەلى تۇلعالاردىڭ دا جەكە اسپازدارى كوبىنە ەرلەردەن بولىپ كەلەدى.

جاڭاوزەن قالاسىنىڭ تۇرعىنى ءسابيت قابىكەەۆ 21 جاسىنان باستاپ ءتاتتى تورتتار دايىندايدى. وسى كاسىپتى قولعا الۋعا تاتتىگە دەگەن سۇيىسپەنشىلىك باستى سەبەپ بولعان. بۇگىندە ول ءارتۇرلى تورتتاردىڭ قۇرامىن ازىرلەپ، ءوزى اتاۋ بەرەدى.

– تورت ءپىسىرىپ جۇرگەنىمە 6 جىلداي بولدى. قىتايداعى وقۋىمدى تاستاپ ەلگە ورالىپ، ءبىر جىلداي ءجۇرىپ، ءوزىمنىڭ بيزنەسىمدى باستادىم. تاپسىرىستاردى ازىرشە ۇيدە قابىلدايمىن. بۇگىندە مەنەن ساباق العان شاكىرتتەرىم دە بار. الداعى ۋاقىتتا ءوز كونديتەرلىك دۇكەنىمدى اشۋدى جوسپارلاپ وتىرمىن. ماقساتىم – جاڭاوزەن، اقتاۋ قالالارىندا كونديتەرلىك ستۋديا اشىپ، كاسىبىمدى كەڭەيتۋ. ءوسىپ كەلە جاتقان جاستاردى جۇمىسقا تارتىپ، ەڭبەككە باۋلىعىم كەلەدى. قازىر وزگەشە رەتسەپتەرمەن 3 تورت ويلاپ شىعاردىم، دەيدى ءسابيت قابىكەەۆ.

ءسابيت قابىكەەۆتىڭ ايتۋىنشا، ءبىر تورتتى ءارتۇرلى جاعىنان جاساپ كورىپ، ەرەكشە تورتتىڭ رەتسەپتىن ويلاپ تاپقان. ونى دايىنداپ، ناقتى قۇرامىن انىقتاۋ ءۇشىن 2 ايعا جۋىق ۋاقىت كەتكەن. بۇگىندە ءوزى دايىنداعان تاتتىلەرىنە «اي ءتاتتى»، ء«ۇش سۇلۋ» جانە «اققۋ» دەگەن ات قويعان 27 جاستاعى كاسىپكەر ازامات بولاشاقتا جۇمىسسىز جۇرگەن جاستارعا تەگىن تۇردە ءبىلىم بەرىپ، ءوزىنىڭ كونديتەرلىك دۇكەنىنە جۇمىسقا الۋدى ماقسات تۇتادى.

ال ءسابيتتىڭ تورتتارىننان ءدام تاتىپ، ونى ءوز داستارحانىنان كورۋگە اسىققان تۇرعىندار تەك ريزاشىلىقتارىن بىلدىرۋدە.

ماڭعىستاۋ وبلىسى